Июнь
1/14 июня
Преподобный Дионисий Глушицкий
Тропарь, глас 6
Божественною любовию от юности распаляемь, Дионисие преподобне, вся, яже в мире красная, возненавидев, Христа единаго возлюбил еси и Сего ради во внутреннюю пустыню вселился еси, со зверьми живый, весь Христови. Отонудуже и Всевидящее Око, твоя труды видев, даром чудес и по преставлении обогатил тя есть. Темже вопием ти: моли непрестанно о всех нас, местную память твою присно в песнех почитающих.
Кондак, глас 8
Все твое умное желание к Богу вперив, Тому невозвратно от души последовал еси, в пустыню вселився, и, тамо анегльски пожив, многим путь был еси ко спасению; сего ради и Христос тебе прослави и даром чудес обогати. Темже вси вопием ти: радуйся, Дионисие преподобне, пустынный жителю.
Преподобный Агапит Печерский, врач безмездный, в ближних пещерах почивающий
Тропарь, глас 5
Богоноснаго Антония ревнуя смиренномудрию, аки некиим врачевством зелием снедным исцелял еси болящия, преподобне Агапите, тем и врача неверна уверив, наставил еси на путь спасения. Уврачуй и наша болезни и молися Господеви о воспевающих тя.
Кондак, глас 6
Врач сый изряден, чудне, являя несумненную твою веру, обличая же армениново неверие и приводя его к благочестию, себе, близ смерти бывшу, испросил еси от Бога продолжение живота и, сим чудом того уверив, привел еси Христови, Емуже в веселии предстоя, молися о нас, преподобне.
Преподобный Иустин (Попович) архимандрит, Челийский
Тропарь, гласъ 8
Православия сладость, / нектар премудрости, / отче преподобне, / излиял еси в сердца верных яко богатство; / животом своим и учением / показался еси живая книга Духа, / Іустине Богомудре, / моли Слова Христа Бога // ословесити чтущия тя.
Ин тропарь, глас 1
Умом созерцая таинства божественные, явился ты столпом веры и благочестия, догматы изъясняя, Церковь же в Сербии молитвами на родном языке обогащая, явился ты поистине апостолам равночестным и преподобных краса. Слава Давшему тебе мудрость, слава Говорившему через тебя, слава давшему через тебя Церкви Своей молитвословия на родном языке.
Кондак, глас 8
Богочеловечно живот свой / одобродетельствовал еси, / мерилом всего имел еси Богочеловека, / Им же богословия высоты достигл еси, / ныне Им вечно наслаждаешися. / Даруй нам благодать святыми твоими молитвами, / верою зовущим: // радуйся, отче Богоносне!
Ин кондак, глас 1
Услышав слово Писание, говорящее: «Песнь Богу пойте разумно», о разумном служении народа твоего сердцем весьма возгоревшись, уподобившись в том богомудрым учителям словенских народов, совершил перевод богослужебных книг к назиданию и служению верных, дабы стоящие во храме, внимая священным словесам, просвещали свои мысли и сердца, по слову апостольскому, разумно отвечая «аминь» на молитвословия Церкви. Подвиги твои почитая, молим тебя, отче наш Иустине, Христа Бога моли даровать мир Церкви Своей, сердца венных просветить богопознанием и устроить служение наше в разуме.
2/15 июня
Великомученик Иоанн Новый, Сочаевский
Тропарь, глас 4
Житие на земли добре окормляя, страдальче, милостынями, и частыми молитвами, и слезами, паки же ко страданию мужески устремився, был еси утверждение и христиан похвало, Иоанне приснопамятне.
Кондак, глас 4
Морскую плавая пучину куплею, от востока тщался еси к северу, но Богу призвавшу тя, якоже Матфей мытницу, ты же куплю оставль, и Тому последовал еси кровию мучения, временными искупив непроходимая, венец приял еси непобедимый.
Святитель Никифор исп., патриарх Константинопольский
Тропарь, глас 4
Правило веры и образ кротости,/ воздержания учителя/ яви тя стаду твоему/ Яже вещей Истина:/ сего ради стяжал еси смирением высокая,/ нищетою богатая,/ отче Никифоре,/ моли Христа Бога// спастися душам нашим.
Ин тропарь святителя Никифора, глас 4
Иже первороднаго Царства отец,/ правоверный службы истинный пастырь бысть, преподобие,/ Царя града, Церкви всех матере явися светильник, Никифоре,/ моли Христа Бога,/ да спасет души наша.
Кондак, глас 4
Победы венец с Небесе,/ о Никифоре преславне,/ яко прием от Бога,/ спасай верою почитающия тя,// яко священноначальника Христова и учителя.
Праведная Иулиания, кн. Вяземская, Новоторжская (обретение мощей)
Тропарь, глас 2
Благочестно в законе поживши/ и благими делы украсившися,/ яко крепкий адамант, явися,/ целомудренная святая благоверная княгине Иулиание,/ тленную славу и добротство телесное презревши,/ злокозненнаго врага победила еси,/ целомудрия ради мученическую смерть прияла еси./ Сего ради от Христа Бога нетленным и вечным венцем венчавшися,/ ныне с лики мученик ликуеши/ и нам велия чудеса, приходящим ко гробу твоему,/ обильно источавши./ Темже ти вопием:/ молися Христу Богу о всех нас,/ верою и любовию страдания твоя почитающих.
