Март
1/14
марта
Преподобномученица
Евдокия
Тропарь, глас 8
Правостию умною душу твою привязавши в любовь Христову,/
тленных, и красных, и временных забытием претекла еси,/ яко Слова ученица:/
пощением страсти первее умертвивши,/ страдальчески второе врага посрамила еси./
Тем Христос сугубых венца сподоби тя,/ славная Евдокие, преподобная
страстотерпице,/ моли Христа Бога спастися душам нашим.
Кондак, глас 4
Во
страдании твоем добре подвизавшися,/ и по смерти нас освящаеши чудес излиянии,
всехвальная,/ верою прибегающия в Божественную церковь твою,/ и, торжествующе,
молим тя, преподобная мученице Евдокие:// да избавимся недуг душевных и чудес
благодать почерпем.
Преподобный Мартирий
Зеленецкий
Тропарь, глас 2
От
юности, Богоблаженне, Христа возлюбив,/ отечество оставил еси/ и, всех мирских
мятежей уклонився,/ в тихое пристанище пречестныя обители Богоматерни достигл
еси:/ отнюдуже уведев непроходную пустыню,/ крестовидною зарею показанную,/
желательне ю обрел еси,/ и, в ней вселився,/ иночествующих собрал еси,/ и сих
ученьми своими, яко лествицею восходною на Небо,/ трудолюбно тщался еси
возводити к Богу,/ Емуже молися, Богомудре Мартирие,/ даровати душам нашим велию
милость.
Кондак, глас 8
Отечества, преподобне, и всего мирскаго мятежа
уклонитися возжелел еси,/ и, в пустыню вселився,/ тамо во блаженнем безмолвии
жестокое житие показал еси,/ и чада послушания и смирения в нем возрастил еси./
Сего ради, дерзновение стяжав ко Святей Троице,/ еже молитися, Богоблаженне, о
нас, чадех своих, ихже собрал еси,/ и о всех правоверных, да зовем ти:/ радуйся,
отче Мартирие, безмолвия пустыннаго любитель.
Преподобная Зосима (Суханова)
схимонахиня, Еннатская, Уфимская
Тропарь, глас
8
Вышняя красоты желающе, нижния страсти далече от себя отринула еси, и
нестяжание паче сует мира возлюбивши, ангельское житие избрала еси, преподобная
мати Зосимо, моли Христа Бога спастися душам нашим.
Кондак, глас
3
Веселися, Земле Уральская, великое сокровище стяжав; мощи твои, Святая
преподобная мати Зосимо, благодать исцеления подают всем с верою и любовию
приходящим к ним. И ныне, предстоя с ликами Святых Жен русских пред Престолом
Святыя Троицы, молися оставление грехов даровати чтущим святую память твою.
Святая блаженная Марфа Московская Христа
ради юродивая
Кондак, глас 8:
В мире сем благочестно и праведно поживше, молитвою,
юродством и иными подвиги досточудными Богу угодила еси, сего ради и Господь во
чудесех преславну тя показа, Его же, святая мати наша Марфо, моли сохранити
обитель твою и всех людей, благочестно тя почитающих.
2/15
марта
Святитель Арсений, епископ
Тверской
Тропарь, глас 8
Благочестно пожив во святительстве,/ люди просветил еси
учением твоим,/ и о храме Пречистыя вельми подвизався,/ и любитель монахов быв,/
сего ради от Христа паствы твоей венец приял еси./ Темже, яко апостольского
престола наместника,/ и святителя великаго чтуще тя, молим чада твоя, блаженне:/
от всех бед избави нас яже ко Христу молитвами твоими,/ святителю Христов
Арсение отче наш.
Кондак, глас 8
Восприемши радостно честный твоя мощи пречистая
церковь,/ в тоже честно вносимы множеством священномонахов и князи
благоверными,/ и яже приемши, яко сокровище многоценное./ Темже и мы ныне, твоей
ограды словесныя овцы,/ окрест раки твоея предстояще,/ любезно вопием ти:/ не
забуди чад твоих, отче,/ ихже мудре собрал и возлюбил еси,/ яко да зовем ти:/
радуйся, святителю Арсение, пастырю и учителю наш.
Священномученик Феодот, еп.
Киринейский
Кондак глас 3
Моря
зловерие обличил еси,/ и идольскаго безбожия лесть верою правоверия уязвил еси/
и, всесожжение Божественное быв,/ чудодействием орошаеши концы,/ отче святителю
Феодоте, Христа Бога моли// даровати нам велию милость.
4/17
марта
Преподобный и благоверный князь Даниил
Московский
Тропарь, глас 4
Княжения твоего славу отложив,/ озаряемый Божественною
благодатию,/ Богомудре княже Данииле,/ весь разум в сердце от суетнаго мира
сего/ к Зиждителю неуклонно возложил еси/ и, яко звезда на востоце Российскаго
государства просиял еси,/ целомудрием же и равноангельным твоим житием/ течение
добре совершая,/ веру соблюл еси непорочну,/ тем и по смерти прослави тя Бог в
чудесех,/ яко источаеши исцеления верно притекающим к честней раце твоей;/ сего
ради днесь празднуем успение твое, людие твои./ Ты же, яко имаши дерзновение ко
Христу,/ моли спасти отечество твое// и мирней быти державе
нашей.
Кондак, глас 4
Избранный Богом от чресл родительских и воспитанный от
младенчества в законе Господне в мужа совершенна, и промыслом Вышняго именитаго
града Москвы наследие княжества прием, верен строитель благочестивым людем твоим
показался еси, богоблаженне Данииле, ихже образом своим наставляя и поучая
заповедем Господним выну, путем, ведущим в живот вечный присно шествуя,
Небеснаго Царства достигл еси, идеже со ангельскими водворяяся лики, поеши Богу:
Аллилуиа.
Благоверный князь Георгий
Владимирский
Тропарь, глас 8
На высоте великого княжения седя, явился еси
благочестием и верою сияя отечеству своему яко солнце: по Святей Троице
ревностию разжегся и за веру крепко пострадав, кровь свою пролиял еси; тем и
отсеченная твоя за Христа глава свидетельствует яве о тебе, прилепшая по смерти
к телеси твоему; с нею же и до днесь нетленны пребывают мощи твоя, от нихже
источаеши исцеления душам и телесем нашим; но яко дерзновение имея ко Христу,
страстотерпче Георгие, непрестанно моли, державу твою и сродник твоих безвредну
сохранити молитвами твоими.
Кондак, глас 8
Христове смерти подобяся, и Того испити чашу возжелав,
яко живота, за Него же мужески подвизався, презрев земное царство, от безбожных
варвар пострадав до смерти, Георгие богомудре; тем моли спастися христолюбивому
императору нашему молитвами твоими.
