Май

1/14 мая

Пророк Иеремия

Тропарь, глас 2

Пророка Твоего Иеремии память, Господи, празднующе, / тем Тя молим: / спаси души наша.

Кондак, глас 3

Очистив духом, великий пророче и мучениче, / твое светозарное сердце, / славне Иеремие, / пророчествия дар свыше приял еси / и возопил еси велегласно во странах: / се Бог наш, и не приложится ин к Нему, / Иже, воплощся, на земли явился есть.

 

Преподобный Пафнутий Боровский

Тропарь, глас 4

Жития светлостию просветив твое отечество, / в молитвах и постех дарований Божественнаго Духа исполнился еси, / и, во временней сей жизни добре подвизався, / милость благоутробия всем скорбящим отверзл еси, / и нищим был еси заступник. / Тем молим тя, отче Пафнутие, / моли Христа Бога, да спасет души наша.

Кондак, глас 8

Божиим светолитием просвещен, отче, / постническое стяжал еси жительство, преподобне, / иноком предобрый наставниче и постником благое украшение. / Сего ради Господь, труды твоя видев, / чудес даром обогати тя, / источаеши бо исцеления. / Мы же, радующеся, вопием ти: / радуйся, отче Пафнутие.

 

Благоверная царица Грузии Тамара Великая

Тропарь, глас 8

Вышния красоты желая, / нижния сласти телесныя далече от себе отгнала еси / и, в чертозе царском пребывающи, / ангельское житие препровождала еси, / царице Тамаро блаженная, / моли Христа Бога спастися душам нашим.

Иной тропарь, глас 4

Во святых дивная, / Иверии светило, / благоверная царице Тамаро, / на горах высоких храмы воздвигшая, / да в них моления возсылают коГосподу, / мольбами твоими крепость даровавшая воем христолюбивых людей страны Иверския, / десницею же своею полчища агарянская низпровергшая, / моли Христа Бога / спастися душам нашим.

 

Священномученик Макарий, митрополит Киевский

Тропарь, глас 8

Божественныя Бескровныя совершая Жертвы, кровь твою, от безбожных агарян излиянную, в жертвах непорочную принесл еси Владыце твоему, Пастыреначальнику Христу. Егоже моли, молим тя, пролити гнев на языки, хотящия браней; христолюбивое воинство наше на враги укрепи и стадо твое от всяких бед неврежденно соблюди, тебе бо крепкаго заступника почитаем, новый священномучениче российский, святителю блаженный Макарие.

Кондак, глас 8

Веселится град Киев, великое сокровище стяжав, твое тлению непричастное тело, святителю блаженне Макарие, твой бо престол даже до крове от лютых врагов нашествия хранил еси. И ныне Небесному предстоиши Престолу, идеже молитвенно пред Творцом поминай нас, отче наш, да во всех бедах имеем тя прибежище и тобою хвалимся, зовуще: радуйся, Макарие, архиереом честное украшение.

 

2/15 мая

Мученики Борис и Глеб, князья Русские

Тропарь, глас 2

 Правдивая страстотерпца и истинная Евангелия Христова послушателя, целомудренный Романе с незлобивым Давидом, не сопротив стаста врагу сущу брату, убивающему телеса ваша, душам же коснутися не могущу, да плачется убо злый властолюбец: вы же радующеся с лики ангельскими, предстояще Святей Троице, молитеся о державе сродников ваших, богоугодней быти, и сыновом Российстем спастися.

Иной тропарь, глас 4

Днесь церковная разширяются недра, / приемлющи богатство Божия благодати, / веселятся русстии собори, / видяще преславная чудеса, / яже творите приходящим к вам верою, / святии чудотворцы Борисе и Глебе, / молите Христа Бога, да спасет души наша.

Иной тропарь, глас 2

Пречестнии, и целомудреннии, и незлобивии страстотерпцы, / Романе славный и Давиде чудный, / иго бо Господне евангельски на рамо вземше, / последовасте Христу / и, крест Его, яко скипетр, в руку имуще, / врага брата и злаго властолюбца соодолесте, / и той ныне в геене мучится, / вы же радуетеся, с лики ангельскими предстояще Святей Троице, / молитеся о державе сродник ваших, благоугодней быти, / и сыновом русским спастися.

Иной тропарь, глас 4

Мученицы Господни спасшиися, / преславнии блаженнии князи Борисе и Глебе, / труждающимся быстрии помощницы, / недужным целители, / вы бо болезни врачуете / притекающих в церковь с верою. / Темже и мы молимся: / от бед избавите нас, / чтущих с любовию пренесение мощей ваших.

Иной тропарь, глас 8

Днесь всякая душа верных веселится, / в пренесение честных мощей ваших, Борисе и Глебе, / слепыя просвещаете, немым уста отверзаете и печальныя утешаете, / прияли бо есте от Христа Бога благодать исцелений, / молитеся о душах наших.

Кондак, глас 4

Явися днесь в стране Русстей благодать исцеления всем, / к вам, блаженнии, приходящим и вопиющим: / радуйтеся, заступницы теплии.

Иной кондак, глас 3

Приидите, вси русстии собори, / чудотворцу и мученику Бориса и Глеба восхвалим, / законно бо пострадавше, / победисте сопротивнаго врага, / тем святым заступлением князи русстии враги побеждают, / тем память ею весело и любовию похвалим, вопиюще: / за ны молите Святую Троицу, / умирити мир и спасти души наша.

Иной кондак, глас 4

От гроба знамения показасте во стране Русстей, / явися днесь благодать исцеления / всем, к вам, страстотерпцы, притекающим с верою, / Борисе славный со Глебом чудным. / Крепцы верою, добропобеднии мученицы, за Христа подъемше различныя муки, / и на многа лета сокровени быша ваши святии мощи, / ныне же являетеся от земли, / возсиявше лучами, яко богатство многоценно, / и в Церковь Божию честно носими, архиерей Божиих дланьми. / Темже вопием вам: / радуйтеся, князи, русстии заступницы.

Иной кондак, глас 3

Возсия днесь преславная память ваша, благороднии страстотерпцы Христови, Романе и Давиде, созывающи нас к похваления Христа Бога нашего. Тем притекающе к раце мощей ваших, исцеления дар приемлем молитвами вашими святии: вы бо Божественнии врачеве есте.

 

Святитель Афанасий Великий, Патриарх Александрийский

Тропарь, глас 3

Столп был еси православия, / Божественными догматы подтверждая Церковь, / священноначальниче Афанасие: / Отцу бо Сына Единосущна проповедав, / посрамил еси Ария. / Отче преподобне, / Христа Бога моли, / даровати нам велию милость.

Кондак, глас 2

Православия насадив учения, / злославия терния изсекл еси, / умножив семя веры одождением Духа, преподобне, / темже тя поем, Афанасие.

 

Блаженный Василий Рязанский (местночтимый святой Рязанской Епархии)

Тропарь, глас 4
Молитва усердная пища и питие бысть, блаженне Василие, в несении креста жития странническаго любовь Христову познал еси. Оком чистым будущая яко настоящая прозревая, радость и от бед избавление требующим твоея помощи даровал еси. Темже и нас, яко Божий избранник, не забуди твоими ходатайствы Христа Бога о нас умоляющи.

 

3/16 мая

Мученики Тимофей и Мавра

Тропарь, глас 4

Мученицы Твои, Господи, / во страданиих своих венцы прияша нетленныя от Тебе, Бога нашего, / имуще бо крепость Твою, / мучителей низложиша, / сокрушиша и демонов немощныя дерзости. / Тех молитвами / спаси души наша.

Кондак, глас 4

Многообразныя язвы претерпевше / и венцы от Бога приемше, / о нас молитеся ко Господу, / память всесвященную вашу совершающих, / превеликий Тимофее и преславная Мавро, / еже умирити град и люди, / Той бо есть верных утверждение.

 

Преподобный Феодосий, игумен Киево-Печерский

Тропарь, глас 8

Возвысився на добродетель, / измлада возлюбив монашеское житие, / к желанию доблественне достиг, вселился еси в пещеру / и, украсив житие твое пощением и светлостию, / в молитвах, яко безплотен, пребывал еси, / в Российстей земли, яко светлое светило, просияв, отче Феодосие, / моли Христа Бога, спастися душам нашим.

Кондак, глас 3

Звезду Российскую днесь почтим, / от востока возсиявшую, и на запад пришедшую, / всю бо страну сию чудесы и добротою обогатившу и вся ны / содеянием и благодатию монашескаго устава, / блаженнаго Феодосия.

 

Преподобные Иулиания и Евпраксия Московские

Тропарь, глас 1

Христу Жениху уневеститеся возжелавшия/ и подвиги иноческия Того ради понесшия,/ добродетельным житием и любовию ко всем/ себе украсившия, преподобныя Иулиание и Евпраксие./ Во граде Москве первыя обители девическия/ устроительницы явистеся/ и трудов и подвигов брата вашего святителя Алексия/ ревнительницы показастеся./ Сего ради, ныне на Небесех вкупе с ним торжествующе,/ молите граду Москве в Православии утвердитися,/ обители вашей сохранитися/ и спастися душам нашим.

Кондак, глас 2

Что вас наречем, богомудрыя Иулиание и Евпраксие?/ Немощный сосуд естеством,/ но подвиги и труды мужески понесосте;/ преподобныя жены,/ но славы отцев воистину сподобистеся;/ от земных рода благаго,/ но Небеснаго отечества достигосте./ Молите усердно Владыку Христа спастися душам нашим.

 

4/17 мая

Новомученики Батакские (Болгарские)

Тропарь, глас 1
Я
ко овцы заколения вменившеся, муки страшныя за Имя Христово претерпесте, старцы и мужие с юношами, младенцы с матерьми, невесты целомудренныя и девы чистыя, Батакстии мученицы всехвальнии, рода бóлгарского украшение: молите Христа Бога нашего о верою и любовию почитающих память вашу.

Кондак, глас 5
Христа не отвергостеся, муки странноужасныя изволивше паче прéлестнаго жития земнаго в нечестивей вере агарянстей: сего ради со всеми святыми на Небесех жительствующе, непрестанно Христа Бога молите о прзднующих любовию память вашу, и всем сердцем зовущих: радуйтеся, многострадальнии отцы и матери наша

 

Мученица Пелагея, дева Тарсийская

Тропарь, глас 4

Агница Твоя, Иисусе, Пелагия / зовет велиим гласом: / Тебе, Женише мой, люблю, / и, Тебе ищущи, страдальчествую, / и сраспинаюся, и спогребаюся Крещению Твоему, / и стражду Тебе ради, / яко да царствую в Тебе, и умираю за Тя, / да и живу с Тобою, / но яко жертву непорочную, приими мя, с любовию пожершуюся Тебе. / Тоя молитвами, / яко Милостив, спаси души наша.

Кондак, глас 3

Временная презревши / и Небесных благ причастница бывши, / венец страдания ради приимши, / Пелагие всечестная, / яко дар принесла еси кровныя потоки Владыце Христу. / Моли от бед избавити нас, / твою память почитающих.

 

Преподобные Никита, Кирилл, Никифор, Климент и Исаакий, братья Алфановы, Новгородские

Тропарь, глас 1

Послушаша Господня гласа, / добрии рачители бывше, / благий Его ярем на ся вземше, / усердно понесосте / и постничества путь достигше, / преподобнии отцы, святии чудотворцы, / воини Небеснаго Царя Христа, / Никито, Кирилле, Никифоре, Клименте и Исаакие, / сего ради от Вседержительныя десницы венцы неувядаемыми увязостеся, / и Небесною славою одеястеся, / и чудотворении обогатистеся, / темже и о нас молити не престайте, / да получим вечных благ, / мы же сице взываем: / слава Давшему вам к подвигу крепость, / слава Венчавшему вас, / слава Дающему вами всем исцеления.

Иной тропарь, глас 8

Светильницы светлии явльшеся, / доброту земную мудренно оставиша, / и всю добродетель извыкли есте, / и обретоша безсмертие, / постом и бдением и прочим воздержанием себе приношаху, / и ныне со Ангелы на Небесех Престолу Христову предстоите, / молитеся Богу, мудрии, / Никито, Кирилле, Никифоре, Клименте и Исаакие преподобнии, / умирити мир и спасти души наша, поющих, / и согрешающим оставление грехов даровати, / чтущим святую память вашу.