Кондак, глас 2
Воспоем днесь Благодетеля всех Бога,/ прославльшаго в России Иулианию Богомудрую,/ да молитвами ея подаст душам нашим/ грехов оставление и велию милость.
3/16 июня
Благоверный царевич Димитрий Угличский (обретение мощей)
Тропарь глас 3
Днесь вельми хвалится царствующий град Москва,/ имея в себе праведныя твоя мощи,/ благоверне царевиче Димитрие,/ яко цвети благоуханнии,/ пребываеми во святем храме,/ просвещение подают душам и телом нашим./ Тем радостно тя восхваляем,/ и честное пренесение мощей твоих верно почитаем, и молим тя:/ моли Христа Бога// даровати нам велию милость.
Ин тропарь, глас 2
Яко благочестиваго корене Боголюбивый произыде плод,/ яко агня незлобиво, неповинно во младенстве заклан бысть/ от властолюбца вкупе и злаго раба./ Тем, яко златыми крылы,/ душевною чистотою и младенческим незлобием/ к Небесней высоте возлетел еси, страстотерпче Димитрие./ И ныне,кровь твоя от земли тайно вопиет к Богу,/ яко Авеля праведнаго./ Сего ради покланяемся верою ти,/ славяще прославльшаго тя Бога,/ Егоже моли стране нашей богоугодней быти/ и сыновом русским спастися.
Кондак, глас 4
Яко пресветлая звезда,/ явился еси днесь в царствующем граде Москве,/ благоверне царевиче Димитрие,/ сияя праведными своими мощми./ К нимже притекающе, исцеления дар приемлем и глаголем:/ радуйся, всекрасне душею,/ благородне Димитрие,/ яко приял еси от Бога велий сей дар// и венец нетленный.
4/17 июня
Святитель Митрофан, патриарх Константинопольский
Тропарь, глас 4
Правило веры и образ кротости,/ воздержания учителя/ яви тя стаду твоему/ Яже вещей Истина,/ сего ради стяжал еси смирением высокая,/ нищетою богатая,/ отче священноначальниче Митрофане,/ моли Христа Бога// спастися душам нашим.
Кондак, глас 4
От младенства явился еси честен сосуд,/ святитель быв избран Богу, Емуже с веселием взывал еси:// равен еси, Христе, Отцу и Духу.
Иный кондак, глас 2
Веру Христову ясно ты проповедал еси/ и, сию соблюдая,/ во множество воистинну возрастил еси верное твое стадо./ Темже со Ангелы, Митрофане, срадуешися,// Христу моляся непрестанно о всех нас.
Священномученик Иоанникий, митрополит Черногорско-Приморский
Тропарь, глас 1
Кровь твоя, и священства твоего / и народа твоего верного, / за Господа пострадавших, / словно Авелева кровь, вопиет небу, / священномучениче Иоанникие, / архипастырю Цетиньский, / а ныне ты и чада твои, / собранные в Царствиии Небеснем, / молите Христа Бога, / да укрепит Он в нас веру правую / и дарует свободу святую / многострадальному сербскому и / всему православному роду христианскому.
Кондак, глас 4
Сотаинниче Пресвятыя Троицы, / учитель мудрости и страха Божия был еси, / Иоанникие победоносче. / Примером добродетели словом и делом был еси / священству и народу своему, / разделив с ним мученичество Христа ради, / и имя Божие прославил еси. / Егоже новомученицы молите / просветить и спасти души наша.
Преподобный Мефодий, игумен Пешношский
Тропарь, глас 8
Божественною любовию от юности распаляемь, вся, яже в мире красная, возненавидев, Христа Единаго возлюбил еси, и, сего ради в пустыню вселился, в ней обитель сотворил еси, и, собрав инок множество, приял еси от Бога чудес дар, отче Мефодие, и был еси о Христе собеседник и спостник преподобному Сергию, с нимже у Христа Бога испроси православным христианом зравие, и спасение, и душам нашим велию милость.
Кондак, глас 4
Послушания добрый рачитель быв, безплотныя враги слезными молитвами твоими крепко посрамил еси и явился еси Пресвятыя Троицы жилище, Юже зря, блаженне, ясно, богомудре Мефодие преподобне, чудес дар от Нея приял еси. Темже исцеляеши с верою приходящих недуги, утоляеши скорби и молишися непрестанно о всех нас.
Праведные Марфа и Мария, сестры праведного Лазаря
Тропарь, глас 3
Праведнаго Лазаря боголюбивыя сестры, / Марфо и Марие преславныя, / чистым сердцем Христа в житии вашем возлюбили есте, / мироносиц вземша чин, / и Его, яко Сына Божия, безбоязненно исповедали есте: / сего ради ныне во обителех Отца Небеснаго / со ангелы и всеми святыми славно царствуете. / Умолите, Егоже возлюбили есте, / и нам грешным в вере и любви Христове утвердитися / и Царствия Небеснаго сподобитися.