Благоверный князь Вячеслав
Чешский
Тропарь, глас 4
Днесь
Ангели с человеки радуются вкупе общим веселием,/ Небо и земля светло ликуют в
память твою, святе./ И мы, грешнии, прилежно ти вопием:/ помолися к Владыце о
нас,/ избавити ны от напасти/ видимых и невидимых враг,/ чтущих пресветлую
память твою.
Кондак, глас 1
С
лики Ангельскими предстоя,/ блаженне княже Вячеславе,/ наслаждаешися
Божественныя и неизреченныя доброты/ и, оттуду благодетельныя дары почерп
чудес,/ всем, притекающим верою под твою святыню,/ источавши цельбам дарование.
Преподобный Герасим, иже на Иордане
Вологодский
Кондак, глас 4
Возгоревся рачением горним,/ жестость пустыни Иордановы
паче всех мира сладких предпочел еси;/ отонудуже повинуся тебе зверь даже до
смерти, отче,/ послушне и жалостне на гробе твоем скончася,/ прославльшу тя тако
Богу,/ к Немуже моляся, и о нас,// отче Герасиме, поминай.
Преподобный Герасим
Вологодский
Тропарь, глас 4
Яко
Безплотным единонравен/ и преподобным сообщник, преподобне Герасиме,/ един на
Вологду пришел еси,/ прорицая ту быти граду великому/ и в нем святей церкви
воздвигнутися/ и святителем водворитися./ Темже и сподобился еси/ близ того
погребен быти/ и по преставлении своем многими чудесы исцелений просил еси./
Молися всегда о нас,/ яко да обрящем от Бога милость.
Кондак, глас 8
От юности, премудре, мирский мятеж оставил еси,/ и многоценный ризы тленныя возненавидел еси,/ и святую одежду ангельскую любезно восприял еси,/ и ту соблюл еси в чистой совести/ и во благих делех, и до преставления своего/ бысть Божественнаго ради жития Троицы селение/ и просветил еси верою приходящий к тебе;/ темже вси зовем ти:/ радуйся, отче Герасиме всечестный.
Преподобномученик Иоасаф, игумен
Снетогорский
Тропарь,
глас 3
На земли Псковстей в добродетелех усердно подвизаяся, / Пресвятыя Троицы свет восприял еси в души своей, / наипаче же мученичества подвигом Бога прославил еси, / преподобномучениче Иоасафе, отче наш, / ныне же с сострадальцы твоими в небесех предстоя, / непрестанно всесильнаго Бога моли, / да утвердит ны во православии и благочестии, / и в мире управит живот наш.
5/18
марта
Мученик Конон
Исаврийский
Тропарь, глас 4
Яко девственника предивна/ и мученика непоколебима,/
блаженнаго страдальца,/ на бесы власть приемшаго,/ Конона песньми восхвалим и к
нему возопиим:/ моли Христа Бога,/ да спасет души наша.
Кондак, глас 3
Чистотою яко Ангел на земли пожив,/ отонудуже собеседник
Ангелом быти сподобился еси,/ и родители ко Христову познанию привел еси,/ и,
единаго Бога в Троице исповедав,/ пострадал еси до крове,/ мучениче Кононе,/
моли Его непрестанно о всех нас.
Преподобный Адриан
Пошехонский
Тропарь, глас 4
Христову мученику Адриану тезоименит был еси,
преподобне,/ многия труды подъял еси в жизни временней,/ обитель иноческую
созидая в пустыни,/ идеже пострадал еси даже до крове от злых разбойник/ и
мученическую смерть от них приял еси,/ Адриане славне,/ чудес благодатию
обогатився,/ предстоиши всех Царю, Христу Богу,/ Егоже моли спастися душам
нашим.
Кондак, глас 4
Христа ради, доблественне, претерпел еси и венец от Него
восприял еси страдания твоего, приходящим же к тебе с верою от честнаго гроба
подаеши цельбы, о преподобне мучениче Адриане приснопамятне, молитвенниче о
душах наших.
Благоверный князь Феодор Смоленский и
чада его Давид и Константин Ярославские
Тропарь, глас 4
Измлада явистеся святии,/ Богомудре Феодоре и блаженне
Давиде с Константином славным,/ Божественный сосуди, избранный Богови./ Ныне же
источаете нам многа исцеления от честных мощей ваших,/ вся ереси потопляюще,/ и
спасающе присно град свой,/ и всех верных сохраняюще невредимо/ от видимых и
невидимых враг./ Темже верою молим вас, святии:/ молите Христа Бога/ в мире
сохранитися нам и спасти души наша.
Кондак, глас 8
Богомудренно преселистеся, святии,/ во град, присно
добродетельми цветущий,/ в жизни сей приносяще Богови плоды благи,/ преподобне
Феодоре и блаженне Давиде с Константином славным,/ и явистеся, яко многоцветущая
райская древеса жизни/ и яко многосветлыя звезды, в мире сияюще благодатию,/ в
добродетели исправивше жизнь свою,/ и сего ради получисте живот вечный на
Небесех./ Темже благодарственно вам зовем:/ радуйтеся, всемирнии светильницы и
граду нашему Ярославлю великое утверждение.
6/19
марта
42 мученика во Амморее: Константин, Аетий,
Феофил, Феодор, Мелиссен, Васой, Каллист и др.
Тропарь, глас 4
Мученицы Твои, Господи,/ во страданиих своих венцы
прията нетленный от Тебе, Бога нашего,/ имуще бо крепость Твою,/ мучителей
низложиша,/ сокрушиша и демонов немощный дерзости./ Тех молитвами/ спаси души
наша.
Кондак, глас 4
На
земли Христа ради страдальчествовавше,/ явлынеся, благочестивии венечницы,/
Небеса прилете жити в радости:/ всякую бо кознь вражию низложивше болезньми и
кровьми ваших язв,/ хвалящим свыше присно грехов разрешение подаваете.
Преподобный Иов священноинок, Анзерский,
в схиме Иисус
Тропарь,
глас 5
Показавый образ добродетелей, / весь страха Божия и Духа
Свята исполнен бысть, / преподобне отче Иове, / безмолвия истинный рачитель
явился еси, / страстем Господним покланяяся, / имже и обитель воздвигл еси во
отоце Анзерстем. / Пустынножителей наставниче, // моли Христа Бога спастися
душам нашим.
Кондак, глас
8
Любовь Христову в сердце стяжав, / еяже ради многи скорби претерпевый, / пристанище обрел еси в морстем отоце, / преподобнаго Елеазара заветов верный преемник явился еси, / покровом Божия Матере осеняемый: // достоблаженне отче Иове, поминай нас, чтущих святую память твою.