Кондак, глас 8

Благодать приемше исцелением, / простираете здравие сущим в болезнех, / преподобнии отцы и чудотворцы славнии, / Никито чудне, и Кирилле блаженне, / и Никифоре пречестне, Клименте святе и Исаакие преподобне, / но молитвами ваю противных шатание разорите, / и болезни наша исцелите, / и грехов прощение испросите, / да благодарне воззовем вам: / радуйтеся, великому Новуграду похвало и утверждение.

Иной кондак, глас 8

К Богу все свое умное желание вперисте / и к тому невозвратно от души последовали есте, / ангельское житие на земли поживше, / и многим бысте путь ко спасению, / отсюду же и Христос вас прослави и даром чудес обогати, / темже вси, притекающе к мощем вашим, зовем: / радуйтеся, преподобнии отцы, Никито, Кирилле, Никифоре, Клименте и Исаакие, / молитвенницы теплии о душах наших.

 

5/18 мая

Великомученица Ирина

Тропарь, глас 4

Агница Твоя, Иисусе, Ирина, / зовет велиим гласом: / Тебе, Женише мой, люблю, / и, Тебе ищущи, страдальчествую, / и сраспинаюся, и спогребаюся Крещению Твоему, / и стражду Тебе ради, / яко да царствую в Тебе, и умираю за Тя, / да и живу с Тобою, / но яко жертву непорочную, приими мя, с любовию пожершуюся Тебе. / Тоя молитвами, / яко Милостив, спаси души наша.

Кондак, глас 4

Девства добротами преиспещренна, дево, / страдальчеством была еси краснейшая, Ирино, / кровьми твоими истекшими обагрена, / прелесть же низложившая безбожия. / Сего ради и прияла еси почести победы рукою Создателя твоего.

 

Преподобный Иаков Железноборовский

Тропарь, глас 4

Небеснаго желая, / земная возненавидел еси / и, взем крест свой, последовал еси Христу / и от Него прием дарования чудес, / исцеляти недужныя; / но, яко имея дерзновение ко Святей Троице, / испроси православным Христианом здравие и спасение, / на враги же победу / и не забуди, посещая чад своих, / припадающих к цельбоносному гробу твоему, / Иакове, преподобне отче наш.

Кондак, глас 6

Сердечная очи, досточудне, ко Господу вперив / и телесныя страсти из корене исторгая, / неболезненную жизнь в болезнех восприял еси, преподобне, / болезнем же лютым даеши исцеление просящим с верою у тебе, / темже молим тя, досточудне, / исцели наша болезни душевныя и телесныя, да зовем ти: / радуйся, Иакове Богомудре, отче наш.

 

Преподобный Пахомий Нерехтский

Тропарь, глас 4

Житейских молв, преподобне, отвергся, и, яко птищ, обрете себе в пустыне безмолвие, в молитвах и бдении прилежа Богови, преподобне отче Пахомие, и остави древнее пребывание и отыде в пустыню, и в ней водворися, и состави обитель во имя Пресвятыя Троицы, и процвел еси, аки финикс, и бысть образ утешения духовнаго. Темже, преподобне Пахомие, моли Пресвятую Троицу спастися душам нашим.

Кондак, глас 4

В пустыне безмолствуя, единствующу тя, богоносе, взыскующу ти Господа, Богу же тебе не оставльшу единому быти в пустыни, и Того повелением снидошася к тебе неколико братии, и с нимиже ти молящуся Господеви, Троице пречестен храм воздвиже, в немже предстояще, преподобне Пахомие, молися о спасении душ наших.

 

Преподобный Варлаам Серпуховской

Тропарь, глас 3
О
т святителя Алексия богоугождению научен, / добродетельми украсил еси душу свою. / Сего ради Матере Божия избранник явился еси / и обитель Тоя Введению воздвигл еси / на спасение многим душам человеческим. / Иноком добрый наставниче, / теплый о нас к Богу молитвенниче, / преподобне Варлааме, отче наш, / моли спастися душам нашим.

Кондак, глас 8
Аще и под спудом сокрыты суть честныя твоя мощи, / преподобне отче наш Варлааме, / обаче же лучи чудес и исцелений испущают светло, / всем притекающим с верою и молящим ти ся усердно. / Явился бо еси воистинну угодник Божий / и ходатай присный о чтущих любовию святую память твою.

 

6/19 мая

Преподобный Михей Радонежский

Тропарь, глас 4

Иго Господне на рамо взем, / последовал еси Христови со учителем своим преподобным Сергием, / с нимже и сподобился еси видети Пресвятую Богородицу. / И слышал еси пресладкий глас Ея, / яко обещася неотступна быти места сего, / но, о преподобне Михее, / молися о чтущих святую память твою.

Кондак, глас 8

Приидите, монашествующих собори и постников лицы, / сошедшеся, похвалим блаженнаго Михея, / спостника преподобнаго Сергия, / с нимже предстоит Святей Троице / и молится спастися душам нашим.

 

Праведный Иов Многострадальный

Тропарь, глас 1

Богатство видев добродетелей Иовлих, / украсти кознствоваше праведных враг, / и, разтерзав столп телесе, / сокровище не украде духа, / обрете бо вооружену непорочнаго душу, / мене же, и обнажив, плени, / предварив убо мя прежде конца, / избави мя, льстиваго, Спасе, и спаси мя.

Иной тропарь, глас 2

Память праведного Твоего Иова, Господи, празднующе, / тем Тя молим: / избави нас от наветов и сетей лукавого диавола / и спаси души наша, яко Человеколюбец.

Кондак, глас 8

Яко истинен и праведен, Богочестив и непорочен, / освящен же явлься, всеславне, Божий угодниче истинный, / просветил еси мир в терпении твоем, терпеливейший и доблейший. / Темже вси, Богомудре, память твою воспеваем.

 

7/20 мая

Воспоминание явившегося на небе знамения Честного Креста во граде Иерусалиме

Тропарь, глас 8

Креста Твоего образ ныне паче солнца возсия, / егоже от горы святыя даже до лобнаго места простерл еси / и в нем Твою, Спасе, крепость уяснил еси, / сим укрепляя нас, / и спасай выну в мире / молитвами Богородицы, Христе Боже, и спаси нас.

Кондак, глас 4

Отверзый Небеса заключенная, на Небеси пресветлыя лучи, / на земли возсия Пречистый Крест: / темже, сияние его действа приемше, к незаходимому наставляемся Свету / и во бранех имамы его оружие мира, / непобедимую победу.

 

Преподобный Нил Сорский

Тропарь, глас 4

Удалився, бегая, давидски, мира, / и вся, яже в нем, яко уметы, вменив, / и, в месте безмолвне вселився, / духовныя радости исполнился еси, отче наш Ниле, / и, единому Богу изволив служити, / процвел еси, яко финикс, / и, яко лоза благоплодна, / умножил еси чада пустыни. / Тем благодарственно вопием: / слава Укрепльшему тя в подвиге пустынножительства; / слава Избравшему тя в России / отшельником уставоположника изрядна, / слава молитвами твоими и нас Спасающему.

Иной тропарь, глас 1

Мирскаго жития отвергся / и мятежа житейскаго бегая, / преподобне и Богоносне отче наш Ниле, / не обленился еси собрати цветы райския от писаний отеческих / и, в пустыню вселився, / процвел еси, яко крин сельный, / отонюду же прешел еси и в Небесныя обители; / научи и нас, честно почитающих тя, / твоим царским путем шествовати / и молися о душах наших.

Кондак, глас 8

Любве ради Христовы удалився мирских смущений, / радостною душею вселился еси в пустыни, / в нейже подвизався добре, / яко Ангел на земли, отче Ниле, пожил еси: / бдением бо и постом тело свое изнурил еси вечныя ради жизни. / Еяже ныне сподобився, / во свете неизреченныя радости Пресвятей Троице со святыми предстоя, / моли, молимтися, припадающе, чада твоя, / сохранитися нам от всякаго навета и злых обстояний / видимых и невидимых враг / и спастися душам нашим.

Иной кондак, глас 3

Терпя, потерпел еси суетная обычаи / и мирския нравы братий твоих, / обрел еси пустынное безмолвие, преподобне отче, / идеже постом, бдением и непрестанною молитвою в трудех подвизався, / ученьми твоими правыя стези указал еси нам / шествовати ко Господу. / Темже и почитаем тя, всеблаженне Ниле.

 

8/21 мая

Апостол и евангелист Иоанн Богослов

Тропарь, глас 2

Апостоле, Христу Богу возлюбленне, / ускори избавити люди безответны, / приемлет тя, припадающа, / Иже падша на перси приемый. / Егоже моли, Богослове, / и належащий облак языков разгнати, / прося нам мира и велия милости.

Кондак, глас 2

Величия твоя, девственниче, кто повесть? / Точиши бо чудеса, и изливаеши исцеления, / и молишися о душах наших, / яко Богослов и друг Христов.

 

Преподобный Арсений Великий

Кондак, глас 3

От Рима возсиял еси, якоже солнце великое, / и к Царскому граду достигл еси, преблаженне, / словесы твоими просвещая сего и делы, / всяку неразумия мглу отгоня. / Сего ради тя почитаем, / отцев славо, Арсение преподобне.

 

Преподобный Арсений Новгородский

Тропарь, глас 1

Божественною любовию возгоревся, вся мирская пристрастия отринул еси, крест же Христов на рамо взем, во след Его изволил еси ходити, отечество твое оставив, Великаго Нова града достигл еси и, работая Богови невозвратным помыслом, дарования чудотворений сподобился еси. Темже, чтуще тя, преподобне Арсение, вопием: слава Давшему ти крепость, слава Венчавшему тя, слава Действующему тобою всем исцеления.

Кондак, глас 4

Тяжелоносныя волны тимения отгна, и вся плотская двизания и похоти палящия ни во чтоже вменив, взем крест и пойде вслед Христа, Имже наставляем, лукавыя сети до конца раздра и под ногами предложи, молимтися, преподобне отче Арсение, избави нас от належащих на ны соблазн, ты бо еси Великому Нову граду похвала и утверждение и сущим в печалех радость.

 

Преподобный Арсений Трудолюбивый

Тропарь, глас 8

Слез твоих теченьми пустыни безплодное возделал еси, и иже из глубины воздыханьми во сто трудов уплодоносил еси, и был еси светильник вселенней, сияя чудесы, Арсение отче наш, моли Христа Бога спастися душам нашим.

Кондак, глас тойже

Яже на земли оставль, Христовым стопам последовал еси тепле и Того, славне, на рамо взем честный крест, умертвил еси труды постническими телесныя желания, треблаженне. Темже зовем ти: радуйся, отче Арсение.

 

Преподобный Пимен Постник

Кондак, глас 8

Пимене преподобне, постником единонравне, послушания образе и трудолюбия правило, во бдении и молитвах неусыпне, не престай моляся о нас ко Господу.

 

Преподобный Кассиан, затворник Печерский

Тропарь, глас 8

В тебе, отче Кассиане, известно спасеся еже по образу, восприем бо крест и последовав Христови, творил еси заповеди Его тщательне. Темже ныне со Ангелы радуется, преподобне, дух твой.

Кондак, глас 2

Пред всеми смиряяся и во всем послушание припряженное посту, блаженне Кассиане, имея, покорил еси гордых бесов исповедати, коль вельми боятся преподобных Печерских, ихже и до конца посрамив, вселися в лице преподобных, с нимиже молися о всех нас.

 

9/22 мая

Перенесение мощей святителя и чудотворца Николая из Мир Ликийских в Барии

Тропарь, глас 4

Приспе день светлаго торжества, / град Барский радуется, / и с ним вселенная вся ликовствует / песньми и пеньми духовными: / днесь бо священное торжество, / в пренесение честных и многоцелебных мощей / святителя и чудотворца Николая, / якоже солнце незаходимое возсия, светозарными лучами, / разгоняя тьму искушений же и бед / от вопиющих верно: / спасай нас, яко предстатель наш великий, Николае.

Иной тропарь, глас 4

Отечество свое, Миры Ликийския, не оставль духом, / во премирный град Барский преславно телом пренесеся, архиерею Николае. / И оттуду множество человеческое своим пришествием возвеселил еси / и болящия исцелил еси. / Темже тя молим, святителю Николае, / моли Христа Бога, / да спасет души наша.

Кондак, глас 3

Взыде, яко звезда, от востока до запада / твоя мощи, святителю Николае, / море же освятися шествием твоим, / и град Барский приемлет тобою благодать: / нас бо деля явился еси чудотворец изящный, / предивный и милостивый.

