Молитва О достохвальный и досточтимый великоименитый соборе новых мучеников и исповедников Соловецких! Слава о велиих страданиях ваших пройде даже до конец вселенныя: священнии сии отоцы потрясошася, и вся земля вострепета и ужасом исполнися о муках лютых, яже вы за Христа претерпели есте. За умножение беззаконий и отступление от веры буря злодеяний поколеба великую Российскую державу, силою многою обрушися на святыя Соловецкия отоки, в мори мученическия крови потопити их хотящи, богомерзкими деянии оскверняющи древнюю обитель, самую же память о святыни истребити тщащися. Кое зло ни сотвори зде ярость сатанинская? Кую муку православным ни измысли изощренный разум диаволь? Морю Белому вдашася страдальцы, безбожными мучители потопленныя; езера водная имут останки страстотерпцев; каяждо пядь священныя земли сея напитана есть кровию безвинною убиенных и умученных архиереев и священников, монахов и мирских, всякаго звания и возраста верных. Тии же веру Христову твердо храняще, не отступили суть пред силою вражиею, Царства Небеснаго приснии жители явишася, к лику избранных Божиих причтеннии. О славное и чудное воинство новомучеников и исповедников Соловецких, егоже предваряет Вениамин прехвальный, иноком обители сея начальник богомудрый! Смиренно молим вас, пред Богом дерзновение имущих: молите за обитель Соловецкую, милостию Божиею ныне паки востающую, за ны, недостойныя жители ея, дабы время сие благоприятное нам к пользе душевней и ко спасению нашему употребити. Молитеся, присноблаженнии, за державу Российскую, во еже свободитися ей от власти темныя и к свету правды Божия воспрянути, да паки процветет во всякой благостыни. Всему же роду православному испросите дух мира и любве Христовы, и благодати исполнения, да тою сохраняеми, вся до конца претерпевше, спасени будем и в радости Господней водворимся, славяще о всем Вседержителя и Благопромыслителя Единаго в Троице Бога, Отца и Сына и Святаго Духа во веки веков. Аминь.
Добавлять комментарии могут только зарегистрированные пользователи. [ Регистрация | Вход ]