7/20
марта
Священномученики епископы Херсонесские
Ефрем, Василий, Евгений, Елпидий, Агафадор, Еферий и
Капитон
Кондак, глас 2
Светоносный день наста/ пастырей, епископствовавших
светло в Херсоне,/ ихже воспеваем праздник,/ пострадавших за Христовы овцы./
Священномученицы, молите Пастыреначальника Христа/ и нас причести деснаго овец
стояния,/ да вопием вам:/ радуйтеся, священнии отцы,/ за Христа кровь свою
излиявшии.
Преподобномученицы Мария и Матрона
(Грошевы) инокини, Шатурские
Сестреницы пречестныя Матроно и Марие, / дивно Богу и Церкве Святей послужити сподобилися есте, / и сего ради безбожныя злобы ярость в телесех ваших жрение себе обрести тщашеся, / но души ваша, Жениху Небесному уневещшиеся, / мучительское дерзновение превозмогоша, / и во обители Небесныя преселишася сквозе тернии богоборческия. / Телеса же ваши страстотерпческия / хранит до времени Всеведущий Судия, // Иже вами нам воздвизает защищение и теплое предстательство.
Кондак,
глас 1
Яко премудрых дев, светильники своя соблюдших / и Жениху своему исполнены елеа чистаго уставивших, / новомучеников же веси Шатурския доблих сотрудниц и сострадалиц, / святых сестер Матроны и Марии память возхвалим днесь, вернии. / Предсташа бо тии в ризах мученических ко Престолу Превечныя Троицы, // и за ны недостойныя присно тамо предстательствуют.
8/21
марта
Преподобный Феофилакт, исповедник,
епископ Никомидийский
Тропарь, глас 6
Таяся, пожил еси, прехвальне,/ но Христос тя показа,/
яко светило на свещнице мысленнем,/ и скрижали ти вручи учений духовных,/ имиже,
святителю Феофилакте,/ и нас озари.
Кондак, глас 2
Светильник светел показался еси в концех,/ святителю
Феофилакте,/ единосущна Отцу и Духу Слова ты проповедав,/ Божественных отец
Собор уяснил еси,/ Троице угодник явился еси.// Ейже предстоя, моли непрестанно
о всех нас.
9/22
марта
40 мучеников, в Севастийском озере
мучившихся: Кирион, Кандид, Домн, Исихий, Ираклий, Смарагд, Евноик, Уалент
(Валент), Вивиан, Клавдий, Прииск, Феодул, Евтихий, Иоанн, Ксанфий, Илиан,
Сисиний, Ангий, Аетий, Флавий, Акакий, Екдикий (Екдикт), Лисимах, Александр,
Илий, Горгоний, Феофил, Дометиан, Гаий, Леонтий, Афанасий, Кирилл, Сакердон,
Николай, Уалерий (Валерий), Филоктимон, Севериан, Худион, Мелитон, Аглай.
Тропарь, глас 1
Болезньми святых, имиже о Тебе пострадаша,/ умолен буди,
Господи,/ и вся наша болезни исцели,/ Человеколюбие, молимся.
Кондак, глас 6
Все
воинство мира оставльше,/ на Небесех Владыце прилепистеся,/ страстотерпцы
Господни четыредесять,/ сквозе огнь бо и воду прошедше, блаженнии,/ достойно
восприясте славу с Небес/ и венцев множество.
Праведный Феодосий Балтский
(прославлен УПЦ)
Тропарь, глас 4
Покаяния проповедниче, Православия наставниче, / Церкве
Русския похвало и града Балты священное сокровище, / Феодосие преславне, /
престолу Божию предстоя, / моли спастися душам нашим.
Кондак, глас 5:
Крест служения священнаго восприим, / Подвигоположнику
Господу последовал еси / и, Тому усердно послужив, / многим образ доброделания
явился еси, / словесы и деяньми на стезю спасения наставляюще / и путь ко Христу
указующе, / Феодосие богомудре отче наш, / моли Христа Бога / да оставление
грехов подаст душам нашим.
10/23
марта
Праведный Александр (Баданин), иерей
Вологодский
Тропарь,
глас 4
Яко к Богу молитвенник усердный / и Духа Святаго стяжателю предивный, / христоподражательнаго смирения и кротости учителю / и веры твердыя насадителю, / Вологодский целебниче / и к Богу усердный подвижниче, / образ благодатныя духовныя жизни показал еси / и дивный прозорливец явился еси, / отче Александре блаженне, / моли Всеблагаго Бога // спастися душам нашим.
Кондак,
глас 8
Вышния красоты желая, земная блага оставил еси, / во юродство претворився волею, / мира сего красная отнюд возненавидел еси / и добре Богу угодил еси; / сего ради от Него чудесы прославися, / всякие человеческие недуги и язи душ исцеляюще. / Сего ради твою память чтуще светло празднуем, / отче Александре блаженне, / вознеси наша воздыхания ко Владыке мира, // мир всем испроси и душам нашим велию милость.
11/24
марта
Мученик Епимах
Кондак, глас 4
Многообразныя раны претерпел еси/ и венец прием от
Христа Бога,/ Емуже о нас молися, блаженне Епимаше,/ верно совершающих память
твою,// да спасет души наша.
Святитель Евфимий, архиепископ
Новгородский
Тропарь, глас 4
Избран быв Богови от юности,/ святителю Евфимие,/ и,
сего ради архиерейства саном почтен быв,/ упасл еси люди, иже тебе Богом
врученный;/ темже и по преставлении чудес дарования от Господа приял еси/
исцеляти различный недуги./ Того моли о нас,/ совершающих честную память твою,/
да тебе вси непрестанно ублажаем.
Кондак, глас 8
Яко архиереем сопрестольник/ и святителем изрядный
поборник был еси, святителю Евфимие,/ не престай сохраняя отечество твое,/ град
же и люди, иже тебе верою почитающия/ и честным мощем твоим покланяющияся,/ да
велегласно тебе вси вопием:/ радуйся, святителю Богомудре.
Святитель Софроний, патриарх
Иерусалимский
Тропарь,
глаc 8
Православию наставниче, благочестия учителю, Иероcалиму светильниче, архиереом богодохновенное удобрение, Софроние премyдре, учении Божеcтвеных вся исполнил еси, и в жизненыи путь наставль, к горнему шествию; угодниче Господень, моли Хриcта Бога, да спасет душа наша.