 

Пророк Исаия

Тропарь, глас 2

Пророка Твоего Исаии память, Господи, празднующе, / тем Тя молим: / спаси души наша.

Кондак, глас 2

Пророчества дарование прием, пророкомучениче, Исаие Богопроповедниче, / всем изъяснил еси вочеловечение Господне, / возгласив велегласно концем: / се Дева во чреве приимет.

 

Мученик Христофор

Тропарь, глас 4

Одеждами от кровей украшаяся, / Господеви предстоиши, Царю сил, Христофоре приснопамятне, / отонудуже со Безплотными и мученики поеши / трисвятым и страшным сладкопением. / Темже молитвами твоими спасай стадо твое.

Кондак, глас 2

Свыше, премудре, звание приял еси, / Христу тезоименит быв, Христофоре славне, / мучеником Божественная доброто. / С ними же всегда моли / согрешений разрешение даровати нам.

 

Перенесение мощей мученика младенца Гавриила Белостокского

Тропарь, глас 5

Святый младенче Гаврииле, ты за Прободеннаго нас ради от иудей, люте от онехже в ребра прободен был еси: и за Истощившаго Кровь Свою за нас, все тело твое на истощение крови в лютыя язвы предал еси: ныне же во славе вечней с Ним вселился еси. Тем помяни и нас, молим, зде чтущих память твою, прося нам здравие телеси и спасение душам нашим.

Кондак, глас 6

Отечество твое Зверки бысть, мучениче Христов Гаврииле, идеже от истых зверей – иудеев восхищен: абие родителей лишен еси, таже вся поряду люте претерпев, в отечество Небесное переселился еси. Восхищай и нас зде от всяких напастей и скорбей и умоли, молим тя, улучити вечное наследие твое.

 

Преподобный Шио Мгвимский, Иверский

Кондак, глас 4

Житие твое служением Господним исправил еси и, взем крест, оставил еси вся житейская, красото пустыни, преподобне Шио. Кого убо паче тя, и по смерти жива суща страна Иверская почитает и мощми твоими, от гроба явленными, услаждается, темже не престай моляся о нас ко Господу.

 

Преподобный Иосиф Оптинский

Тропарь, глас 2:
Послужив старцу преусердно, / облистаем был еси сиянием его славы / и преобразился еси телом и душею, / благообразне преподобне отче Иосифе, / светильниче пресветлый. / Темже чреду старчества унаследовав, / таинник Божия благодати явился еси. / Моли Человеколюбца Христа и Заступницу усердную / спастися душам нашим.

 

10/23 мая

Апостол Симон Зилот

Тропарь, глас 3

Апостоле святый Симоне, / моли милостиваго Бога, / да прегрешений оставление / подаст душам нашим.

Кондак, глас 2

Известно премудрости учения в душах благочествующих положшаго / во хвалении ублажим, яко Богоглаголиваго вси Симона: / престолу бо славы ныне предстоит и со Безплотными веселится, / моляся непрестанно о всех нас.

 

Святитель Симон, епископ Владимирский и Суздальский, Печерский

Тропарь, глас 1

Житий преподобных отец Печерских списателю известный, / святителю Христов Симоне всеблаженне, / молися прилежно с ними Христу Богу, / да управит в мире живот наш / и в книги животныя да напишет ны, / спасая души наша.

Кондак, глас 2

Святительства одеждою, / аще и достойне одеялся еси, / обаче тем не возносяся, / желал еси паче сметием пред враты Лавры Печерския поврещися, / смиренномудре Симоне. / Темже, не аки сметие, врат вне, / но, яко сокровище, внутрь святыя пещеры положен быти сподобился еси, / и ныне на Небеси Господеви предстоя, / молися о нас, чтущих тя.

 

Преподобный Симон Радонежский

Тропарь, глас 5

Радуйся, пустыне Радонежская, / израстившая крин духовный, / в вертограде преподобнаго Сергия: / Симона, архимандрита Смоленскаго, / познавшаго светлость послушания / и дивнаго птиц видения сподобившагося, / сего воспоминающе, Бога прославляем.

Кондак, глас 2

Возлюбив, преподобне, Божественныя заповеди, / чистотою душевною вооружився, / непрестанною молитвою и трудом в пустыни Сергиевой подвизался еси, / Христа, Сладчайшаго Иисуса, достигл еси, / Егоже моли непрестанно о всех нас.

 

Мученик Василий Мангазейский

Тропарь, глас 8

Богатство видев чистыя души твоея, Василие, украсти тщашеся праведных враг, подусти господина твоего, иже подкраденнаго ради богатства своего предав тя судии, и от того неповинно многия претерпел еси муки, непобедим пребыв до смерти. Тем, яко приемый венец страдания от всех Владыки, моли всем от напастей свободным быти, чтущим любовию память твою.

Кондак, глас 4

Иже новый в мученицех неповинный страдальче, святе Василие, преревновал еси Иосифу Прекрасному и Моисею Угрину во искушениих, за чистоту душевную и телесную муки неповинно претерпел еси. Сих ради прослави тя Бог, и святыя твоя мощи, по явлению твоему, от Мангазеи к Енисею во обитель Святыя Троицы ту сущим настоятелем принесошася, и подают исцеления с верою приходящим и везде призывающим святое имя твое. Страстотерпче святый, моли Христа Бога о православном народе нашем и о всех воих наших, победу и одоление нам на всех непросвещенных иноязычных людех даровати, споборствуя, и от междоусобныя брани спастися всем моли.

 

Блаженный Симон юродивый, Юрьевецкий чудотворец

Тропарь, глас 8

Яко воистину гласа апостольскаго послушатель был еси, блаженне Симоне, Христа бо ради изволив имети буйство, в немже соблюл еси твоя к Богу добродетели, посреде молв некрадомы, терпением убо пачеестественным Христу подражав, посрамил еси льстиваго всю гордыню, тем и в лютых ранах, якоже древний Лазарь, в недра Авраамля преселился еси, идеже и ныне утешаяся, посещай град твой, почитающий любовию святую память твою.

Кондак, глас 4

Возгоревся рачением горним, жестокость вольнаго юродства паче всех сладких мира предпочел еси, отонудуже повинуяся ти огнь, от егоже запаления град твой Юрьевец избавил еси, и воды немокренно, яко по суху, прешел еси, и хотящия быти предрекл еси, прославльшу тя тако Богу, к Немуже моляся, и о нас, поющих тя, блаженне Симоне, поминай.

 

11/24 мая

Равноапостольные первоучители и просветители славянские Кирилл и Мефодий

Тропарь, глас 4

Яко апостолом единонравнии / и словенских стран учителие, / Кирилле и Мефодие Богомудрии, / Владыку всех молите, / вся языки словенския утвердити в Православии и единомыслии, / умирити мир / и спасти души наша.

Кондак, глас 3

Священную двоицу просветителей наших почтим, / Божественных писаний преложением источник Богопознания нам источивших, / из негоже даже доднесь неоскудно почерпающе, / ублажаем вас, Кирилле и Мефодие, / Престолу Вышняго предстоящих / и тепле молящихся о душах наших.

 

Равноапостольный Ростислав, князь Великоморавский

Тропарь, глас 7

Первый в князех народа твоего, Богом вдохновенный, возжелал еси уклонитися от идолослужения, в правой вере познати Бога живаго, Промышлающа о людех Своих. На торжество веры призвах мудрыя учители, иже открыша многоценную жемчужину вечныя жизни, Моравский княже Ростиславе, благословен был еси святыми Кириллом и Мефодием, иже великую любовь к народу явиша, научивше его истинному богопочитанию. На сем камне веры благочестных житием украсился еси. И ныне в обителех Отца Небеснаго молися о нас, да спасет Господь души наша.

Кондак, глас 4

Всем своим сердцем и душею Бога возлюбив, трудился еси со своим народом послужити ему в преподобии и правде во всем житии своем, проводя духовный подвиг. И призвал еси мудрыя учители из Богоспасаемого Константинова Града, иже люди твоя закону Божию и святым писанием научиша, Богу содействующу. Из эллинских словес на словенския совершенно преложиша, писмены их научиша. В них же и мы утвердившеся Богу благодарение возносим, яко не быти нам в невежествии, но разумети, яже Богу угодна суть, и како спасати души наша, жизнь бесконечную, яже на небесех, получити молитвами твоими, княже Ростиславе, и в Церкви православно светлую память твою восхвалим.

 

Священномученик Мокий

Кондак, глас 8

Вооружився щитом веры, / нечестивых ополчения стерл еси, священномучениче, / и венец от Христа взял еси, Мокие, / тем и, со Ангелы радуяся, спасай от бед поющия тя, / моля непрестанно о всех нас.

 

Священномученик Иосиф, первый митрополит Астраханский

Тропарь, глас 6

Святителю богомудре Иосифе, во вся страны поволжския изыде вещание исправлений твоих, темже на Небесех обрел еси мзду трудов твоих, демонов победил еси полки и мучеников достигл еси чины, ихже страданием поревновал еси. Дерзновение имея ко Господу, мир испроси душам нашим.

Кондак, глас 2

Яко звезда пресветлая, возсиял еси, святителю Иосифе, во Астрахани, идеже родился и воспитался еси и за верность Богу и властем законным мученическую смерть приял еси. Мы же, чтуще страдания твоя, зовем ти: святителю Иосифе, от мятежников убиенный, моли Христа Бога о душах наших.

 

Преподобный Софроний, затворник Печерский, в дальних пещерах почивающий

Тропарь, глас 1

Пространна пути, ведуща в пагубу, блаженне Софроние, угонзая, затворился еси в темнем месте пещернем, идеже день и нощь в молитвах и слезах, и в ручном деле подвизаяся, обрел еси вечный живот и наслаждение.

Кондак, глас 4

Явился еси древним отцем ревнитель, в темней пещере светлым житием ясно просияв, и озарил еси сердца поющих тя, богомудре отче Софроние.

 

12/25 мая

Священномученик Ермоген, святейший патриарх Московский и всея Руси

Тропарь, глас 4

Приспе день светлаго торжества, / град Москва радуется, / и с ним Русь Православная ликовствует / песньми и пеньми духовными: / днесь бо священное торжество / в явлении честных и многоцелебных мощей / святителя и чудотворца Ермогена, / якоже солнце незаходимое возсия светозарными лучами, / разгоняя тьму искушений же и бед / от вопиющих верно: / спасай нас, яко предстатель наш, великий Ермогене.

Кондак, глас 6

Темницею и гладом изнуряемь, / даже до смерти верен пребыл еси, блаженне Ермогене, / малодушие от сердец людей твоих отгоняя / и на общий подвиг вся призывая. / Темже и нечестивых мятеж низложил еси и страну нашу утвердил еси, / да вси зовем ти: / радуйся, заступниче Российския земли.

 

Святители Епифаний, епископ Кипрский и Герман, патриарх Константинопольский

Кондак, глас 4

Священноначальник чудную двоицу восхвалим, вернии, по долгу, / с Германом Божественнаго Епифания: / сии бо попалиша безбожных языки, / догматы премудрейшия возложше всем, / православно поющим присно благочестия великое таинство.

 

Преподобный Дионисий Радонежский

Тропарь, глас 4

Благости научився от Вышняго благодати, измлада подвизався благою совестию, Дионисие преподобне, терпения столп был еси и слова Божия проповедник, благочестия догматы утвердив и суеумных мудрования упразднив, темже и пострадал еси за истину, радуяся, образ страдальцем собою показав, но, яко имея дерзновение ко Христу Богу, не престай моляся о нас, любовию чтущих святую память твою.

Кондак, глас 4

Правило веры, столп благочестия был еси, богоносне Дионисие, явив в себе образ и пример преуспеяния добродетели и подвигов: сею евангельскою мрежею многих уловил еси подражателей, подая блестящею на Небеси славою своею ревность к содействованию на пользу правоверных. Темже мы, ныне воспевающе сия, молим тя, да ходатайствуеши о стране нашей и о всем Церкви исполнении.

 

Преподобный Антоний Радонежский (местночтимый)

Тропарь, глас 3

Волю Божию в житии твоем взыскуя, / предречение преподобнаго Серафима / и Небесное призвание чрез святителя Филарета / на служение в Лавру великую приял еси. / Истинный хранитель заветов аввы Сергия быв, / иноков наставник богомудрый / и Лавры благоукраситель искусный явился еси. / Ныне же, предстоя Престолу Святыя Троицы, / преподобне отче Антоние, // моли спастися душам нашим.