5/18 июня
Святитель Констатин, митрополит Киевский
Тропарь, глас 4
Апостолов преемниче, архиереев сопрестольниче, России всея пастырю и учителю, всеблаженне отче Константине, Владыце всех молися мир пастве твоей даровати и спасение душам нашим и велию милость.
Кондак, глас 8
Звезду российскую, от Киева возсиявшую и Чернигов блаженною кончиною своею озарившую, всеблаженнаго святителя Константина почтим, просяще его молитися Христу, да подаст мир стране нашей и душам нашим велию милость.
Священномученик Дорофей, епископ Тирский
Тропарь, глас 5
Нищелюбием обогатився/ и милость воздержания источив,/ наслаждения Царствия Небеснаго сподобися,/ страдальчески беды приим по стаде своем,/ и апостолом обретеся ссельник,/ отче священномучениче Дорофее,/ моли Христа Бога/ спастися душам нашим.
Кондак, глас 5
Добродетельми сияя, и Божественными учении паче солнца,/ и страдании, блаженнее, облистал еси,/ просветил еси землю, Дорофее, отгнав мглу многобожия и лютыя ереси.// Сего ради память твою светло празднуем.
Священномученик Михаил (Вотяков) протоиерей, Чистопольский
Тропарь, глас 3
Православныя веры проповедниче, / Слова Божия учителю добрый, / заповедей Христовых хранителю твердый, / ересей зловредных и богоотступничества обличителю. / Всея земли Чистопольския священное украшение. / В мученическом исповедании Христа ради пострадал еси / и кровьми своими землю Казанскую освятил еси. / Ныне же предстоя Престолу Божию, / Священномучениче Михаиле, / Моли Человеколюбца Бога / О прощении безчисленных прегрешений наших, / да очистивше душу покаянием, / обрящем наше Вечное наследие // и прославим, воспевающе, Троицу Святую.
Преподобные Вассиан и Иона Пертоминские, Соловецкие чудотворцы
Тропарь, глас 8
Прежде отвержением мира, яко морскаго треволнения, избегосте, отцы преподобнии, послежде же, изволением Божиим, в водах морских кончину блаженную приясте и к неболезненному покою преставистеся от земли, радующеся. Тем и по кончине от Христа Бога прославистеся чудесы обильно, теплии в бедах верным помощницы показастеся, и ныне на небесех предстояще Престолу Христову, Вассиане преблаженне и Ионо преславне, молитеся присно о душах наших.
Кондак, глас 2
Яко сокровище богатно, верным Божественная благодать из морских недр издаде мощи ваша, отцы преблаженнии, и в месте пусте целы и невредимы обретошася преславно, и тако вас ради ныне славится Бог, Емуже со дерзновением предстояще ныне на небесех, Вассиане и Ионо досточуднии, молитеся непрестанно о всех нас.
Преподобный Петр Коришский
Тропарь, глас 4
Любовию Христовою просвещен, / измлада возлюбил еси монашеское житие / и, возненавидев всякое плотское наслаждение, / житие твое исполнил еси терпением, постом и молитвами, / просиял бо еси добродетельми, яко светлое светило, / и ныне, усердно молим тя, / моли Христа Бога / сохранити отечество наше и весь крестоносный народ сербский // и всем даровати велию милость.
Кондак, глас 2
Величием подвиг твоих возсиял еси / и озарил еси, богомудре, вся концы земныя. / Темже, и умер, прешел еси / от света к Свету возсиявшему. / Мы же ныне вопиемти: / просвети наша помышления, Петре, отче наш, // и моли непрестанно о всех нас.
Благоверный князь Феодор Ярославич Новгородский (брат святого блгв. князя Александра Невского)
Тропарь, глас 8
От благочестиваго корене отрасль благочестивая прозябл еси и, скончався в юности, лета долга твоими добродетельми исполнил еси, благоверный княже Феодоре, сего ради Владеющему временами молися, да молитвами твоими подаст нам долготу лет и низпослет стране нашей велию и богатую милость.
Кондак, глас 4
В благочестии рожденна, в страсе Божии воспитана, в житии целомудрие стяжавшаго, по успении же нетлением телесе просиявшаго, благовернаго князя Феодора во святых почитая, смиренно молим Тебе, Всесильный Владыко, да и во веки прославляеши святыми Твоими страны наша Российския.
Благоверный великий князь Игорь Черниговский и Киевский (перенесение мощей)
Тропарь, глас 4
Наста днесь всечестная память страстотерпца благовернаго князя Игоря,/ созывающая люди в пречестный храм Спасов,/ идеже радостно сошедшеся благочестивых множество/ молитвенно празднуют святую память твою,/ и с верою взывают ти:/ молися, святе, стране Российстей, граду Чернигову и всем православным христианом/ в мире и благоденствии спастися.