Кондак, глас 8
Иже
Божественною ревностию подвигся/ и истинных повелений устне распростер,/
церковная основания благоузаконив/ и тамо сущим монашеским составом предав,/
премудрый в Патриарсех Иерусалимский Софроние,/ всемудрая словеса во свет извел
еси,/ имиже наставляемы, зовем ти:/ радуйся, светлая православных похвало.
Святитель Софроний, епископ
Врачанский
Тропарь, глас 1
Щитом
веры вооружився,/ мечем словесе безбожныя агаряны посекая,/ стадо твое упасл еси
на земли./ В Небесней же обители вселився,/ Христа моли даровати народу нашему/
мир и велию милость.
Кондак, глас 3
Архиереев похвала и страдальцев украшение быв,/
святителю Софроние,/ добродетельми прославився,/ возсиял еси, яко солнце,/ нас
просвещая и греховную тьму неведения отгоняя./ Но, яко имея дерзновение к Богу,/
мир испроси душам нашим и велию милость.
12/25
марта
Преподобный Феофан исповедник,
Сигрианский
Тропарь, глас 5
Воздержанием житие украсил/ и, уды умертвив,/ победил
еси вражия козни, отче Феофане,/ преставился еси к Богу в вечную жизнь,/ яко
достоин причастник,/ моляся непрестанно/ помиловати души наша.
Кондак, глас 2
Свыше
прием Божественное откровение,/ со тщанием изшел еси от среды молвы житейский/
и, уединився, преподобне, чудес приял еси действо/ и пророчества достоинство,/
богатства и супружницы лишився.
Святитель Григорий Двоеслов, папа
Римский
Тропарь, глас 4
Иже
от Бога свыше Божественную благодать восприем,/ славне Григорие,/ и Того силою
укрепляема/ евангельски шествовати изволил еси./ Отонудуже у Христа возмездие
трудов приял еси, всеблаженне,/ Егоже моли,/ да спасет души наша.
Кондак, глас 3
Подобоначальник показался еси Начальника пастырем
Христа,/ иноков чреды, отче Григорие,/ ко ограде Небесней наставляя,/ и оттуду
научил еси стадо Христово заповедем Его,/ ныне же с ними радуешися и ликуеши в
Небесных кровех.
Преподобный Симеон Новый
Богослов
Тропарь, глас 3
Божественное озарение, Симеоне отче,/ восприяв в души
твоей,/ светило в мире показался еси светлейшее,/ разгоняя того мракобесие/ и
всех уверяя искати, юже погубиша, благодать Духа,/ Егоже прилежно моли/ даровати
нам велию милость.
Кондак, глас 3
Светом просвещен Трисолнечным, Богомудре,/ Богослов
явился еси Пребожественныя Троицы./ Свыше премудростию словес обогатився,/
источил еси Богомудрия Божественный струй,/ от нихже пиюще, вопием:/ радуйся,
треблаженне Симеоне Богонаученне.
13/26
марта
Святитель
Никифор
Кондак, глас 1
Лик
патриаршеский святую твою память/ хвалами и песньми, Никифоре, чествует,/ в
преложении бо прият душу твою, славне./ Тем днесь честная Церковь, величающи
Христа Царя,// славит Единаго Человеколюбца.
14/27
марта
Святитель Феогност, митр. Киевский и всея
Руси
Тропарь,
глас 4
Измлада, преподобне, прилежно подвизався, / вся законы Божественныя познал еси, / храмов Божиих строитель, / и защитник паствы твоея явися, / Темже яко престола святителя Петра наследника, / и святителя великаго чтуще тя, / молим чада твоя, блаженне: / от всех бед избави нас / яже ко Христу молитвами твоими, / святителю Христов Феогносте, отче наш.
Преподобный Венедикт
Нурсийский
Кондак, глас 4
Возгоревся рачением Горним и Святым Духом,/ вся
просветил еси, отче преподобне Венедикте священне,/ непрестанно моли Христа
Бога, преблаженне, о всех нас.
Благоверный великий князь
Ростислав-Михаил
Тропарь, глас 6
Обрете тя строителя градов и церквей / земля Киевская, /
великий княже Ростиславе, / смуты устранял еси, единство храня, / темже Господь
тебе мудрость низпосла, / сего ради Христу Богу молися / спастися душам нашим.
16/29
марта
Святитель Серапион, архиеп.
Новгородский
Тропарь, глас 8
Твердый адамант воистину, отче, показался еси, во всем
подобяся владыце своему святителю, неправедная изгнания, радуяся, претерпел еси:
темже и Христос святителем и мучеником сликовна тя сотвори и дарова тя стаду
твоему, яко сокровище неотъемлемо, чудесы всех обогащающа. Темже и мы, сошедшеся
к раце мощей твоих, любовию вопием ти: моли о нас, пречестный архиерею
Серапионе, отче наш!
Кондак, глас 3
Яко венцем, пресветлым украсися днесь великий Нов град,
и ликует в память пастыря своего и учителя, яко диадиму царскую возложши,
великая же она лавра светло радуется, идеже прослави Бог Своего угодника, и
прояви последнему роду нашему цельбоносныя мощи твоя, святителю Серапионе, и
Церкви Божия веселитися созывающи на славословие, велегласно вопиющи: радуйся,
граду твоему и обители похвала и всея Русския земли пресветлый
светильниче!
Мученик Савин
Кондак, глас 2
Божественная прозябения,/ цвет неувядающий,/ розга
многоплодная, богоносе Савине,/ иже верою чтущих память твою/ веселия твоего
исполни// и молися непрестанно о всех нас.
17/30
марта
Преподобный Макарий, игум. Калязинский,
чудотворец
Тропарь, глас 8
Плотская мудрования, отче Макарие,/ воздержанием и
бдением умертвил еси,/ место бо, на немже поты твоя излиял еси,/ яко труба,
вопиет к Богу,/ поведающи твоя исправления,/ и по смерти честныя твоя мощи
источают исцеления./ Темже вопием ти:/ моли Христа Бога, да спасет души наша.
Кондак, глас 2
Вышних желая, воздержанием, и труды, и поты насладився,/
желание плоти твоей обуздав,/ чудес дар прием от Христа Бога,/ светильник явился
еси пресветлый./ Темже Христова Церковь песньми славит тя,/ преподобне Макарие,
отче наш.
Преподобный Алексий, человек
Божий
Тропарь, глас 4
Возвысився на добродетель и ум очистив,/ к Желанному и
Крайнему достигл еси,/ безстрастием же украсив житие твое,/ и пощение изрядное
восприим совестию чистою,/ в молитвах яко безплотен пребывая,/ возсиял еси яко
солнце в мире,/ преблаженне Алексие.