Кондак, глас 2

Вышних желая улучити, блаженне, / от юности Христу последовал еси, / подвигом и нравом святых отец ревнуя, / благодать духа мирна стяжал еси. / Сего ради множеству иноков / и всем притекающим к тебе / милостивый отец явился еси. / Темже с любовию вопием ти: / радуйся, Антоние, // Лавры Сергиевы похвале и Церкве Российския украшение.

 

13/26 мая

Мученик Александр Римский

Кондак, глас 4

Яко звезда многосветлая, возсиял еси от Рима, / мучениче Александре, / и, яко бисер многоценный, в земли Византийстей радостно под меч / за Христа главу твою преклонил еси и, / сию непорочное благоухание Богу принесл еси, / да красуется Церковь земная и Небесная / во славе исповедников Христовых.

 

Мученица Гликерия дева

Кондак, глас 3

Деву любящи и Богородицу Марию, / соблюла еси нетленно твое девство, / любовию же ко Господу усердствовавши, / пострадала еси мужемудренно даже до смерти. / Сего ради и сугубым тя, дево мученице, венцем венчает Христос Бог.

 

Преподобномученик Макарий, архимандрит Каневский

Тропарь, глас 4

Христу, нас ради с Небес сошедшему, / последовал еси в подвизех твоих, / Макарие, отче наш. / Егоже моли о нас, ублажающих тя, / прощение прегрешений даровати нам, / любовию же и смирением сердца наша озарити / и спасти души наша.

Иной тропарь, глас 4

Божественным желанием весь сам себе от юнаго возраста Господеви возложив, / явился еси светильник светлый граду твоему, / поучая всех истинней вере и житию богоугодному, / священномучениче Макарие, Овручская похвало. / Сего ради, яко агнец непорочный, гонимый от распрелюбивых врагов, / возшел еси во обитель Каневскую, / идеже, яко пастырь добрый, душу твою положил еси за овцы твоя. / И ныне ко всечестней раце многоцелебных мощей твоих / мы, грешнии, со умилением притекающе, / дар исцеления приемлем, многострадальне: / ты бо присно источаеши болящим здравие, печальным утешение / и всем, чтущим тя, всякое исполняеши требование, / моляся Христу Богу спастися душам нашим.

Иной тропарь, глас 8

Ко всечестней раце многоцелебных мощей твоих, / преподобномучениче Макарие, / мы, грешнии, притекающе, дар исцеления приемлем: / ты бо присно источаеши болящим здравие, печальным утешение / и всех, чтущих тя, всякое исполняеши требование, / молящеся Христу Богу спастися душам нашим.

Кондак, глас 4

Нетленною красотою смиреннаго жития твоего / Бога на земли прославил еси / и Божественныя веры чистоту / сохраняти люди научил еси, / страдальческими же подвиги кончину прием, / от Бога прославлен явился еси, / преподобномучениче Макарие, отче наш.

Иной кондак, глас 2

Постническое и равноангельное житие твое / страдальческими уяснил еси подвиги / и Ангелом совсельник, Богоблаженне, явился еси, Макарие, / с нимиже Христу Богу моляся не престай / о всех нас.

 

Преподобные Амфилохий, Макарий, Тарасий и Феодосий, Глушицкие чудотворцы

Тропарь, глас 8

Святильники светлыя явльшеся, доброту земную мудренно оставльше и идоша во внутреннюю пустыню, Амфилохие, Макарие, Тарасие и Феодосие, смирение и всякую добродетель извыкше, и обретоша безсмертие, постом и бдением и прочим воздержанием себе приносяще Христу, и ныне на Небесех Престолу Христову предстоите. Молите, отцы богомудрии Амфилохие, Макарие, Тарасие и Феодосие, умирити мир и спастися душам поющих вас и согрешений оставление даровати чтущим всечестную память вашу.

Кондак, глас 2

Яко незаходимая светила мысленнаго Солнца, просветисте вселенную и верных души и телеса лучами ваших озаряюще, независтно подаваете от недуг исцеление. Темже, сошедшеся, верою вас в песнех восхваляем, яко наши премудрыя наставники и к Богу ходатаи, и непрестанно вопием: радуйтеся, отцы богомудрии Амфилохие, Макарие, Тарасие и Феодосие.

 

Праведная дева Гликерия Новгородская

Тропарь, глас 8

Вышния красоты желающи, нижния сласти телесныя далече от себе отринула еси и, нестяжание паче суетнаго мира возлюбивши, ангельское житие провождала еси, Гликерие, дево блаженная, моли Христа Бога спастися душам нашим.

Кондак, глас 3
Веселися, Великий Новград, великое сокровище стяжав, мощи твои, святая праведная дево Гликерие, благодать исцелений подающия всем с верою и любовию приходящим к ним. И ныне предстоя с ликом святых жен русских пред Престолом Святой Троицы, молися оставление грехов даровати чтущим святую память твою.

 

14/27 мая

Мученик Исидор Хиосский

Тропарь, глас 4

Мученик Твой, Господи, Исидор / во страдании своем венец прият нетленный от Тебе, Бога нашего: / имеяй бо крепость Твою, / мучителей низложи, / сокруши и демонов немощныя дерзости. / Того молитвами / спаси души наша.

Кондак, глас 8

Управитель превеликий вселенней ты явился еси, святе, / твоими к Богу молитвами, / темже воспеваем тя днесь, / мучениче Богомудре, / Исидоре преславне.

 

Блаженный Исидор, Христа ради юродивый, Ростовский чудотворец

Тропарь, глас 4

От земли Воззвавый тя на вечныя обители, соблюдает и по смерти тело твое невредимо, святе Исидоре, ты бо в целомудрии и чистоте жития пожил еси, блаженне, не осквернив своего телесе, темже со дерзновением моли Христа Бога спастися душам нашим.

Иной тропарь, глас 4

Просветився Божественною Благодатию, богомудре, целомудрием многим и терпением во временней жизни течение добре скончал еси. Тем и по смерти яви тя светлость жития твоего: источаеши бо исцелений благодать иже с верою притекающим ко святому твоему  гробу, Исидоре блаженнее, моли Христа Бога, да спасет душы наша.

Кондак, глас 8

Взбранному и дивному в праведницех, иже убо от Христа дар чудес приимшему, похвальныя ныне принесем глаголя, но яко имея дерзновение ко Святей Троице, Юже моли избавитися от бед рабом твоим, да зовем ти: радуйся, богомудре Исидоре.

 

Преподобный Никита, затворник Печерский, епископ Новгородский

Тропарь, глас 2

Небеснаго пространства желая, / от юности в тесне месте затворился еси, / в немже прельщен быв от врага, / паки смирением и послушанием победил еси прелестника крепце, Никито, / и ныне, предстоя Христови, / моли спастися всем нам.

Кондак, глас 1

Победив вражия лести добле / и светло добродетельми просияв, / святительства одеждою облеклся еси, преславне Никито, / в немже светом жития твоего и чудесы сияя паче солнца, / многих просветив, привел еси Христови, / Егоже моли о нас, поющих тя.

 

15/28 мая

Святитель Исаия, епископ Ростовский

Тропарь, глас 2

В иноцех святыя лавры Печерския благоискусен показавыйся и во архиерейстем сане добр пастырь своему стаду, боголюбезне Исаие, бывый, моли о нас Пастыреначальника Христа Бога, да помилует и спасет души наша.

Кондак, глас 4

Своего епископска сана тезоименитство храня, сирых, вдовиц и всех, зле страждущих, сам собою посещал еси любезне и, милостынею довольне тех ущедряя, яко отец, сподобился еси Анеглы на освящение церкве Печерския, святителю Исаие, принесен быти чудне, с нимиже молися Господеви о душах наших.

 

Преподобный Пахомий Великий

Тропарь, глас 8

Слез твоих теченьми пустыни безплодное возделал еси, / и иже из глубины воздыханьми во сто трудов уплодоносил еси, / и был еси светильник вселенней, / сияя чудесы, Пахомие отче наш, / моли Христа Бога спастися душам нашим.

Кондак, глас 2

Светильник светел показался еси в концех, / пустыню же грады сотворил еси множествы монашескими, / сам себе распен, крест твой на рамо взем, / и воздержанием тело изнурил еси, / моля непрестанно о всех нас.

 

Благоверный царевич князь Димитрий Угличский

Тропарь, глас 4

Царскую диадиму обагрил еси кровию твоею, / Богомудре мучениче, / за скиптр Крест в руку приим, / явился еси победоносец, / и жертву непорочну Владыце принесл еси себе: / яко бо агнец незлобив, от раба заколен еси. / И ныне, радуяся, предстоиши Святей Троице, / молися о державе сродников твоих богоугодней быти / и сыновом российским спастися.

Иной тропарь, глас 2

Яко благочестиваго корене Боголюбивый произыде плод, / яко агня незлобиво, неповинно во младенстве заклан бысть / от властолюбца вкупе и злаго раба. / Тем, яко златыми крылы, / душевною чистотою и младенческим незлобием / к Небесней высоте возлетел еси, страстотерпче Димитрие. / И ныне кровь твоя от земли тайно вопиет к Богу, / яко Авеля праведнаго. / Сего ради покланяемся верою ти, / славяще прославльшаго тя Бога, / Егоже моли стране нашей благоугодней быти / и сыновом русским спастися.

Иной тропарь, глас 1

Всеоружеством Духа благодати вооружен быв / и необорим столп и утверждение отечеству своему показася, / яко агнец незлобивый, от врага неправедно заклан быв / и в жертву непорочну Господеви принесеся. / И ныне дар благодати от всех Подвигоположника прием, / источаеши всем исцеление, достохвальне благоверный царевичу княже Димитрие. / Слава Восприимшему тя от земных в Небесная, / слава Венчавшему тя венцем неувядаемым, / слава Действующему тобою всем исцеление.

Кондак, глас 8

Возсия днесь в славней памяти твоей верным веселие, / яко бо доброрасленный грезн, прозябл еси / и Христу красен плод принесл еси себе; / темже и по убиении твоем соблюде тело твое нетленно, / страдальчески обагреное кровию. / Благородне святе Димитрие, / соблюдай отечество твое и град твой невредим, / тому бо еси утверждение.

 

Преподобный Евфросин Псковский

Тропарь, глас 4

Изволением Божественнаго разума вселися в пустыню и тамо вперив свой ум в Небесныя обители и равно Ангелом житие пожив на земли, в молитвах, и трудах, и в пощении образ быв своим учеником. Темже Бог, видев твое благое изволение, умножи тебе чада в пустыни, слез твоих тучами напаяема, но, яко имея дерзновение к Богу, поминай стадо свое, еже собрал еси, мудре, и не забуди, якоже обещался еси, посещая чад своих, Евфросине, преподобне отче наш.

Кондак, глас 8

Божиим светолитием просвещен, отче, постническое стяжав жительство, преподобне, иноком предобрый наставниче и постником благое украшение. Сего ради Господь, труды твоя видев, даром чудес обогати тя, источаеши бо исцеления. Мы же, радующеся, вопием ти: радуйся, отче Евфросине, иноком удобрение.

 

16/29 мая

Преподобный Феодор Освященный

Тропарь, глас 1

Пустынный житель, и в телеси Ан­гел, / и чудотворец явился еси, Богоносе отче наш Феодоре: / постом, бдением, молитвою небесная дарования приим, / исцеляеши недужныя и души верою при­текающих ти. / Слава Давшему тебе крепость, / слава Венчавшему тя, / слава Действующему тобою всем исцеления.

Кондак, глас 2

В дому Божии, яко финикс, процвел еси, / плоды же добродетелей Господеви принесл пощением изрядным, / отче преподобне, / темже и ублажаешися, / яко Безплотных равностоятелен.

 

Преподобный Ефрем Перекомский, Новгородский

Тропарь, глас 4

От юности твоея весь Богови поработился еси, блаженне, / и Того ради любве отечество и род оставил еси, / в пустыню вселився, / в нейже жестокое житие показав, / и чудес дарования от Бога приял еси, / Ефреме преподобне. / Моли Христа Бога, да спасет души наша.

Кондак, глас 8

Ангельскому житию поревновав, преподобне, / вся земная оставив, ко Христу притекл еси / и, Того заповедьми ограждся, / явился еси столп непоколебим от вражиих нападаний. / Тем зовем ти: / радуйся, Ефреме, светило пресветлое.

