Четверг, 18.04.2024, 12:38
Главная » Фотоальбом » Святые мощи » Преподобный Иов Анзерский, в схиме Иисус
Преподобный Иов Анзерский, в схиме Иисус
Молитва
О преподобне отче Иове, предстателю наш к Богу неусыпный, молитвенниче о душах наших дерзновенный, пустыни анзерския красото пресветлая, обители Распятския сило духовная! Многими труды тя Богу потрудившася и на конец жития к лику иноческому приобщившася, сподоби Пресвятая Богородица спасительным Страстем Христовым послужити, гору безмолвну тобою освятивиши, юже нарече Голгофу, вручивши ти устроити обитель скитскую. Оная и процвете чудными подвиги и постническим житием твоим и ученик твоих, и благодать почи на ней, и слава Небесная облече ю. Послежде же паки оправдися имя горе сей за множество претерпевших гонения и смерть веры Христовы и правды ради, и ина слава мученическая осия твою обитель. Ныне воставшей той от запустения и поруганий и милостию Божиею Тому работающей, идеже и святыя мощи твоя яко многоценное сокровище во храме тобою созданнем обретошася, предстояще сей святыни усердно молим тя, достоблаженне отче: даждь нам креста умное зрение в себе имети и благодарение сердечное за ны распеншемуся Христу Богу: воскресения надежду и упование спасения простираюше к Тому, крест жития своего вземше, со всяким послушанием шествовати путем Господним: покаяния трудом снискати благодать и дух любве Христовы в душах наших. Иночествующих сподоби подвигом добрым подвизатися достойно званию, и всем православным испроси в заповедех Божиих хождение и исполнение добродетелей, и в неже ты безпреткновенно вшел еси, Царства Небеснаго приобщения, дабы и мы с тобою тамо наслаждалися Божественныя славы, и воспевали Всесвятую Троицу, Отца и Сына и Святаго Духа, ныне и присно и во веки веков. Аминь.
|
Меню сайтаКатегории раздела
Онлайн всего: 1 Гостей: 1 Пользователей: 0 |