Кондак, глас 2
Дом
родителей твоих, яко чужд, имев,/ водворился еси в нем нищеобразно/ и, по
преставлении венец прием славы,/ дивен на земли явился еси, Алексие, человече
Божий,// Ангелом и человеком радование.
Парфений (Краснопевцев) иеросхимонах,
Киево-Печерской лавры (прославлен УПЦ)
Тропарь,
глас 2:
Небесное отeчество возлюбив, суетнаго мира отвeрглся еси,
темже кротость, простоту и незлобие стяжaв, поревновал еси подвигом отцев наших
Печерских. Соименитый чистоте и девству, преподобне Парфение, киевская похвало,
моли Христа Бога спасти и просветити души наша.
Кондак,
глас 3:
Кто не удивится чистоте твоей, девственниче и
молитвенниче присный, сосуд бо Духа Святaго явился еси и молитвою о мире всем
возсиял еси. И ныне помяни нас у Престола Божия во Царствии
Небeснем.
Святитель Гурий (Карпов), архиепископ
Симферопольский и Таврический (прославлен как местночтимый святой
УПЦ)
Тропарь, глас
3
Духом Божиим, святителю отче наш Гурие, страну китайскую светом Евангелия
просветивый, ересей и расколов в земли Тавричестей добрый победителю, Слова
Христова в ней усердный насадителю, тем же и о чтущих многоцелебныя мощи твоя,
моли Христа Бога разум истины нам даровати и душам нашим велию милость.
Кондак, глас 8
Кротости и смирения богомудрый наставниче, милосердия и нестяжания дивный
поборниче, явивый свет Христова учения верным людем твоим, не остави нас,
святителю отче Гурие, любовию чтущих святую память твою!
Священномученик
Виктор
Тропарь,
глас 4 (общий бердянским
новомученикам)
Ликуй ныне, граде Бердянск, новомученицы бо твои досточуднии Михаил, Виктор и Александр, вземше крест Христов, последовали суть Ему и прияли славу небесную. Сего ради тем дерзновенно возопием: молите Царя Славы избавитися нам от находящих на ны зол и спастися душам нашим.
Кондак,
глас 3
От властей беззаконных гонения и муки смиренно претерпев, венцы нетленныя от Царя Славы стяжали есте. Святии священномученицы бердянстии, молите о молебная к вам приносящих и любовию песньми вас ублажающих.
18/31
марта
Святитель Кирилл, архиепископ
Иерусалимский
Кондак, глас 4
Языком твоим, мудре,/ Божественными вдохновеньми
просветил еси твоя люди/ едину чести Троицу,/ Естеством нераздельну, разделяему
же Лицы./ Темже, радующеся, всесвятую твою память празднуем,/ иже к Богу
молитвенника тя предлагающий.
19 марта/1
апреля
Преподобный Иннокентий, Комельский и
Вологодский чудотворец
Тропарь, глас 4
От юности сосуд избранен был еси/ и в житии Богу
послужил еси,/ иноков наставниче Иннокентие,/ потщался еси хуждшее покорити
лучшему,/ темже и страсти умертвив,/ возвысился еси к зрению красоты
несозданныя,/ в Бозе Емуже предстоиши,/ моли, отче, Христа Бога/ спастися душам
нашим.
Кондак, глас 4
Отечества, преподобне, удалився/ и вселився в пустыню,/
тамо жестокое житие показал еси и многих людей житием своим удивил еси./ Помилуй
нас, чтущих память твою, да зовем ти:/ радуйся, преподобне Иннокентие, отче
наш.
Преподобная Васса
Псково-Печерская
Тропарь, глас 4
Днесь, вернии, преславно ликовствуем, память преподобныя
Вассы совершающе, и раце мощей ея умильно покланяющеся, со слезами и любовию
вопием ей: буди ходатаица наша пред Богом, огради молитвами твоими обитель и
град наш, в скорбех и печалех нам буди утешительница, ты бо еси крепость верным,
и обители Псково-Печерския украшение.
Кондак, глас 4
Память преподобныя Вассы днесь светло совершающе,
благодарственне воспоминаем многотрудныя подвиги, естество бо женское отвергши,
со супружником твоим устремися к монашескому житию, да нетленными венцы венчает
тя Христос.
Мученики Хрисанф и Дария
Римские
Тропарь, глас 1
Приидите двоицу единомысленную
мученик почтим Хрисанфа, чистоты отрасль и смиренномудрую Дарию. Союзом святыя
веры связавшеся, Яко причастницы Бога Слова прославистеся, пострадавше за Имя
Его. И ныне заступницы есте за ны поющия: "Слава Укрепившему вас, Слава
Увенчавшему вас, Слава Дарующему вами всем исцеление!"
Кондак, глас 1
В добродетелех благоуханных, о
Хрисанфе, привел еси Дарию ко спасительней Истине. Купно бо во бранех змия,
источника всякаго зла, посрамисте и в Небесное Царство достойно
внидосте.
Праведная София, княжна
Слуцкая
Тропарь, глас 5
Блаженная мати Софие,/ нетлением мощей и чудес сиянием
почти тя Бог;/ поминающе твое праведное житие,/ тя молим испросити/ телесем
нашим здравие и душам спасение.
Кондак, глас 4
Приидите вси русстии жены, святую Софию восхвалим,
уподобившуюся мудрым девам, елей благодати Духа Святаго стяжавшим; темже умудри
тя Господь подвизатися во утверждении святыя Православныя веры и соблюдати
Церковь Его незыблему от ересей и расколов, сего ради благодарне вопием ти:
Радуйся, града Слуцка и всея земли нашей радосте и
утверждение.
20 марта/2
апреля
Преподобный Евфросин
Синозерский
Тропарь, глас 4
От юности твоей вперив ум твой к Богу,/ блаженне
Евфросине,/ мира же отвергся,/ вселился еси в пустыню непроходимую,/ и тамо, от
Господа укрепляемь,/ в молитвах и пощениих доблественне пожил еси,/ и жизнь твою
страдальчески/ убиением от сынов противления скончал еси,/ сего ради со
преподобными и мученики венчался еси,/ с нимиже и ныне предстоиши Престолу
Пресвятыя Троицы./ Сию моли, молим тя,/ оставление подати согрешений наших/ и
даровати нам велию милость.
Кондак, глас 8
Подражая житию древних отцев,/ Богомудре отче
Евфросине,/ красоту мира сего возненавидел еси,/ и, в пустыню вселився,/ веру
Христову, якоже щит, в сердце твое приял еси,/ с неюже изшел еси, яко добр воин
Царя Небеснаго,/ не на брань противу плоти и крове,/ но на брань противу козней
невидимаго врага,/ и сего вознесенную гордыню,/ по данней тебе от Духа Святаго
благодати,/ глубоким смирением твоим низложил еси,/ и от Небеснаго Мздовоздателя
неувядаемым венцем победы венчался еси./ Сего ради, сошедшеся любовию, вопием
ти:/ радуйся, отче Евфросине, пустынное украшение.