 

Преподобный Матфей, Яранский Чудотворец (местночтимый святой Вятской епархии)

Тропарь, глас 1

От юности твоея Христа возлюбивый/ и всею душею Его взыскавый,/ заповеди Божии неленостно соблюдый:/ постом, молитвою и смирением милость Господню обретый;/ стяжал еси благодать исцелений, отче преподобне Матфее;/ темже добрый утешитель был еси к тебе притекающим с верою;/ ныне Христу дерзновенно молися:/ о граде Яранске и людех земли Вятския,/ даровати нам веры отеческия утверждение/ и душам нашим спасение.

Кондак, глас 8

Чистотою жития твоего Господу угодил еси,/ дар непрестанныя молитвы стяжал еси,/ избранниче Божий, преподобне Матфее, Яранский чудотворче;/ мы же, чтуще святую память твою,/ с любовию вопием ти:/ моли Христа Бога спастися душам нашим.

 

17/30 мая

Апостол от 70 Андроник и святая Иуния

Тропарь, глас 3

Апостоли святии, / молите Милостиваго Бога, / да прегрешений оставление / подаст душам нашим.

Кондак, глас 2

Звезду пресветлую, / Богоразумия светом просвещшаго языки / апостола Христова Андроника восхвалим / и с ним во благовестии потрудившуюся Иунию премудрую, вопиюще: / молите Христа Бога непрестанно о всех нас.

 

Преподобная Евфросиния, в миру Евдокия, великая благоверная княгиня Московская

Тропарь, глас 5

От юности предызбранная Богом угоднице, / оставльши светлый чертог княжеский, / уклонилася еси во обитель, тобою созданную, / и, пучину житейскаго моря преплывши, / ныне со Ангелы песнословиши Христа Бога. / Емуже непрестанно молися, преподобная, / яко да сохраняет выну обитель, тобою созданную, / и дарует нам мир и велию милость.

Иной тропарь, глас 8

По земнем вдовстве Небесному Жениху себе уневестивши / и в княжестем чертозе подвижнически поживши, / послежде и чертог, и чад твоих / Бога ради оставила еси, преподобная Евфросиние, / и вшедши во обитель, тобою созданную, / и во иночестем образе многи подвиги показала еси, / и святое твое житие по благодати Божией блаженною кончиною увенчала еси. / И ныне предстоящи Христу Богу, / моли спастися душам нашим.

Кондак, глас 2

Вся красная мира сего, яко суетная, презревши / и тело твое постом и бдением изнуривши, / непрестанными молитвами Богу угодила еси, / преподобная Евфросиние, / и, дар исцелений от Него прияти сподобльшися, / слепому прозрение / и многим недужным исцеление даровала еси. / Темже радостно взываем, глаголюще: / слава Богу, прославляющему святыя Своя.

 

Праведный Иона (Атаманский) протоиерей, Одесский

Тропарь, глас 8

Православия ревнителю, / раскола и ереси искоренителю, / Одесский целебниче и к Богу теплый молитвенниче, / житием и чудесы твоими уподобился еси Кронштадтскому чудотворцу, / Ионо праведный, // моли Христа Бога спастися душам нашим.

Кондак, глас тойже
Многоразличные подвиги жития твоего кто исповесть? / Многообразные милости Божия тобою явленнные кто исчислит? / Дерзновение же твое у Всещедраго Бога и Пречистыя Богородицы добре ведуще, / во умилении сердечнем зовевм ти: / не лиши и нас твоея помощи и заступления, // пастырю Христов и чудотворче Ионо.

 

18/31 мая

Мученик Феодот Анкирский и мученицы Текуса, Александра, Клавдия, Фаина, Евфрасия, Матрона и Иулия

Кондак, глас 2

Страдальчески подвизався добре, со сострадальцы твоими, Феодоте, / и венцы почести приясте с честными страстотерпицами девами. / Темже Христа Бога молите непрестанно о всех нас.

 

Преподобный Макарий (Глухарёв) архимандрит, миссионер Алтайский

Тропарь, глас 4
Христовою любовию подвизаемь, благовестити веру истинную пришел еси народом Алтайским, преподобне, отче наш Макарие, словом и житием тех наставляя, привел еси многих ко спасению,/ егоже сподоби и нас молитвами твоими.

Кондак, гл. 3
Языческаго зловерия избегше, проповедию твоею Творца светов познахом. Ему же в Троице покланяющеся,/ молим тя, равноапостольне Макарие, сохраняй чада твоя в истинней вере Христовой предстательством твоим пред Богом.

 

19 мая/1 июня

Священномученик Патрикий, епископ Прусский

Кондак, глас 4

Яко светосиянен добротою священства / и мучения кровию преукрашен, / с пострадавшими с тобою, Патрикие, Христу предстоя, / о нас поминай, / яко страдалец честный.

 

Священномученик Онуфрий (Гагалюк), архиепископ Курский и Обоянский

Тропарь, глас 2

Яко сосуд священный Духа Божественнаго, / столп и светильник Церкве Православныя воистину явился еси, Священномучениче Онуфрие, / егда вся спира богоборцев земли нашея, / злобою ада дышуща, / разорити Церковь Божию устремишася. / Ты же, со множеством исповедников Христовых / землю сибирскую костьми своими устилаху, демонскую дерзость гонителей беззаконных посрамил еси. / Ныне, о всеблаженне, / со всеми страстотерпцы Святой Руси, / в Церкве Небесней торжествующе, / Моли Вземлющего грехи мира / спастися душам нашим.

Кондак, глас 8

Святительскою благодатию светло облечен, / яко Исаак целомудренный, / священнодействовати своею кровию Пастыреначальнику Христу славно предтекл еси, / Онуфрие богомудре, / Церковь Святую, злобою ересей и расколов злочестивых снедаемую, / и богоборцами разоряему, яко Невесту Христову, страданьми доблесне защищая, / путь верным к Божественному богомудрию ученьми твоими облистал еси, / яко страж недремлющий и верный друг Христов.

 

Преподобный Корнилий Комельский, Вологодский чудотворец

Тропарь, глас 4

От юности горящим желанием Божественныя любве разжигаемь, / житейския молвы оставил еси, преподобне, / ревнитель Антонию Великому быв, / безмолвием и жестоким пребыванием последуя Христу, / бдением, и молитвами, и постом образ был еси твоим учеником. / Темже молися Господеви, Корнилие блаженне, / спастися душам нашим.

Иной тропарь, глас 8

Постническими труды нетрудную жизнь стяжа, преподобне, / слезами же мысленнаго фараона потопил еси / и вместо скорби радость обрел еси, / предстоя Христови в лице святых, / поминай молящихся чад твоих, Корнилие, отче наш.

Кондак, глас 8

Господеви, от Святыя Девы возсиявшу мирови, / и Тому из млада яко ангел послужил еси, блаженне, / и силою Его пустыню яко град сотворил еси, / множество же ученик в ней собрал еси, / ихже богодухновенными ученьми просветил еси. Тем вопием ти: / радуйся, отче наш Корнилие, иноком божественное удобрение.

 

Преподобный Корнилий, игумен Палеостровский, Олонецкий

Тропарь, глас 5

От юности, премудре, прилежно подвизався, от Бога наставляем, отечество свое оставль – град Псков, и вселися в пустыню, во отоце великого озера Онега, иноки собра мудре и извещением Святаго Духа обитель согради и храм созда Пресвятей Богородицы в похвалу Рождества Ея, струями же слез твоих безплотныя враги погрузил еси и жития твоего целомудрием со ангельскими лики совокупися, преподобне отче Корнилие, с ними же Христа Бога моли спастися душам нашим.

Кондак, глас 3

Яко Ангел во плоти, на земли показася, пощением насажден быв, преподобне отче Корнилие, наставник иноком многим был еси, сего ради вопием ти: моли Христа Бога спастися душам нашим.

 

Преподобный Сергий Шухтомский

Тропарь, глас 8

Бденными молитвенная патоки слезными пустыню напоил еси и из глубины воздыханьми ю расплодил еси и бысть постнически равно Ангелом житие твое; страдальчески бореньми, яже от бесов и от ненаказанных человек, претерпел еси, и Ангелом собеседник явися, Божественнаго винограда насеятель быв; и, оставив временное житие, преселился еси в жилище Небесное. Темже тя почитаем, преподобне отче наш Сергие, моли Христа Бога спастися душам нашим.

 

Преподобный Игнатий Вологодский, в миру благоверный князь Иоанн Угличский

Тропарь, глас 2

В житии своем многи скорби претерпел еси, блаженне, и терпения ради венец от Бога приял еси, и по смерти своей чудотворец показался еси, того ради память твою песньми почитаем, преподобне отче наш Игнатие, молися, предстоя Святей Троице, державе сродник твоих богоугодней быти и сыновом Российстем спастися.

Кондак, глас 8

Чисто житие на земли пожил еси, душу и тело без скверны соблюдал еси и терпения ради своего мзду восприял еси. И ныне на Небесех со Ангелы веселяся, преподобне отче Игнатие, молися непрестанно Христу Богу о всех нас, почитающих память твою и притекающих к раце мощей твоих.

 

Благоверный великий князь Московский Димитрий Донской

Тропарь, глас 3

Велика обрете в бедах тя поборника земля Русская, / языки побеждающа. / Якоже на Дону Мамаеву низложил еси гордыню, / на подвиг сей прияв благословение преподобнаго Сергия, / тако, княже Димитрие, / Христу Богу молися, / даровати нам велию милость.

Кондак, глас 2

Подвиги твоими, святе Димитрие, / страну нашу Бог сохрани, / давый тебе силу непобедимую. / И ныне, предстателю крепкий, / соблюдай молитвами святыми / град твой Москву невредим / от всех навет вражиих.

 

Собор святых новомучеников Белгордских

Тропарь, глас 4

Земли нашея Белоградския / новомученицы и исповедницы: / святителие Никодиме, Онуфрие и Антоние, / с вами же – иерее, диакони и миряне благочестивии, / в житии своем светом Христовым просиявшии, / за Негоже добре страдавшии и венчавшиися, / и ныне нас, во трудех и службах сущих, / предстательством своим вразумляющии и укрепляющии / ко возрождению и возвышению Православия! / Христа Бога молите / мир и благоденствие Отечеству нашему даровати / и душам нашим — велию милость.

Кондак, глас 8

Избранных святителей и мучеников Божиих / достойнии сонаследницы, / яко приявшии благодать победительную, / нам, ныне во странствии сущим / премудрость и силу от Господа испросите, / да благодарственно к вам взываем: / радуйтеся, земли Белоградския похвало и утверждение!

 

Собор новомучеников земли Слободской

Тропарь, глас 4

Якоже столп непоколебимый, / священномучениче Александре, / прещения мучителей не устрашился еси, / аще и в гноище низвержен суще, / Божественною ревностию со священномучеником Константином и всеми страстотерпцы края Слободскаго / богомерзкую прелесть посрамили есте. / Тем же вас, новомученицы предивнии, / Владыка Неба и земли / Божественною десницею венчает / и в Царствии Небесном священнодействовати дарует. / Егоже молите спастися душам нашим.

 

20 мая/2 июня

Мученик Фалалей

Кондак, глас 3

Мучеником сострадалец явлься и оружник, / воин изрядный Царя славы был еси, / искушеньми и мукою возвышение идолослужителей попрал еси, / сего ради честную твою поем память, / мудре Фалалее.

 

Святитель Алексий, митрополит Московский и всея России чудотворец

Тропарь, глас 2

Яко сокровище пребогатое, многодетно в земли сокровенное, / честныя мощи твоя обретошася чудоточащия, / всеблаженне отче святителю Алексие: / от нихже врачевство приемлюще, обогащаемся / и Христа славословим, глаголюще: / слава прославляющему святыя Своя.

Иной тропарь, глас 4

Апостольских преемников архиереев сопрестольниче, / России всея пастырю и учителю, / всеблаженне отче Алексие, / Владыце всех молися / мир пастве твоей даровати, / и спасение душам, / и велию милость.

Кондак, глас 8

Яко солнце незаходимое, от гроба возсия нам / от мног лет сокровены честныя твоя мощи нетленны, / святителю Алексие, / тобою благодать приемлем: / всю бо страну сию и вся ны чудесы и добротою обогощаеши, / действом благодати, да поем ти: / радуйся, отче, светило России.

Иной кондак, глас 3

Яко светоносная память святителя / всем разруши уныние / и свет облиста Небесных даров, / всех созывающи на веселие: / от Бога бо, святителю Алексие, благодать обрете прогонити недуги / и вся человеки исцеляти, / и мнихом же степень показася.