Кондак, глас 6
Изменил еси земнаго княжения славу/ во иночества образ смиренный/ и страдальчески земное житие скончав,/ ныне на Небесех радуешися,/ усердие моляся/ о чтущих тя, Игоре, страдальцев похвало.
Благоверные Олег Великий, в схиме Иоаким, и супруга его Евфросиния, во иночестве Евпраксия, кнн. Рязанские
Веселися и радуйся, земле Рязанская, совершается память Благовернаго князя Олега, во святей схиме Иоакимом нареченного, возлюбившаго тя паче души своея. О могуществе и славе твоея тщавшагося и ныне предстоя престолу Вседержителя, с супружницею своею мудрою монахинею Евпраксиею, умоляют непрестанно Владыку Христа сохранити Отечество наше в мире и благоденствии, и спасти души наша.
Кондак, глас тойже
Любовь к Отечеству в сердце своем всегда имея, благоверный княже Олеже, попечение о Рязанстей земли наипаче прилагал еси, с преподобным Сергием сладце беседовав, вечный мир с московским князем святым Димитрием заключил еси и браком сына своего Феодора с дщерию его Софиею союз скрепил еси. Ты бо Рязанския земли похвала и утверждение.
6/19 июня
Святитель Иона, епископ Великопермский
Тропарь, глас 4
Святителю Церкви Великопермстей, истинный хранителю апостольских преданий, столпе непоколебимый Православия, благочестия учителю, Ионо святителю блаженне, Владыку всех моли мир пастве твоей и всей Русстей земли даровати и всем нам спастися.
Преподобный Иона Клименецкий, Олонецкий
Тропарь, глас 4
Ангельскому житию поревновав, блаженне Ионо, оставил еси отечество твое, Великий Новоград, и, пришед в пределы Олонецкия и в пустыню вселився, в труде, молитвах и слезах подвизался еси, и, яко мудрый купец, Царствие Небесное наследовал еси. Темже любовию вопием ти: моли Христа Бога, да спасет души наша.
Кондак, глас 2
Христовым стопам последователь быв, блаженне Ионо, радуяся, вселился еси в пустыню, Вышняго Промыслом наставляемь, и, не убоявся вражиих приражений, якоже столп непоколебим, уготовил еси себе в жилище Духу Пресвятому, мы же, память твою совершающе, вопием радостно: радуйся, яко озаряеши нас чудесы твоими; радуйся, яко оставил еси временная ради будущих благ. Радуйся, яко возставляеши ленивых ко спасению. Моли убо Христа Бога, отче преподобне, да спасет души наша в день судный.
Преподобный Паисий Угличский
Тропарь, глас 8
Христовы ради любве отечество и род оставил еси и, ангельскому житию поревновав, в пустыню вселился еси, в нейже многотрудное житие явил еси и чудес дарования от Бога приял еси, Паисие преподобне, моли Христа Бога спастися душам нашим.
Кондак, глас 8
Украшен добродетельми, преподобне Паисие богодухновенне, Церкве Христовы красота был еси, подвиги бо иноческими украси ю, блаженне. Темже молим тя: молися ко Господу свободити нас от всякия брани борителя, вопиющих ти: радуйся, отче преблаженне.
Преподобноисповедник Рафаил, священноинок Оптинский
Тропарь, глас 1
Верный ученик Христа даже до смерти быв, / преподобне Рафаиле исповедниче приснопамятне, / подвиги бо поста и кровию мучений / землю Русскую освятил еси. / Тем же и мы, чада твоя, любовию вопием ти: / слава Давшему тебе крепость, / слава Венчавшему тя, / слава Прославльшему тя с новомученики и исповедники Российскими.
Преподобный Виссарион, чудотворец Египетский
Кондак глас 2
Вышних сил подражав, преподобне,/ образом птиц житие пожил еси,/ временная в забытии положив,/ непрестанным желанием влеком к Небесным добротам Христа Царя,/ дондеже Того достигл еси, Висарионе,// моли непрестанно о всех нас.
Преподобный Илларион Новый
Кондак глас 2
Ограды живоносныя твоея пажити,/ пастырски невредимо стадо соблюл еси/ и явился еси высотою дел велик, новый Иларионе,/ по благочестии многи муки и скорби прием:/ тем во всерадостный живот вселився Горняго Сиона,// моли за ны, преподобне.
7/18 июня
Священномученик Андроник, архиепископ Пермский
Тропарь, глас 5
Меч духовный взем, священномучениче, за Церковь и Отечество воинствовал еси; и духом пламенея, богомудре, любовь Христову стяжал еси. Жизнь убо временную ни во что вменив, в жертву себе принесл еси. Мы же, грешнии, молим тя, святителю Андрониче, неотступным буди ходатаем за нас пред Богом.
Кондак,
глас 4
Якоже апостол славный Павел, простотою себе украсил еси; почестей и славы
избегая, в чистоте пред Богом подвизался еси; архипастырство тяжкое пронесый,
Небесному ныне Архиерею предстоиши.