Преподобные отцы, во обители святаго
Саввы убиенные
Кондак, глас 4
Земных и тленных наслаждение/презревше яве,
преблаженнии,/ пустынное житие изволивше,/ мира же краснейшее, и пищи временный
возненавидевше,/ отонудуже сподобистеся Небеснаго Царствия,/ с лики мученик и
постник веселящеся./ Темже, чтуще память вашу,/ вопием вам прилежно:/ от бед
нас, отцы, избавите.
21 марта/3
апреля
Преподобный Пахомий
Нерехтский
Тропарь, глас 4
Житейския молвы, преподобне, отвергся и, яко птица,
обрет в пустыни безмолвие, и в ней водворився составил еси обитель Пресвятыя
Троицы, в молитвах же и трудех прилежа Богови, процвел еси яко финикс, быв образ
утешения духовнаго, преподобне отче Пахомие, моли Пресвятую Троицу спастися
душам нашим.
Кондак, глас 4
В пустыни безмолствуя, единствующу ти, богоносе, изыскал
еси Господа Бога же, не оставльша тя единаго в пустыни, повелением снидошася к
тебе братия, с нимже молящуся ти Господеви, Троице пречестен храм воздвигл еси,
в нем же предстоя, преподобне Пахомие, молишися о спасении душ
наших.
Преподобный Серафим
Вырицкий
Тропарь, глас 4
Яко
великаго молитвенника за землю нашу / и утешителя теплаго притекающих к тебе, /
ублажаем тя, вторый русский отче Серафиме, / вся бо яже в мире красная оставил
еси, / всем сердцем устремился еси к чертогам сладчайшаго Христа / и в годину
лютых гонений образ кротости и смирения всем был еси: / не престай и ныне
молитися за ны, / да в терпении обрящем путь покаяния / и с тобою выну славим
Пресвятую Троицу.
Кондак, глас 3
Возрадуйся паки, граде святаго Петра, / и малая весе
Вырица, возвеличися, / се бо светильник веры в тебе просиявает, / всеисцеляющий
бальзам нам источается, / новоявленный бо великий чудотворец, / любве и покаяния
наставник, / пророк и старец, / новый преподобный Серафим в тебе является.
22 марта/4
апреля
Священномученик Василий, пресвитер
Анкирский
Кондак, глас 8
Законно течение совершив/ и веру соблюл еси,
священномучениче Василие,/ сего ради мучения венцев сподобился еси/ и Церкве
столп непоколебим явился еси,/ Сына, Отцу Собезначальна и Духу исповедав,/
Троицу Нераздельную,/ Юже моли избавитися от бед чтущим Тя,/ да зовем ти:/
радуйся, Василие Богомудре.
Священномученик Василий, еп.
Прилукский
Тропарь,
глас 1
Святое житие твое украсив венцем мучения, возшел еси, радуяся, к небесным обителем. И ныне, предстоя Святей Троице, священномучениче Василие, моли за град твой, и вся люди, совершающия память твою.
Кондак,
глас 4
Елеем милости Христовы всяку душу уврачевав, и растерзав яко паучину козни велиаровы, копием Слова Божия диавола умертвил еси, святе, и прославился еси в Царствии Небеснем, отче священейший.
23 марта/5
апреля
Преподобный Никон, игумен
Киево-Печерский
Тропарь, глас 5
Христова винограда лоза явился еси, Богоблаженне
Никоне,/ гроздие принося Ему - добродетели твоя,/ и прочиих, к темже наставляя,/
приводил еси Христу Богу,/ Емуже, молим тя, молися за души наша.
Кондак, глас 4
Духовному твоему наставнику, отче Никоне, всячески
прилепився/ и от него наставляемь,/ во всем Христови поработився,/ монахов был
еси чиноначальник и преподобных сожитель,/ с нимиже Христа Бога моли непрестанно
о всех нас.
Праведный Василий, мученик и
страстотерпец, Мангазейский чудотворец
Тропарь, глас 8
Богатство видев чистыя души твоей, Василие,/ украсти
тщашеся праведных враг,/ подусти господина твоего,/ иже покраденнаго ради
богатства своего предав тя судии,/ и от того неповинне многия претерпел еси
муки,/ непобедим пребыв до смерти./ Тем, яко приемый венец страдания от всех
Владыки,/ моли всем от напастей свободным быти,/ чтущим любовию святую память
твою.
Кондак, глас 4
Страдание совершив, святе,/ погребения же честнаго не
сподобився,/ в тинное место ввержен/ и попираемь был еси от мимоходящих,/ но Бог
прослави мощи твоя чудесным явлением, Василие,/ прославляяйся во святых Своих,/
даяй страдальцем венец нетленный.
Праведный Павел
Таганрогский
Тропарь, глас 4
Отечества Небеснаго взыскуя, дом родителей твоих оставил
еси. / Тленное богатство мира презрев, / обогатился от Господа многими чудесы и
знаменьми. / Воздержанием, труды и молитвою насладился еси, / образ жития
благочестиваго являя. / Темже и ныне с верою приходящим к тебе / во всяцех
напастех помогавши. / Блаженне отче Павле, / моли Христа Бога / спастися душам
нашим.
Кондак, глас 8
От Небеснаго Врача дар исцелений приим, / разрешаеши
болезни наши телесныя и душевныя. / Божественныя благодати столпе от земли до
Неба явился еси, / о блаженне Павле, моли Христа Бога спасти град и люди, тебе
почитающия.
24 марта/6
апреля
Мученики Стефан и Петр
Казанские
Тропарь, глас 4
Мучеников двоица единонравная,/ Стефане и Петре
славнии,/ неверие соплеменников обличивше,/ Христу последовали есте,/ во Святую
Троицу веровати всех научающе,/ Еяже ради великия страдания приемше,/ молитеся о
нас ко Господу,/ да, избавившеся тьмы греховныя,/ Света явимся общницы
невечерняго.
Кондак, глас 3
Святии страстотерпцы Стефане и Петре,/ Троицы поборницы
преизряднейшии,/ мук треволнения и страшную смерть на вечную жизнь пременившии/
во граде Казани страдальчествовавшии,/ ныне же в Небесных чертозех Всецарю
предстоящии,/ от всяких нас грехопадений избавити Христа Бога молите,/ Той бо
есть верных утверждение.