 

Благоверный князь Довмонт, во святом крещении Тимофей, Псковский чудотворец

Тропарь, глас 4

Иже отчее нечестие возненавидев, преблаженне княже Довмонте, и нощи страстныя избег, еже к идолам тщание, прииде мыслию к Солнцу славы – Христу, озарився благодатию Божественнаго крещения, и ныне во свете Пресвятыя Троицы предстоя, моли Хрсита Бога сохранити и спасти православныя люди и град твой от безбожных агарян, и латин нашествия, и междоусобныя брани и спастися душам нашим.

Кондак, глас 8

Любовию Христовою уязвися, преблаженне княже Довмонте, ум вперив зарею Духа, идольскую прелесть отеческаго нечестия возненавидев, порождением святыя купели Тимофей наречен еси, слезами и милостынею ко Христу присвоився, и жизни сей течение добре скончав, веру непорочну соблюд, и ныне молим тя: моли Пресвятую Троицу и Пречистую Богородицу за град Псков и за всех, притекающих к раце мощей твоих, избавитися нам от всяких зол, да тебе вси, яко тепла заступника, непрестанно почитаем.

 

21 мая/3 июня

Равноапостольные царь Константин и матерь его, царица Елена

Тропарь, глас 8

Креста Твоего образ на Небеси видев / и, якоже Павел, звание не от человек прием, / в царех апостол Твой, Господи, / Царствующий град в руце Твоей положи, / егоже спасай всегда в мире молитвами Богородицы, / Едине Человеколюбче.

Кондак, глас 3

Константин днесь с материю Еленою / Крест являют, всечестное древо, / всех убо иудеев посрамление суще, / оружие же на противныя верных людей: / нас бо ради явися знамение велие / и во бранех грозное.

 

Благоверный князь Константин и чада его, Михаил и Феодор, Муромские чудотворцы

Тропарь, глас 4

Константин днесь весело ликовствует, / пpедстоя пpестолу Пpесвятыя Тpоицы, / видя отечествие свое, мастию духовною сияющее; / емуже последоваша Михаил и Феодоp, сынове его, / и молятся вси тpие вкупе о душах наших.

Кондак, глас 8

Изрядному воеводе и правоверному князю Константину с сынома его вкупе / отечество его, хваляся, вопиет, / имеющее его начальника и заступника, / яко избавльшееся им от прелести и скверны идольския. / Сего ради вопием ему сице: / радуйся, княже Константине преблаженне.

 

Преподобный Кассиан Грек, Угличский чудотворец

Тропарь, глас  4

Ветхаго Рима имея воспитание, державу отечества своего, град Мангупский оставль, и нивочтоже вменил еси княжение и славу маловременную суетнаго века Христа ради, и паче земнаго богатства избра богатство себе небесное и славу вечную возвысив ум свой к Богу, и житие свое со Ангелы вожделел еси восприяти, промышлением Божественнаго разума направляема, и богоспасаемаго Углеча града достигл еси, и близ в пределех области его, над Волгою рекою, в пустыню вселився, и обитель преславну в честь Божия Матере воздвигл еси, и в ней тело свое предложив, яко дар освящен. Тем молим тя, отче Кассиане, моли Христа Бога да спасет души наша.

Кондак, глас 8

Яко светозарная звезда пришел еси от востока на запад, оставль отечество и княжение твое Христа ради, и в царствующий град Москву пришел еси, и, промышлением Божественнаго разума направляемь, Углеча града достигл еси, и, близ его, над Волгою рекою, в пустыни Учме вселився, обитель сотворил еси, и церковь созда, и созва монахов во спасение; с нимиже моли о нас, чтущих память твою, да зовем ти: радуйся, преподобне отче Кассиане.

 

Преподобный Моисей (Чигвинцев) архимандрит, Уфимский

Тропарь, глас 5
О
т юности Христа возлюбив, преподобне, Тому Единому всем сердцем поработати возжелев, отеческий дом оставив и града Уфы достиг. Серафима Саровского подражателю, сомолитвенниче Ангелов, равностоятелю ликов постников, Свыше от Бога приемый благодать духовную, дары предвидения и исцеления. Земный ангеле и небесный человече, преподобне отче Моисее, моли человеколюбца Бога спастися душам нашим.

Ин тропарь преподобному Моисею, писан к прославлению:
Преподобне отче Моисее, мира красоты и сладость временныя отнюдь возненавидел еси. Монашеское житие паче возлюбив, ангелом собеседник быти сподобился еси и светильник многосветлый Уфимския земли чудесами якоже второе солнце сияя. Но всех нас поминай, совершающих священную память твою, мы бо чада твои и овцы словесных твоих учений, и тя на помощь призываем просяще тобою прияти мир и велию милость.

Кондак, глас 3
Воспоим, празднолюбцы, светильника пресветлаго, озарившаго землю сиянием Слова Божия: точит бо исцеления притекающим к мощем его и вся прошения верных во благо исполняет. Сего бо мы предстоятеля неусыпнаго имуще, прославляем Господа, дивнаго во Святых своих.

Иной кондак, глас 6
Преподобне отче Моисее, мира сладости отреваяся, преплыл еси житейское море, Кормчим имея Господа, и с собою многих ко спасению привел еси, наставляя и поучая пребывати в любви Христовой. Темже молим тя: не отрини наша моления, но у Престола Божия молися непрестанно, в любви Божией нам присно пребывати.

 

Обретение мощей прав. Павла (Стожкова) Таганрогского

Тропарь, глас 3

Яко сокровище пребогатое, от мног лет сокровенны честныя мощи твоя обретошася, чудеса источающия, старче Павле блаженне, от нихже исцеления приемлюще, радостно Христа прославляем, глаголюще: слава Тебе Богу нашему, прославляющему святыя Своя.

Ин тропарь, глас 8

Днесь всякая душа верных веселится, почитающи обретение честных мощей твоих, старче блаженне: яко слепыя просвещаеши, немым уста отверзаеши и печальныя утешаеши, приял бо еси от Христа Бога благодать исцелений, темже вопием ти: молися о душах наших.

Кондак, глас 3

Возсия, Господи, граду Твоему Таганрогу, яко светозарное солнце угодник твой Павел, радостно вселенную озаряя своими чудесы, и приходящих с верою ко гробу его святому: тако молитвами Пречистыя Владычицы нашея Богородицы от бед всех нас избави и грехов оставление подаждь, яко мы, людие Твои, Господи, и град наш и страна вельми Тобою хвалится, и спасется молитвами блаженнаго старца Павла.

Ин кондак, глас 4

Днесь град Таганрог веселится, созывая вся верныя светло праздновати память твою, святый блаженный старче Павле, и мы ныне, духовно ликовствующе, радостно славим тя и молим: предстоя престолу Святыя Троицы, не забуди нас недостойных, якоже обещался еси, и молися всем нам спастися.

 

22 мая/4 июня

Мученик Василиск

Тропарь, глас 4

Мученик Твой, Господи, Василиск / во страдании своем венец прият нетленный от Тебе, Бога нашего: / имеяй бо крепость Твою, / мучителей низложи, / сокруши и демонов немощныя дерзости. / Того молитвами / спаси души наша.

Кондак, глас 8

Во страдании крепок и мужествен явился еси и в чудесех предивен, / явленно Христово имя преднося, мучителя посрамил еси. / Тем тя почитаем, Василиске, присно зовуще, всечестне: / радуйся, мучеников светлая доброто.

 

Праведный Иаков Боровичский, Новгородский чудотворец

Тропарь, глас 1

Божественною благодатию просветився, / и по смерти даруеши исцеление / притекающим к тебе, премудре Иакове: / темже и мы ныне чтим честных мощей пренесение, / веселяще вкупе души и телеса. / Тем вси вопием: / слава Давшему ти крепость! / Слава Венчавшему тя! / Слава Действующему тобою всем исцеления!

Кондак, глас 8

Верою и любовию твое честное пренесение празднующих, блаженне, / сохрани и соблюди от всякия злобы и соблазна змиина, / имаши бо дерзновение ко Владыце всех Христу Богу. / Егоже моли спасти православныя люди, / молящия тя, да вси вопием ти: / радуйся, отче Иакове, / всея Российския земли удобрение.

Иной кондак, глас 8

Яко звезда многосветлая, отче, на востоце возсия, / к западу пришел еси, блаженне, во твое принесение, / яко солнечная луча, испущаеши исцеления притекающим к раце мощей твоих, / молися Христу Богу спасти православныя люди, молящиеся ти, / да вси вопием ти: / радуйся, Богомудре Иакове.

 

23 мая/5 июня

Святитель Леонтий

Тропарь, глас 4

Апостолом сопричастник / и к Богу молебник верен, / добродетельми возшед на Небесная, / и любовь возложил еси к Любящему тя, / и неверныя люди обратил еси в веру. / Тем ныне, со Ангелы ликуя, / предстоиши престолу славы всех Царя Христа Бога: / молися, святителю Леонтие, / да спасет души наша.

Кондак, глас 4

Жития ради чистоты, / Всевидец Господь свет Свой насади в души твоей, / вразумити люди многия / твоими учении, / Леонтие преподобне.

 

Преподобная Евфросиния, игумения Полоцкая

Тропарь, глас 4

Подражающи дванадесятолетна дванадесятолетну Христу учившему во святилищи Божию слову, последовала еси, Евфросиние. Славу временную и земнаго обручника оставльши и вся мирская презревши, краснейшему паче всех Христу себе уневестила еси, крест вземши, путем анегльскаго жития шествующи и многия к Нему наставляющи, во благоухании мира в небесный чертог востекла еси, идеже моли, Егоже возлюбила еси, о чтущих благочестно память твою.

Кондак, глас 4

Превитавши от земли Полоцкия, отечество свое, яко Авраам, наследовавши, Евфросиние, землю высоку сообразну – Горний Сион, страданием постным яко жертву приносила еси милосердием своим, Давшему Себе за человеки Жертву благоприятну.

 

Преподобный Паисий Галичский

Тропарь, глас 8

Днесь возсия нам память твоя, славне Паисие, яко солнце светозарное, лучами озаряющи весь мир, тако и ты, преподобне, чудесы своими тьму нощи злых духов от нас отгоняя; днесь Небесныя силы, и святых Ангел, и души праведных мысленно торжествуют радующеся. Днесь и мы, грешнии, припадающе к честному твоему образу молимся: о преподобне Паисие, Христа Бога моли непрестанно спасти град и люди иже тебе почитающия.

Кондак, глас 3

Возсия, Господи, граду твоему Галичу, яко светозарное солнце, угодник Твой Паисий, радостно вселенную озаряя своими чудесы, и приходящих с верою ко гробу его святому; тако молитвами Пресвятыя Богородицы от бед всех нас избави, и упраздни варварския шатания, яко мы, людие твои, Господи, и град наш и страна вельми Тобою хвалится, и спасается молитвами преподобнаго Паисия.

 

Собор Ростово-Ярославских святых

Тропарь, глас 4

О благочестный соборе, / о людие избраннии, / святителие преподобнии и праведнии, / и благовернии граждане российстии, / яко звезды, на тверди церковней / страны Ростовския и Ярославския к Богу предстателие, / величаем с любовию вас, по плоти наших сродников. / Вы же молитеся даровати мир стране и Церкви нашей, / благословение и милость Божию всем людем, / всепрощение и спасение, / ходатаи бо есте приснии о нас ко Святей Троице.

Тропарь святителям Ростовским, глас тойже

Святителие премудрии, / паствы вашея учителие богопросвещеннии, / веру евангельскую в людех преумножившии, / любве Небесныя на земли достоподражательнии образи, / люди страны Ростовския и Ярославския приобщавшии спасению, / служителие воистинну Божии / и сопричастницы апостолов достойнии явилися есте, / Леонтие священномучениче, Исаие, Игнатие, Иакове, Феодоре / и златословесниче Российский Димитрие, / Христа Бога молите / о архиереех, на престоле вашем преемницех, / о людех, благочестно вас почитающих, / о стране нашей православней / и о всей Христовей Церкви.

Кондак, глас 4

Новаго Завета Бога с человеки хранителие, / евангельских заповедей исполнителие, / в добрых делех совершеннии, / святителие мудрии, преподобнии и праведнии Богоноснии, / землю Ростовскую и Ярославскую / облагоухавшии молитвами, / именуемии вси и неименуемии, / явленнии и сокровеннии, / предстояще Живоначальней Троице, / не отступайте от нас духом / и Божественное милосердие преклоните к нам, / да с дерзновением славу Вышних Богу вси приносим, / да пребудет на земли мир нерушимый, / любовь же и благоволение / посреде всех человек.