Мученицы Валерия, Кириакия и Мария, в Кесари Палестинской пострадавшие
Кондак, глас 2
Вере Христовой прилепившеся, / и неложная обетования Божия возлюбивше, / живота вечнаго и блаженства райскаго чающе, / мучения твердо претерпели есте, / и под меч выи усердно преклонили есте; / темже и от руки Господни увенчалися есте, / Кириакие, Валерие и Марие, / и память ваша славна. / Молите, страстотерпицы, подвигоположника Христа Бога // о чтущих ваша подвиги верно.
8/21 июня
Великомученик Феодор Стратилат
Тропарь, глас 4
Воинствословием истинным, страстотерпче,/ Небеснаго Царя воевода предобрый был еси, Феодоре,/ оружиями бо веры ополчился еси мудренно,/ и победил еси демонов полки,/ и победоносный явился еси страдалец./ Темже тя верою// присно ублажаем.
Кондак, глас 2
Мужеством души в веру оболкийся/ и глагол Божий, аки копие, в руку взем, врага победил еси,/ мучеников превелий Феодоре,// с ними Христу Богу моляся не престай о всех нас.
Святитель Феодор, епископ Ростовский и чудотворец Суздальский
Тропарь, глас 8
В молитвах бдя, сердцем же болезнуя, выну о стаде твоем выну болезнуя, учением своим всех просветил еси, Феодоре премудре, темже Христа Бога моли в день памяти твоея даровати нам велию милость.
Кондак, глас 3
Яко велие солнце, возсия преславная память твоя, премудре Феодоре, в нейже подаваеши в бедах сущим спасение, притекающим к тебе усердно, благодатию, еюже облагодати тя Христос в жизни нескончаемой.
Страстотерпцы благоверные князья Василий и Константин Ярославские (обретение мощей)
Тропарь, глас 2
Ваше отечество хвалится обагрением кровей ваших, Церковь же Божия радуется, приемши телеса ваша, людие, песненный лик составльше, духовною цевницею вопиют: ликуй, Василие, радуйся, Константине, Ярославлю и всей России радосте.
Кондак на преставление, глас 8
Яко цвети честнии различнии, в райстей пищи процветше невещественно, отечеству своему славу велию и сродникам похвалу и честь явльше, всеистиннии победницы, великий Василие и славный Константине, но убо не престайте молящеся о граде нашем и о всех рабех своих, избавити их от напастей, и бед, и всяких лютых обхождений, вопиющих вам: радуйтеся, граду нашему Ярославлю великое утверждение.
Кондак на обретение мощей, глас 4
Днесь Церковь разширяет недра своя и приемлет многоцелебныя мощи ваши, добропобеднии страдальцы, Василие славне и Константине богомудре, и. яко шипок благовонный, напояется пречудными ароматы, богатными чудодеянии от неистощимых сокровищ, от преславных мощей ваших, и радостно чад своих созывает вопити, людие: радуйся, двоице пречудная, отечеству своему стено необоримая.
9/22 июня
Святитель Кирилл Александрийский
Тропарь, глас 8
Православия наставниче,/ благочестия учителю и чистоты,/ вселенныя светильниче,/ архиереов богодухновенное удобрение,/ Кирилле премудре,/ ученьми твоими вся просветил еси,/ цевнице духовная,// моли Христа Бога спастися душам нашим.
Кондак, глас 6
Бездну нам учений богословия источил еси/ яве от источник Спасовых,/ ереси погружающую,/ блаженне Кирилле,/ и стадо невредимо от треволнений спасающую,/ странам бо всем наставник, преподобне,// яко Божественная являя.
Преподобный Кирилл, игумен Белозерский
Тропарь, глас 1
Яко крин, в пустыни давидски процвел еси, отче Кирилле, злострастия терние искореняя, и собрал еси в ней ученик множество, страхом Божиим и учением твоим наставляемых, ихже и до конца, яко чадолюбивый отец, не оставил еси, посещая, да вси вопием: слава Давшему ти крепость, слава Венчавшему тя, слава Действующему тобою всем исцеления.
Кондак, глас 8
Яко преобидев тленная и долу влекущая мудрования, отче, к вышнему течению радостно устремился еси, и тамо со святыми Пресвятей Троице предстоя, моли от враг сохранитися стаду твоему, яко да, святое твое успение празднующе, вопием: радуйся, преблаженне Кирилле, отче наш.
Преподобный Александр, игумен Куштский
Тропарь, глас 8
Во плоти, яко Ангел, на земли подвизася, желанием духовным в пустыню вселился и, со зверьми живый, весь Христови быв, Тому невозвратно шествовал еси, ведом к небеси, последуя Божественным стезям, отче блаженне Александре, яко чуден, чудеса источаеши и отгоняеши недуги к тебе приходящих с верою, но яко имея дерзновение ко Господу, поминай нас, чтущих честную память твою.
Кондак, глас 8
Иже земная оставль, в пустыню вселився, Христовым стопам последовал еси, тепле, и Того, славне, на раму свою честный крест взем, умертвил еси плоти взыграния труды постническими и желанием духовным, всеблаженне, темже зовем ти: радуйся, Александре, пустынный жителю.
