Познание основ православной веры

Тропарь, глас 4: Цвети Российскаго луга духовнаго:
Или сей тропарь, новосоставленный, глас тойже:
Днесь радостно ликует Церковь Русская, / яко мати чада, прославляющи новомученики и исповедники своя: / святители и иереи, / царственныя страстотерпцы, / благоверныя князи и княгини, / преподобныя мужи и жены / и вся православныя христианы, / во дни гонения безбожнаго / жизнь свою за веру во Христа положившия / и кровьми Истину соблюдшия. / Тех предстательством, Долготерпеливе Господи, / страну нашу в Православии сохрани до скончания века.
Кондак, глас 2.
Новии страстотерпцы Российстии, / исповеднически поприще земное претекшии, / страданьми дерзновение приимшии, / молитеся Христу, вас укрепившему, / да и мы, егда найдет на ны испытания час, / мужества дар Божий восприимем. / Образ бо есте лобызающим подвиг ваш, / яко ни скорбь, ни теснота, ни смерть / от любве Божия разлучити вас не возмогоша.

Служба святым новомучеником и исповедником Российским
Совершается память их в Неделю, ближайшую к 25-му ианнуариа. И аще будет 25-е ианнуариа в понедельник, вторник или среду, поем новомучеником в Неделю, яже есть пред сим, аще ли будет в четверток, пяток или субботу, поем им в Неделю последующую. Аще прилучится 25-е ианнуариа в день недельный [воскресный], поем службу новомучеником в той же день, службу же святому Григорию Богослову в 27-й день ианнуариа купно со службой святителю Иоанну Златоусту. Предваряет тогда служба святителю Григорию. Ведомо буди и сие: служба сия бывает, наченши от 22-го и восходящи до 28-го ианнуариа. И аще прилучится тогда Неделя мытаря и фарисеа, или блуднаго, или мясопустная, поем новомучеником с Триодию непременно, якоже трием святителям по Марковой главе. Аще прилучится в тойже день память великаго святаго, поем святому великому в субботу ближайшую, или в иный день. Аще же будет где в той день храм, поем службу храма с Триодию непременно, святым же новомучеником во грядущую Неделю.
Текст: http://kazan.eparhia.ru/library/molitvoslovie/servises/servis/

Молитва собору новомучеников
и исповедников Российских

О святии новомученицы и исповедницы Российстии: святителие и пастырие Церкве Христовы, царственнии страстотерпцы, благовернии князие и княгини, доблии воини, монаси и мирстии, благочестивии мужие и жены, во всяцем возрасте и сословии за Христа пострадавшии, верность Ему даже до смерти свидетельствовавшии и венец жизни от Него приявшии!

Вы во дни гонения лютаго, землю нашу от безбожных постигшаго, на судищах, в заточениих и пропастех земных, в горьких работах и всяких скорбных обстояниих образ терпения и непостыднаго упования мужественне явили есте. Ныне же, в раи сладости наслаждающеся, пред Престолом Божиим во славе предстоите и присно хвалу и ходатайство со Ангелы и всеми святыми Триединому Богу возносите.

Сего ради мы, недостойнии, молим вас, святии сродницы наши: не забудите земнаго отечества вашего, грехом каинова братоубийства, поруганием святынь, безбожием и нашими беззаконии отягченнаго. Умолите Господа сил, да утвердит Церковь Свою непоколебиму в мире сем многомятежном и лукавом; да возродит в земли нашей дух разума и благочестия, дух святости и страха Божия, дух братолюбия и мира; да паки будем мы царское священие, род Божий, избранный и святый, присно с вами славящий Отца и Сына и Святаго Духа во веки веков.
Аминь.