 

24 мая/6 июня

Преподобный Симеон Столпник, Дивногорец

Тропарь, глас 1

Пустынный житель, и в телеси Ангел, / и чудотворец явился еси, Богоносе, отче наш Симеоне, / постом, бдением, молитвою Небесная дарования приим, / исцеляеши недужныя и души верою притекающих ти. / Слава Давшему тебе крепость, / слава Венчавшему тя, / слава Действующему тобою всем исцеления.

Кондак, глас 2

Вышняя желая, дольная отложив, / и, яко небо, столп соделавый, / тем облистал еси чудес зарею, преподобне, / и Христу, всех Богу, молишися непрестанно о всех нас.

 

Преподобный Никита, столпник Переяславский

Тропарь, глас 4

Православным смыслом юношская возжеления возненавидев / и доблественныя нравы восприим, врага победил еси, / и во благоразумии Богу угодил еси, / и свыше от Него прием дар чудес, / бесы прогоняти, недуги исцеляти, / Никито преславне, / моли Христа Бога, да спасет души наша.

Иной тропарь, глас 4

Христову мученику тезоименит был еси, преподобне, / многи подвиги и труды претерпел еси Христа ради, / Егоже ради вериги носил еси, блаженне, / Того ныне о нас моли, Никито преподобне, / душевныя наша и телесныя страсти уврачевати, / иже верою и любовию / почитающих присно память твою.

Кондак, глас 8

Христа ради от твоих рабов нуждную смерть претерпел еси / и венец нетления от Него восприял еси, / приходящим же с верою от честнаго твоего гроба подаеши цельбы, / о Никито преподобне, / молитвенниче о душах наших.

 

25 мая/7 июня

Третье обретение честной главы честного и славного Пророка, Предтечи и Крестителя Господня Иоанна

Тропарь, глас 4

Яко Божественное сокровище, сокровенное в земли, / Христос откры главу твою нам, пророче и Предтече. / Вси убо, сошедшеся в сея обретение, / песньми богоглаголивыми Спаса воспоим, / спасающа нас от тления молитвами твоими.

Кондак, глас 6

Светоявленный и Божественный в мире столп, / солнца светильник, / Предтеча, главу светоносную и Божественную свою показавый в концех, / освящает той верно покланяющихся и взывающих: / Христов премудрый Крестителю, спаси всех нас.

 

26 мая/8 июня

Преподобный Макарий, Калязинский чудотворец

Тропарь, глас 2

Яко древо насаждено при водах воздержания, / струями слез твоих напаяемь, / преподобне отче Макарие, / сеяв бо со слезами, в радости жнеши добродетельныя рукояти, / тем Великий Мздодавец плоды трудов твоих прият / и в житницах Небесных тя сокровище положи, / но поминай чтущих любовию пресветлую память твою / и моли Святую Троицу, преподобне Макарие, / спастися душам нашим.

Иной тропарь, глас 8

Плотская мудрования, отче Макарие, / воздержанием и бдением умертвил еси, / место бо, на немже поты твоя излиял еси, / яко труба вопиет к Богу, / поведающи твоя исправления, / и по смерти честныя твоя мощи источают исцеления. / Темже вопием ти: / моли Христа Бога, да спасет души наша.

Иной тропарь, глас 8

Слез твоих теченьми пустыни безплодное возделал еси / и иже из глубины воздыханьми во сто трудов уплодоносил еси, / и был еси светильник вселенней, сияя чудесы, / Макарие отче наш, моли Христа Бога / спастися душам нашим.

Кондак, глас 2

Вышних желая, воздержанием, и труды, и поты насладився, / желание плоти твоея обуздав, / чудес дар прием от Христа Бога, / светильник явился еси пресветлый. / Темже Христова Церковь песньми славит тя, / преподобне Макарие, отче наш.

Иной кондак, глас 8

Яко финикс псаломский во удолиих постнических процвел еси, / трудов своих поты, яко плоды духовными, возвеличил еси над всеми Бога, / но яко имея дерзновение ко Святей Троице, / поминай нас, чтущих любовию святую память твою, да зовем ти: / радуйся преподобне Макарие, отче наш.

 

Святитель Иннокентий (Борисов), архиепископ Херсонский и Таврический

Кондак святителю Иннокентию, глас 3:
Юга земли нашея цвете, / Церкве Российския украшение, / Православия наставниче преславный, / защитниче и молитвенниче Отечества усердный, / новый Российский Златоусте, / богомудре святителю Иннокентие, / моли Христа Бога // спастися душам нашим.

 

27 мая/ 9 июня

Преподобный Ферапонт, Можайский чудотворец

Тропарь, глас 4

Житием чистым просветився, в молитвах и постех пустыни явился еси добре прозябение и, духовному твоему учителю последствуя, ум свой к Небесным управль, стаду твоему наставник был еси, тем тя молим, отче Ферапонте: моли Христа Бога спастися душам нашим.

Кондак, глас 4

Преблагий Спас наш Христос умножил есть милость Свою к нам, даровав нам в заступника и целителя преподобнаго отца нашего Ферапонта, иже просвещает нас образом святаго жития своего и ныне молитвами своими ограждает храм свой от врагов и от разрушения, страну сию от глада и напрасныя смерти, чтущих же память его всех от болезней и от лютых страстей.

 

Обретение и перенесение честных мощей свтт. Московских Киприана, Фотия и Ионы и с ними свт. Филиппа I, митрополитов всея Руси

Тропарь, глас 8

Яко светлаго Солнца светозарныя звезды, Троическим Светом озаряете сердца верных, пренесением честных мощей ваших, Троицы сосуди явистеся чистии вашим житием, и научисте люди твердо вере Христове, и скверну отогнасте вашими святыми заповедьми, и упасосте добре Христово стадо, порученное вам богомудре Киприане со славным Фотием и со Ионою твердым, молитеся Христу Богу, да спасет души наша.

Кондак, глас 8

Яко трие велиции светила, явистеся, озаряюще всю подсолнечную богоданною вам благодатию чудес, и просветисте молитвами своими верных сердца, вашу память чтущих честнаго пренесения. И Владыку Христа, всех Творца молите стране нашей на враги победу подати, яко имуще дерзновение, и нам просите велия милости, вопиющим к вам: радуйтеся, поборницы по Христове Церкви и многочестная светила, святителие славнии.

 

Святитель Киприан, митрополит Киевский и всея Руси

Тропарь, глас 4

Иже от Бога свыше Божественною благодатию совершен и благими нравы украшен, Духом Святым просвещен, совершив святыню в страсе Божии, сподоблен бысть благодати Божественнаго Духа, пасый Церковь Божию русския митрополии, постом вся поборая, волнение претерпе, гонение преминув, святаго Петра митрополита всегда себе в помощь призывая, и сего помощника имея, и того стопам последуя. Служитель благоприятный заповеди Божии соблюдая, Духом Божиим наставляемь, просвещая верныя люди учением словес твоих, пощением украси житие свое, ярем Господень измлада восприим, и паче всех Христа возлюби. Того ради и архиерейским седалищем почтен, и, яко светозарное солнце от Сербския земли происшед, и по вся концы Русския земли добродетелию просияв, светило явися мирови, и преставися ко Господу от сея жизни в вечный покой, великий архиерею Божий, Киприане митрополите, учителю и наставниче Русския земли, всегда предстоя Престолу Пресвятыя Троицы, моли Господа прилежно об архиереех и о всех христианех, да спасет тебе ради души наша.

Кондак, глас 2

Необорим столп Православия, вере Христове утверждение, церквам украситель, премудрый учитель, сербское воспитание, русское процветение, Господнею любовию распаляемь, Духу Пресвятому дом явися и душу, яко жертву непорочну, Господеви принесе, досточудне и всечестне Киприане, святителю Христов, сего ради вселися в широту райскую, предстоя Христу в лице святых, Емуже молися и спасай град и люди от поганых нахождения, яко да зовем ти: радуйся, отче Киприане, учителю премудрый.

 

Святитель Фотий, митрополит Киевский и всея Руси

Тропарь, глас 4

Словес евангельских послушателю и Божественных учений рачителю, премудрый наказателю, всегда страху Господню поучайся, в молитвах к Богу простираяйся, заградителю устен кривоглаголющим слово правыя веры, яко апостолом сопричастниче, веры Христовой утвердителю, пророчески вещателю, святителю Фотие, моли Христа Бога умирити мир и спасти души наша.

Кондак, глас 8

Троице сосуд явился честный твоим житием, святителю Фотие, всегда зрящий Святую Троицу, Ейже предстоиши, молися непрестанно о всех нас.

 

Святитель Иона, митрополит Московский и всея Руси

Тропарь, глас 4

От юности твоея весь сам себе Господеви возложив, в молитвах, и трудех, и в постех образ быв добродетели, отонудуже видев Бог твое благое произволение, архиерея тя и пастыря Церкви Своей устрояет. Темже и по преставлении честное тело твое цело и нетленно соблюдеся, Ионо святителю, моли Христа Бога да спасет души наша.

Кондак, глас 8

Яко от младенства Господеви поработив себе, мудре, постом и бдением тело твое удручая, темже сосуд чист и дом Духу Пресвятому явился еси. Сего ради и Церкви Своей тебе архиерея и пастыря устрояет, юже добре упас, ко Господу отходиши, Егоже возлюбил еси. Тем молим тя: поминай нас, верою чтущих святую память твою, да вси зовем ти: радуйся, отче Ионо, святителю всечестный.

 

Святитель Филипп I, митрополит Московский

Тропарь, глас 3

Чудо явися, изведением и делы возсияв, Духа Святаго произбранием святительства паству приим, откровением Божиим церковь разобра и величайшую воздвиже, всечестне Филиппе, святителю великий, мир граду даруй нашему Москве и велию милость.

Кондак, глас 8

Во успении твоем обретоша на телеси твоем сокровище некрадомое: два креста и тяжчайшая железа, еже есть вериги, постом и молитвами Богу угодил еси, святителю Филиппе, моли Христа Бога о всех нас.

 

Преподобный Нил Столобенский

Тропарь, глас 4

Яко светильник всесветел, / явился еси во острове Селигера езера, / преподобне отче Ниле, / ты бо, крест Христов от юности своея на рамо взем, / усердно Тому последовал еси, / чистотою Богови приближився, / отонудуже и чудес дарованием обогатился еси. / Тем и мы, притекающе к раце мощей твоих, умильно глаголем: / отче преподобне, / моли Христа Бога / спастися душам нашим.

Кондак, глас 8

Отечества, преподобне, удалився, / в пустыню вселился еси, / и, на остров Селигера езера возшед, жестоко житие показал еси, / и, многих добродетельми удивив, / дарования чудес от Христа приял еси. / Поминай нас, чтущих память твою, да зовем ти: / радуйся, Ниле, отче наш.

 

Праведный Иоанн Русский, исповедник

Тропарь, глас 4

От земли Призвавший тя в Небесныя обители сохраняет и по смерти нетленое тело твое, святе, ты бо яко пленник приведен бысть в Асию, идеже и уподобися Христу. Сего ради моли Его спастися душам нашим.

Иной тропарь, глас 4

От земли пленения твоего / воззвавый тя к Небесным селением, / Господь соблюдает невредимо и цельбоносно тело твое, / праведне Иоанне, / ты бо, в России ятый и во Асию проданный, / посреде, агарянскаго злочестия благочестно пожил еси во мнозе терпении / и, сеяв зде слезами, / жнеши тамо неизглаголанною радостию. / Темже моли Христа Бога спастися душам нашим.

Кондак, глас 8

В честней памяти твоей, святе, / веселится о тебе Россия, / во благочестии тя воспитавшая, / и целебным мощем твоим радуется Асия, / идеже узкий путь прошед страдальческаго плена и постнических подвигов, / сосуд честен явился еси Божия благодати, / еяже проси и нам, чтителем твоим, да зовем ти: / радуйся, Иоанне, благодати тезоимените.

Иной кондак, глас 4

Ныне приспе память славных, святе отче, дел твоих, / веселяще благочестивыя души, / верно чтущия тя, Иоанне.

Иной кондак, глас 4

Евангельския любве служителя, правды Божия ревнителя, чистоты душевныя и телесныя хранителя, веру Христову исповедавша в сраданиих, праведнаго Иоанна ублажаем и почитаем днесь и, житием его назидающеся, поем: радуйся, молитвенниче наш, от Бога прославленный.