Праведный Алексий Мечев
Тропарь, глас 5
Помози в бедах, утеши в скорбех, / пастырю добрый, отче Алексие, / подвигом бо старчества миру просиявый, / веру и любовь Христову во мраце беззакония исповедал еси, / болезнуя сердцем о всех притекающих к тебе. / И ныне за ны Бога моли, / любовию чтущия тя.
Кондак, глас 8
Простотою веры высоты смирения достигл еси; / в молитве и доброделании подвизаяся, дарами духовными обогатился еси; / светом Христовым просветился, помощниче и утешителю отче Алексие. / И ныне веру нашу укрепи и любви ко Господу и ближним научи, / и ко спасению приведи молитвами твоими.
10/23 июня
Святитель Иоанн, митрополит Тобольский
Тропарь, глас 2
Явился еси во тьме неведения пребывающим просветитель, вдов и сирот утешитель, дивный врач немоществующих, младенцев и отроков наставник, родителем же пресветлое радование, святителю отче Иоанне, моли Христа Бога подати стране нашей в вере утверждение, воинству нашему на враги победу и одоление, людем же своим велию милость.
Святитель Павел, митрополит Тобольский
Тропарь, глас 3
Прославим, вернии, благочестие возлюбившаго и от юности иго Христово усердно восприимшаго, ревностнаго святителя Церкви Российския, в богоспасаемом граде Тобольске подвизавшагося. Ты же, богомудре Павле, телом убо в нетлении почивая, духом же Престолу Божию предстоя, моли спастися всем нам.
Кондак, глас 8
Звезду церковную, от Киево-Печерския лавры возсиявшую и чрез Новград в Сибирскую страну достигшую, идеже ревностно служением своим сияющую, святителя почтим, Тобольския митрополии столетие венчавшаго: радуйся, отче Павле, всея Сибири чудотворче.
Святитель Василий, епископ Рязанский
Тропарь, глас 4
Первее в Муроме святительством почтен был еси, из негоже неправедно изгоняем, на мантию, яко на легкий корабль, возшел еси, на нейже паче естества, яко безплотен, по водам шествие творя, промышлением Вышнего и заступлением Богоматере управляемь, богоспасаемого града Рязани достигл еси и в нем, архиерейства престол восприим, богоданную паству рязанскую добре упасл еси, святителю отче наш Василие, моли Христа Бога спастися душам нашим.
Кондак, глас 8
Яко многосветлая звезда, от града Мурома возсиял еси, святителю Василие, по водам же дошед до града нашего Рязани, Церковь Божию добре упасл еси, просвещая люди учением и житием твоим. Поминай и ныне чада твоя, молим тя, наставниче наш добрый, и за ны Христу Богу и Пречистей Его Матери молися, да благодарною душею зовем ти: радуйся, угодниче Христов и теплый к Богу о нас молитвенниче.
Собор Сибирских святых
Тропарь, глас 4
Церкве Христовы светильницы, всея России украшение, страны Сибирския просветителие, от тьмы древняго неверия и прелести идольския люди избавльшии, наставницы благочестия, святителие Христовы: Димитрие, Иннокентие, Иоанне, Софроние, Павле, Мелетие и апостоле Иннокентие с праведными Василием страстотерпцем и Симеоном Верхотурским, Престолу Господа Вседержителя предстояще, Владыку всех молите мир вселенней даровати и душам нашим велию милость.
Кондак, глас 3
Днесь Собор Сибирских святых предстоит в Церкви и невидимо за ны молится Богу, Анегли со архиереи славословят, апостоли же с мучениками ликовствуют, святии вси Церкве Христовы радуются и паства сибирская веселится: вси бо купно молят Превечнаго Бога.
Собор Рязанских святых
Тропарь, глас 8
Святии вси в земли Рязанстей и Муромстей просиявшии, / приснии наши молитвенницы и заступницы, / молите Владыку Христа Бога нашего / мир вселенней даровати и душам нашим велию милость.
11/24 июня
Апостолы Варфоломей и Варнава
Тропарь, глас 3
Язык огнедохновен в силе Духа приемше,/ во плоти пришедшее Слово проповедаете всюду,/ Егоже ради ов во главу усечен,/ ов же камением побиен,/ и есте апостольскому лику украшение,/ Варфоломее и Варнаво,/ темже память вашу почитаем и просим:/ молите Христа Бога подати нам грехов оставление.
Кондак апостола Варфоломея, глас 4
Явился еси великое солнце вселенней/ учений сияньми и чудес страшных,/ световодя почитающия тя,/ Варфоломее,// Господень апостоле.
Кондак апостола Варнавы, глас 3
Господень был еси всеистинный служитель,/ апостолов же явился еси седмидесятих первый,/ озарил еси и с Павлом проповедь твою,/ всем возвещаяй Христа Спаса,/ сего ради песнопении// Божественную память твою, Варнаво, совершаем.