Преподобный Захарий, постник Печерский, в
Дальних пещерах
Тропарь, глас 3
Постническаго ради твоего жития, блаженне Захарие,/ яко
приемый велию на бесы крепость,/ моли и нам техже козней избыти,/ получити
грехов прощение/ и велию милость.
Кондак, глас 1
В
постничестве светло яко просиявый/ и бесом страшен яко явивыйся,/ всечестне
Захарие,/ укрепи и нас твоими молитвами/ постническое житие имети/ и бесовскаго
избавитися злодейства,/ яко да ублажаем тя.
25 марта/7
апреля
Святитель Тихон, патриарх Московский и
всея Руси (прославление)
Тропарь, глас 1
Апостольских преданий ревнителя / и Христовы Церкве
пастыря добраго, / душу свою за овцы положившаго, / жребием Божиим избранного /
Всероссийскаго Патриарха Тихона восхвалим / и к нему с верою и упованием
возопиим: / предстательством святительским ко Господу / Церковь Русскую в тишине
соблюди, / расточенная чада ея во едино стадо собери, / отступившия от правыя
веры к покаянию обрати, / страну нашу от междоусобныя брани сохрани / и мир
Божий людем испроси.
Кондак, глас 2
Тихостию нрава украшен,/ кротость и милосердие кающимся
являяй,/ во исповедании православныя веры и любве ко ГосподУ/ тверд и
непреклонен пребыл еси,/ святителю Христов Тихоне./ Молися о нас, да не
разлучимся от любве Божия,/ яже о Христе Иисусе, Господе нашем.
Преподобный Савва
Новый
Тропарь,
глас 4
Рождением быв из Ганы и Хоры, / великая похвало острова Калимноса, / преблаженне Савво, отче наш, / се бо, путем подвижническим прошед, / высшаго конца достигл еси. / Темже моли Христа Бога // спастися душам нашим.
Кондак,
глас 3
Честных мощей твоих благоуханию, отче преподобне, / Божественное стадо твое верно радующеся, вопиет ти: // пришел еси, явлейся хранитель и избавитель наш.
26 марта/8
апреля
Архангел
Гавриил
Тропарь, глас 4
Небесных воинств Архистратиже,/ молим тя присно мы,
недостойнии,/ да твоими молитвами оградиши нас/ кровом крилу невещественныя
твоея славы,/ сохраняя нас, припадающих прилежно и вопиющих:/ от бед избави
нас,// яко чиноначальник Вышних сил.
Кондак, глас 2
Архистратиже Божий,/ служителю Божественныя славы,/
Ангелов начальниче и человеков наставниче,/ полезное нам проси и велию
милость,// яко Безплотных Архистратиг.
27 марта/9
апреля
Священномученик Ириней, епископ
Сармийский
Тропарь, глас 8
Жизнь
твою целомудренно совершил еси,/ ничтоже на земли паче Христа предпочет,/
радуяся, вшел еси на мученическое благославие,/ противяся мучителя повелению,/
явился еси венценосец священный,/ ибо Христос возмездие тебе дарова/ и всели тя
в Царство Небесное.
Кондак, глас 1
Многоболезненных мук искушения претерпел еси,/ но
непреклонен умом пребыл еси,/ мечем же усечен и в реку ввержен,/ речныя струй
освятил еси,/ сего ради восхваляем тя, отче Иринее,/ воспевающе священную и
мироспасительную память твою.
Преподобный Александр Вочский,
Галичский
Тропарь,
глас 4
Удалихся, бегая давидски, отче, мира и водворихся в
пустыни, и в ней процвел еси, яко крин благоуханен чистаго ради жития своего; в
чистоте бо сердца своего, преподобие, течение на земли скончал еси, во всем
ревнуя преподобному Авраамию: преподобный явися наставник иноком и постником
благое украшение; сего ради Господь, труды твоя видев, даром чудес обогати тя;
мы же, чада твоя духовная, вопием ти: радуйся, преподобие Александре, пустынная
отрасль.
Кондак,
глас 8
Веселися днесь Галичская Соль: память молебнаго торжества
преподобнаго Александра созывает праздновати всех Церковь Божия; в твоем
успении, премудре, днесь сошедшеся чета иноческая и христолюбивых сонмы,
восплещем руками и умильным гласом воззовем, глаголюще: радуйся, пустынный
жителю.
28 марта/10
апреля
Преподобномученик Евстратий
Печерский
Тропарь, глас 7
Постником и мучеником явился еси похвала, преподобне
Евстратие,/ прежде бо воздержанием плоть умертвив,/ последовал еси Христу, нося
крест свой./ Последи же и сам на крест вознесен быв/ и копнем в ребра прободен,/
в руце Божий душу предал еси./ Колесницею огненною возносим на Небеса,/ сугубо
венчался еси от Христа Бога/ и Спаса душ наших.
Кондак, глас 8
Яко ревнитель страсти Владычней/ и постников усердный
последователь сый,/ пленники учением твоим наставль, Христови привел еси,
Евстратие,/ и нас, плененных страстьми, мольбами своими свободи/ и подражатели
честному твоему житию покажи, зовущих:/ радуйся, испивый сладостне чашу
Христовых страданий.
Преподобный Иларион Гдовский,
Псковоезерский
Тропарь, глас 4
В молитвах бодрствуя,/ пресветлый храм Духа Святаго был
еси,/ темже и чудотворец предивный явился еси,/ преподобне отче наш Иларионе./ О
нас моли Христа Бога/ светом Божественнаго познания просветити ны/ и спасти души
наша.
Святой князь страстотерпец
Боян
Тропарь, глас 4
Якоже
Авель, от суда братняго смерть приял еси/ и кровь твою пролиял еси за
Искупившаго ны честною Своею Кровию./ От земнаго же к Небесному преставився
Царствию,/ княже и мучениче Енравоте-Бояне,/ моли Царя царей о нас, присных
твоих.
29 марта/11
апреля
Преподобные Марк, Иона, Корнилий и Васса
Псково-Печерские
Тропарь, глас 8
Яко светильницы, явистеся всесветлии/ в вертепе Царицы
Богоматери,/ преподобнии отцы наши Марко, Ионо и Корнилие,/ вы бо, крест Христов
на рамо вземше,/ усердно тому последовасте/ и, чистотою Богови приближившеся,/
отонудуже силами чудес обогатистеся,/ тем и мы любезно прибегаем к вам и умильно
глаголем:/ о преподобнии, молите Христа Бога/ спастися душам нашим.