 

Преподобный Ферапонт Монзенский

 Тропарь, глас 8

Любовию Христовою, Богомудре, просветився, и добродетельми / сожитель­ствовал еси Василию блаженному, / и, всякое наслаждение плотское вознена­видев, / в пустыню вселился еси, / в ней же вельми подвизался еси, в жизни сей временней / плоть умершвляя свою в пениих, и во бдениих, и в пощениих. / Темже и Христос даром чудес обогати тя, / но поминай убо нас, чтущих пресветлую память твою, / преподобне отче Ферапонте, / и моли Христа Бога спастися ду­шам нашим.

Кондак, глас тойже

Возложив себе Богу от юности, преподобне, / Того паче всех возлюбив, / и Тому от всея души любовию последовал еси, / тленная и красная мира нивочтоже вменив, в пустыню вселився, / в ней же добре подвизался еси противу невидимых врагов козней / и, яко светозарное солнце, в концех Галическия земли возсиял еси, / отонуду же, веселяся, прешел еси к Небесным обителем, / и ныне со Ангелы Владычню Престолу предстоя, / поминай нас, чтущих память твою, да зовем ти: / радуйся, Ферапонте, отче наш.

 

28 мая/10 июня

Преподобный Никита Исповедник, епископ Халкидонский

Тропарь, глас 4

Правило веры и образ кротости, / воздержания учителя / яви тя стаду твоему / Яже вещей Истина. / Сего ради стяжал еси смирением высокая, / нищетою богатая, / отче Никито, / моли Христа Бога / спастися душам нашим.

Кондак, глас 8

Светлостию дел твоих просиял еси, преподобне, / апостольского престола наследник был еси, Никито, / и, яко солнце, облистал еси твоей пастве, отче, / вся Божественных учений исполнь. / Темже зовем ти: / радуйся, Халкидону удобрение.

 

Святитель Игнатий, епископ Ростовский

Тропарь, глас 4

Благоверия просвещся учении, / святительства прием паству / и апостолов наследник быв, / тем приял еси от Бога дар чудес, святителю отче Игнатие, / моли Христа Бога, / да спасет души наша.

Кондак, глас 4

Явися днесь пресветлая память твоя, / святителю преблаженне Игнатие, / в мире светло сияющи и являющи всем Божественное сияние.

 

Святитель Геронтий, митрополит Московский

Тропарь, глас 6

Днесь душа всяка веселится на память успения святителя Христова Геронтия, премудрости ревнителя и кротости учителя, смирению наказателя, учением Божественных словес верныя насладившаго. Русскаго митрополита похвалим, святительства паству приемшаго, украсившаго Церковь Христову. Тем и Христос, видя твое благопроизволение, причте тя в лик праведных, святителю Геронтие,  моли Христа Бога и Пречистую Богородицу непрестанно о всех нас.

Кондак, глас 2

Божиим Духом иночество вожделе и восприя Духа Святаго благодатию, и святительства сана сподобился еси, содержаще престол Русския митрополии, и бысть пастырь и учитель от рода русскаго, пасый стадо Христово словесных овец, и обрете благодать от Господа, Геронтие святителю, Емуже всегда о нас непрестанно молися спастися душам нашим.

 

Преподобная Елена (Мантурова) инокиня, Дивеевская

Тропарь, глас 5

Дивно бысть ко граду призвание твое, славно бысть и равноангельное житие, кротко бысть твое крестоношение, чудно бысть смиренномудрие твое. Послушлива была еси даже до чаши смертныя и из девеевской обители в небесную взошла еси. Радуйся, Елено преподобная, и не остави ны предстательством твоим.

Кондак, глас 4

Мира суету оставивши, блаженная Елено, в дивеевскую обитель вселилася еси, и от избранника Владычицы Пречистыя услышала еси: вскую смерти убоялася еси; Подвигом добрым подвизалася еси, течение скончала, веру соблюла еси. Прочее убо соблюдается венец правды ти, егоже воздаст ти Господь в день он, яко всем возлюбившим явление Его. Потщися же скоро приити к праведному Судии.

 

Преподобноисповедник Ираклий (Матях) схимонах, Иссык-Кульский

Тропарь, глас 5

Исповедниче дивный,/ схимонаше праведный,/ богодухновенне Ираклие,/ приял бо еси крест и последовал еси Христу,/ и вся учил еси покланятися Творцу,/ в Троице Единому Богу,/ и ныне обрел еси на Небесех мзду трудов твоих,/ и пред престолом Бога Вышняго стоиши,// и молишися о душах наших.

Кондак, глас 2

Любовию ко Христу возгорев пламенне,/ востекл еси к небесе,/ и ныне предстательством своим пред престолом Всецаря,/ больным подаеши исцеление,/ немоществующих врач,/ всем призывающим тя быстрое предстательство и поможение,/ от различных обстояний помоще,/ не забуди ны, чтущих честную память твою,/ огради нас молитвами твоими,// досточудне Ираклие, отче наш.

 

Праведня Домника (Ликвиненко) Алешковская, Таврическая

Тропарь, глас 5

От юности желанием Божественныя любве разжигаема, / суету житейскую отринула еси, / смирением крайним и молитвою непрестанною / мудрость Христову стяжала еси / и в годину лютую явилася еси наставница ищущим спасения. / Темже предстоя ныне Господеви в лице святых, / поминай молящихся тебе,/ Домнико, мати блаженная.

Кондак, глас 8

Силою укрепляема Всемогущаго Бога, / в немощнем естестве подвиги многотрудныя явила еси, / и долу влекущия страсти чистотою / и бдением непрестанным умертвила еси. / Сего ради Христос Бог тя прослави дивными чудесы, / мати блаженная Домнико, / Емуже прилежно молися / подати нам мир и велию милость.

 

29 мая/11 июня

 

Священноисповедник Лука (Войно-Ясенецкий), архиеп. Симферопольский и Крымский

Тропарь, глас 1

Возвестителю пути спасительного, / исповедниче и архипастырю Крымския земли, / истинный хранителю отеческих преданий, / столпе непоколебимый, Православия наставниче, / врачу богомудрый, святителю Луко, / Христа Спаса непрестанно моли / веру непоколебиму православным даровати / и спасение, и велию милость.

Кондак, глас 1

Якоже звезда всесветлая, добродетельми сияющи, был еси святителю, душу же равноангельну сотворил, сего ради святительства саном почется, во изгнании же от безбожных много пострадал и непоколебим верою пребыв, врачебною мудростию многия исцелил еси. Темже ныне честное тело твое от земленных недр обретенное дивно Господь прослави, да вси вернии вопием ти: радуйся, отче святителю Луко, земли Крымстей похвало и утверждение.

 

Преподобномученица Феодосия дева, Константинопольская

Тропарь, глас 4

Добродетель благоприятно, мученице, постигла еси, / Христово приятелище бывши чистое, / и Святаго Духа дом возлюблен; / отнюдуже посрамила еси врага, борющаго род человеческий, / добре страдавшая, / и посекла еси Копронима, Феодосие, мечем веры, / и к чертогу Небесному преставилася еси, радующися. / Тебе верою чтущим / присно проси велия милости.

Кондак, глас 2

Трудами живот нетрудный достигла еси, / кровию же Копронима удавила еси, мученице, / сквернаго врага Христовы Церкве, всеблаженная Феодосие, / и с Вышними радуешися воинствы, / чтущия память твою покрывающи.

 

Блаженный Иоанн, Христа ради юродивый, Устюжский чудотворец

Тропарь, глас 5

Наготою телесною и терпением / обнажил еси вражия коварствия, / обличая неподобное его деяние, / зельне стражда солнечный вар / и нуждныя великия студени мраза, / и огня не чул еси, / Божиею помощию покрываемь, / Иоанне премудре, / моли о верою творящих память твою честно / и усердно притекающих к раце мощей твоих, / избавитися от бед и падения избежати.

Кондак, глас 8

Вышния красоты желая, / нижния сладости телесное ядение тщательно оставил еси, / нестяжанием суетнаго мира, / возлюбил еси ангельское житие, / преходя скончався, Иоанне блаженне; / с нимиже моли Христа Бога непрестанно о всех нас.

Иной кондак, глас 1

Иоанне премудре, / земныя славы не возлюбив, / того ради яко неистов ся творя, / желая Царство Небесное наследовати, / ударения и укорения приемля, / наготу и зной терпя, / тем ныне со Ангелы ликуеши, / моли Христа Бога о душах наших.

 

30 мая/12 июня

Преподобный Исаакий исповедник, Далматский

Кондак, глас 8

Яко угодник Божий верный, / по Христове Церкви ревностию разжегся, / бразды Валентовы удержав, / пророчески тому о затворении Церкве пагубную смерть предрекл еси, преподобне. / Темже присно моли о нас, чтущих тя, Исаакие преподобне.

 

Обретение мощей священномученика Филиппа II, митрополита Московского и всея Руси

Тропарь, глас 5

Радостный возсия день светлаго торжества: днесь церковная расширяются недра, приемлюще духовных даров неоскудеемо боготворное сокровище, струю благодатей неисчерпаемую, источника судесем обильна, чудотворивыя и священныя мощи твоя, святителю Филиппе. Тем же моли Прославившаго тя Дародателя Христа Бога о воспевающих тя и кланяющихся священным мощем твоим.

Кондак, глас 3

Яко солнце, днесь от земных недр возсияша честныя твоя мощи, святителю. Землю же и воздух шествием твоим осветил еси и всех верных чудес богознаменьми облистал еси, чудотворец предивен и молитвенник к Богу о мире изящен явися. Сего ради вопием ти: спасай нас теплым своим предстательством, яко ученик Божия благодати.

 

31 мая/13 июня

Апостол от 70 Ермий

Кондак, глас 4

Яко звезда, возсиял еси вселенней, / светом просияв солнца, блаженне, / всесветлаго Павла, / мира просвещшаго концы, / сего ради тя чтим, Ермие.

 

Мученик Ермей

Тропарь, глас 4

Мученик Твой, Господи, Ермей / во страдании своем венец прият нетленный от Тебе, Бога нашего: / имеяй бо крепость Твою, / мучителей низложи, / сокруши и демонов немощныя дерзости. / Того молитвами / спаси души наша.

Кондак, глас 6

Иже по Христе усердно подвизався, / в сединах доблих мужество стяжа, мучениче Ермее, / беззаконных злоумышления поправ Христовою силою, / от чаровных напоений невредим пребысть, зовый: / Бог есть со мною, и никтоже на мя.

 

Святитель Филофей (Лещинский), митр. Тобольский и всея Сибири, в схиме Феодор

Тропарь, глас 3

Начальниче духовного просвещения / народов Сибири крестителю, церквей православных устроителю / Царствие Божие в душах верных насаждал еси и блаженство небесное восприял еси / похвало Сибири, святителю Филофее / моли Христа Бога / спастися душам нашим.

Кондак, глас тойже

Ко Господу Иисусу любовь от юности стяжал еси / благодать Святаго Духа в пастве твоей утверждая / апостольским трудом наследниче / многия души Отцу Небесному всыновил еси / и подвиг сугубый совершил еси, / преподобне отче Филофее / молитвенниче о душах наших.

 

Священномученик Философ (Орнатский) протоиерей и с ним сыновья его мученики Борис и Николай, Петербургские

Тропарь, глас 5

От юности премудрость Божию возлюбив, досточудне отче Философе,/ во вся дни жития твоего последовал еси Пастыреначальнику Христу,/ Иже яви тя граду святаго Петра пастыря добра./ Ты же, душу свою положив за паству,/ сам востекл еси на страдания от беззаконных/ со чады твоими Николаем и Борисом,/ темже и ныне молим ти ся:/ не остави предстательством твоим всех почитающих память твою.

 

Литература:

Жития русских святых

«Минея» М.: Издательский Совет РПЦ, 2002.

«Октоих» М.: Издательский Совет РПЦ, 2000.

«Православный календарь на 2003-2004 гг.» Дмитрия на сайте www.days.ru.

«Православный календарь с богослужебными указаниями, с тропарями и кондаками за 2003 г.» Издательство Валаамского монастыря.

«Православный церковный календарь за 2005 г» Международный православно-просветительский центр при МП.

«Триодь постная» М.: Издательский Совет РПЦ, 2002.

«Триодь цветная» М.: Издательский Совет РПЦ, 2002.

Иконы и переводы богослужебных текстов на русский язык о. Амвросия (Тимрота) на сайте wertograd.narod.ru.

Христианство. Энциклопедический словарь. М. 1995.

http://ustavschik.livejournal.com/