Преподобный Варнава Ветлужский
Тропарь, глас 1
Желанием духовным распалився и мятежи мирския отринув, к Богу любовию прилежно присовокупися. И того вседушне взыскуя, во внутреннюю пустыню отшел еси, при водах вселился, идеже во слезах и трудех пребывая многолетное время, в терпениих мнозех житие ангельское проходил еси в наставлении Божественнаго разума и множество монахов собрал еси, мудре, ихже, посещая, не остави, Варнаво преподобне, отче наш, Пресвятей Троице моляся от зол всяческих избавити и спасти души наша.
Кондак, глас 8
От юности, преподобне, плоть твою в постех и молитвах источил еси и, крест твой взем, усердно последовал еси Христу, тем же и к Вышним течение радостно совершил еси, идеже со всеми святыми предстоиши. И ныне стадо твое посещай, поминая чтущих всесвятую память твою, да вси благодарственно вопием ти: радуйся, богомудре Варнаво, наставниче пустынный.
Преподобный Ефрем Новоторжский
Тропарь, глас 1
Божественною свыше благодатию просветився, Богомудре, / и по смерти яви тя светлость жития твоего, / темже источаеши мирови благоухание, / иже с верою притекающим к раце мощей твоих, Ефреме преподобне. / Тем вопием ти: / слава Давшему ти чудесем благодать, / слава Прославльшему тя в чудесех, / слава Действующему тобою всем исцеления.
Кондак, глас 8
Светозарную лучу похвалим, преподобне,/ твою честную раку,/ многосветлою свещею просвещает бо Господь церковь твою от цельбоноснаго гроба твоего/ и озаряет омраченная наша сердца./ Якоже солнце незаходимое, отче,/ подобие образа твоего возсия нам,/ и град Торжек тобою благодать приемлет,/ обогащающу ти всех нас добротою чудес,/ содеянием благодати поющих ти: аллилуйя.
12/25 июня
Преподобный Арсений Коневский
Тропарь, глас 4
Духом Божиим наставляемый, возлюбил еси безмолвие, в немже евангельски подвизавшуся, пречудный Афонский дар – Богоматере икона, даровася ти, всеблаженне, и, образ добродетелей быв стаду твоему, Арсение отче наш, Горнему торжеству возшел еси, идеже со Ангелы ликовствуя, моли Христа Бога спастися душам нашим.
Кондак, глас 8
Трисиятельного Божества сиянием просветив сердце твое, преподобне, световиден весь явился еси добродетельми, яко и Гору Афонскую свет трудолюбия твоего озари, идеже святую икону Солнца истиннаго, Христа, и Его Пречистыя Матере в дар приим, на остров Нева езера пришед, обитель устроил еси, всеблаженне. Тем, верою и любовию к тебе притекающим, радостно вопием: радуйся всесветлый светильниче, Арсение, отче наш.
Преподобный Онуфрий Великий
Тропарь, глас 1
Желанием духовным пустыни достигл еси, богомудре Онуфрие,/ и яко безплотен в ней многолетне подвизался еси трудолюбне,/ соревнуя пророкам Илии и Крестителю:/ и от руку ангельску таин божественных насладився,/ ныне во свете Святыя Троицы купно с ними веселишеся./ Моли спастися нам, твою память почитающим.
Кондак, глас 3
Сиянием Духа Пресвятаго,/ Богомудре, просвещся,/ оставил еси яже в житии молвы,/ пустыню же достигл еси, преподобне отче,/ возвеселил еси иже над всеми Бога и Зиждителя,/ сего ради прославляет тя Христос, блаженне,// великий Дародатель.
Преподобный Петр Афонский
Тропарь, глас 4
Мир оставил еси, Петре, Господа ради своего/ и крест восприим на рамо свое,/ на гору достигл еси Афонскую,/ якоже древле фесвитянин Илия./ И в ней пребыв пощением, и молитвами, и бдением,/ Бога милостива творя,/ и Пречистую Богородицу Молебницу предлагая,/ сего ради вопием ти:/ моли Христа Бога, да спасет души наша.
Кондак, глас 2
Удалив себе человеческаго сожительства,/ в пещерах каменных и разселинах пожил еси,/ желанием Божественным и любовию, Петре, Господа твоего,/ от Негоже венец приял еси.// Моли непрестанно спастися нам.
Преподобные Онуфрий и Авксентий Вологодские
Тропарь, глас 8
Православия наставницы, благочестия и чистоты учителие, Церкви Вологодстей богодарованное украшение, преподобнии отцы наши Онуфрие и Авксентие, молите милостиваго Бога, да вашим предстательством подаст благодать и мир стране нашей и душам нашим спасение.
Преподобные Вассиан и Иона Пертоминские, Соловецкие чудотворцы
Кондак, глас 4
Ученицы игумена преславнаго Филиппа, яко верная Христова чада. Непрекословия и послушания овцы венцы приясте от Спаса душ наших. Вы в пещи отсечения воли, попалисте мудрование мира. И в безмолвии Херувимском прибысте, в молитвах своих воспевающе: Свят, Свят, Свят Господь Саваоф, Триблажен, Самобытен и Вечен.