Кондак, глас 2
Христовою любовию уязвившеся, преподобнии,/ и Того крест
на рамо вземше,/ понесли есте Божественне, вооружившеся на невидимыя враги/ и
непрестанный молитвы, яко копие, в руках имуще крепко,/ победили есте бесовския
ополчения,/ тем зовем вам:/ радуйтеся, преподобнии отцы наши Марко, Ионо и
Корнилие,/ верных удобрение.
30 марта/12
апреля
Святитель Софроний, епископ
Иркутский
Тропарь, глас 1
Скорый в бедах и скорбех заступниче,/ отче иерарше
страны Сибирский,/ святителю Софроние,/ на Небеси предстояй с первоиерархом
Иркутския Церкве и всеми святыми,/ выну имаши благоволение Господа славы,/
призри на люди, притекающия к честным останкам святых мощей твоих,/ с верою и
любовию слезно просящия твоея помощи и заступления,/ моли, Егоже проповедал еси
людем Сибири,/ избавити я от находящих зол и наветов вражиих,/ просветити людей
оляденевшая древле неверием сердца,/ даровати утверждение веры Христовы/ и
спасти души наша.
Кондак, глас 3
Пастырей Начальнику, Христу трудился еси, святителю
Софроние, на пажити духовней северныя страны нашея, языцы монгольстии от
прелести и скверны идольския избавляя, привел еси я к свету веры Христовой, и
ныне, со Ангелы Владычню Престолу предстоя, моли непрестанно о всех нас,
избавити ны от бед и спасти души наша.
Преподобный Иоанн Лествичник, игумен
Синайский
Тропарь, глас 8
Слез
твоих теченьми пустыни безплодное возделал еси,/ и иже из глубины воздыханьми во
сто трудов уплодоносил еси,/ и был еси светильник вселенней,/ сияя чудесы,
Иоанне, отче наш,/ моли Христа Бога спастися душам нашим.
Кондак, глас 1
Плоды
присноцветущия,/от твоей книги принося учения, премудре,/ услаждавши сердца, сим
с трезвением внемлющих, блаженне:/ лествица бо есть, души возводящая от земли к
Небесней и пребывающей славе/ верою чтущих тя.
Праведная Еввула, матерь великомученика
Пантелеимона
Тропарь, глас 1
Всерадостное дарование от Бога/ святым женам — святыя
дети;/ всерадостное даяние и тебе, святая Еввуло,— / святый великомученик
Пантелеbмон,/ милости тезоименитый,/ недугующих целитель и наш заступник./ Слава
убо о вас Всемилостивому Владыце,/ слава Подающему вами цельбы,/ слава
предстатели наши вас Показавшему.
Кондак, глас 3
Память твоя, Еввуло,/ веселит чтущих тя,/ матерь
славнаго Пантелеимона,/ с нимже Божию Престолу предстоящи,/ молися прегрешений
оставление дати нам.
31 марта/13
апреля
Святитель Иона, митрополит Московский и
всея России чудотворец
Тропарь, глас 3
Ярем
Господень измлада восприим,/ и Того стопам невозвратным желанием последовал
еси,/ и освященнаго подвига достигл,/ святительства паству приим и чудес от Бога
дары прият,/ с верою приходящим к раце мощей твоих/ подавши различным недугом
исцеление неоскудно,/ отче наш Ионо, святителю Христов,/ моли Христа Бога
даровати нам велию милость.
Кондак, глас 8
Желанием духовным постническое житие совершив/ и
святительства паству приим,/ чистоты ради телесный и тело твое Владыка Христос
соблюде нетленно/ и Петру чудотворцу наследника тя содела,/ и того нраву
последовал еси,/ и учителя тя Христос Своему стаду дарова,/ идеже лежат целебныя
мощи твоя,/ благоухают, яко от кадила благовонна,/ и подают исцеления немощным,
верою приходящим,/ святителю Ионо, моли Христа Бога непрестанно о всех нас.
Святитель Иннокентий, митр. Московский и
Коломенский
Тропарь, глас 1
Во вся страны полунощныя изыде вещание твое,/ яко
приемшия слово твое,/ ихже боголепно научил еси,/ неведущия Христа светом
Евангелия просветил еси,/ человеческия обычаи украсил еси,/ Российская похвало,
святителю отче наш Иннокентие,/ моли Христа Бога/ спастися душам нашим.
Кондак, глас 4
Истинный и наложный учитель был еси:/ заповеданная бо
Господам сам сотворив,/ имже учил еси и наказал еси ко благочестию приходящая
чада,/ неверныя вразумлял еси познати веру истинную,/ просвещая их святым
Крещением./ Сего ради со апостолы радуешися,/ приемля почесть благовестника
Христова.
Священномученик Ипатий, епископ
Гангрский
Тропарь, глас 4
Изволением Божественнаго разума/ вперив ум свой в
Небесныя обители/ и равно Ангелом житие пожив на земли,/ сего ради мучения
красоты венец на своем версе утвердив,/ священномучениче Ипатие,/ моли Христа
Бога/ спастися душам нашим.
Кондак, глас 2
Римскому отечеству светильник,/ Богозарными лучами концы
светя,/ ныне просвети твое празднество поющия, Ипатие,/ прося свыше мира и
грехов оставления,/ молитвами защити ны, Ипатие многострадально.
Преподобный Ипатий целебник, в дальних
пещерах почивающий
Тропарь, глас 1
Безначальнаго онаго и тихаго места,/ идеже несть печали,
ни воздыхания,/ достигнути, преподобне, желая,/ не дал еси себе зде покоя
нимало,/ но присно день и нощь в делех всяких/ и жестоком житии трудолюбно
подвизаяся, пребываеши,/ тем желаемого получил уже, Ипатие,/ молися о душах
наших.
Кондак, глас 3
Труды
ко трудом выну ради Господа прилагая,/ никогдаже обрелся еси празден, Ипатие./
Темже и в лепоту трудолюбив наречеся,/ звание приемь от
дел.
Преподобный Филарет
Глинский
Тропарь, глас 1:
Пустыни Глинския строитель / и боголюбивый игумен явился
еси, / Богоносе отче наш Филарете: / постом, бдением и молитвою Небесная
дарования прием, / исцеляеши недужныя и души верою притекающих ти. / Слава
Давшему тебе крепость, / слава Венчавшему тя, / слава Действующему тобою всем
исцеления.
Кондак, глас 4:
Празднует днесь обитель Глинская / праздник пресветлый
светоносныя твоея памяти, / созывая православных собори, / радуется бо, яко
стяжав сокровище велие — / честныя мощи твоя, преподобне Филарете, / юже
сохраняй всегда молитвами твоими от всех зол, да зовем ти: / радуйся, отче
богомудре.
Материалы
взяты с сайтов:
http://days.pravoslavie.ru/
http://ustavschik.livejournal.com/