Преподобные Иоанн, Ираклемон, Андрей и Феофил Оксиринфские
Кондак, глас 8
Приидите братию по плоти, паче же по духу, воспоим: / Иоанна славнаго со Ираклемоном верным, / Андреа же чуднаго и Феофила боголюбезнаго; / се бо жестокое пустынное житие возлюбивше, / вожделеннаго отечествия небеснаго достигоша, / идеже ныне блаженно пребывающе, // со дерзновением молятся о душах наших.
Блаженный Иоанн, Христа ради юродивый, Московский чудотворец (обретение мощей)
Тропарь, глас 8
Иже Христа ради, волею оставив свое отечество – град Вологду и вся красная мира сего возненавидев, желанием духовным вселился еси во град Ростов и, яко в пустыни скитаяся в нем, гладом, и жаждою и безмерною тяготою плоть свою изнуряя, и работая Господеви день и нощь, в посте и молитве пребывая в притворе церковном, власы же главы своея пеплом и смолою удручая, и, ревнуя Василию блаженному, пришел еси в царствующий град Москву и в целомудрии и терпении течение добре скончав, преселился еси к вечным обителям, чудес лучи испущая, преблаженне Иоанне, отче наш, моли Христа Бога спастися душам нашим.
Кондак, глас 8
Иже Христа ради наложивый на себя мудростию юродство, образом буйства зрим от человек, умныма же крылома горе возлетая, все тело свое веригами обязая, яко злато многоценное, соблюдеся в народе, очистив ум от страстей, веселием духовным прешел еси море мятежнаго сего жития, обрете светлость жизни вечныя, молим тя, блаженне Иоанне, молися прилежно Христу Богу нашему сохранитися нам от всякаго навета и злых обстояний видимых и невидимых враг, да зовем ти: радуйся, многострадальне, яко да молитвами твоими направляеми, предстоя присно с нами, в Троице славимому Богу поем Ему: аллилуиа.
13/26 июня
Мученица Акилина
Кондак, глас 2
Девства твоего добротами предочистивши душу твою,/ на высоту мучением востекла еси,/ Акилино всечестная,/ любовию Жениха твоего Христа уязвившися,/ Емуже со Ангелы предстоиши, веселящися,// с нимиже не престай моляся о всех нас.
Святитель Трифиллий, епископ Левкусии Кипрской
Кондак, глас 8
Изрядством жития чистоту девства прием, Трифиллие,/ первопрестольник показался еси Левкусии/ и явился еси тем провозвеститель и богоразумия наставник./ Сего ради радостно взываем ти:// радуйся, святителей украшение.
Преподобные Андроник, Савва и Александр, Даниил Черный и Андрей Рублев, Московские
Тропарь, глас 8
От юности своея, преподобнии отцы Андрониче и Савво, в пустыни вселистеся Сергия великого, того житию последующе, плоды смирения и послушания возрастили есте, сего ради сподобившеся быти строители и первоначальники обетныя обители святителя Алексия, с нимже испросите у Христа Бога верным людем здравие и спасение и душам нашим велию милость.
Кондак, глас 3
Вас молим, преподобнии отцы наши, телом почивающия на земли, духом же Божию Престолу предстоящия: молитеся о граде Москве и о всех, почитающих честную память вашу.
Тропарь Препп. Андронику и Савве, глас 8
От юности своея, преподобнии отцы Андрониче и Савво, / в пустыни вселистеся Сергия великаго, / того житию последующе, / плоды смирения и послушания возрастили есте, / сего ради сподобившеся быти строители и первоначальники / обетныя обители святителя Алексия, / с нимже испросите у Христа Бога верным людем здравие и спасение / и душам нашим велию милость.
Кондак преп. Андронику, глас 1
Безмолвие от юности возлюбив, на гору Маковец пришел еси, Андрониче блаженне, обитель общаго жития устроил еси в земнем граде Москве, во обители Небеснаго града ныне ликовстуеши, молися Христу Богу спастися душам нашим.
Преподобная Александра (Мельгунова) Первоначальница, игумения Дивеевская
Тропарь, глас 5
Образ Христова смирения являющи, великая и святая жено/ преподобная мати наша Александро, / слез источник непрестанный соделалася еси,/ молитву к Богу чистейшую, любовь ко всем нелицемерную/ и изобилие благодати Божия стяжала еси, / благословение Царицы Небесныя/ об основании Четвертаго Ея Жребия во Вселенней исполнивши;/ восхваляем тя с преподобным Серафимом,/ емуже и попечение об обители сей заповедала еси,/ и, лобызающее стопы твоя, смиренно молим тя:// помяни нас у Престола Божия.
Кондак, глас 4
Преподобная мати Александро, подвиги многотрудныя жития твоего кто исповесть, и милости Божия через тебя явленныя кто исчислит, и слез твоих источник непрестанный кто измерит, дерзновение же твое у Пречистыя Богородицы добре ведуще, во умилении сердечнем зовем ти: Радуйся, Госпожа наша и мати, не лиши нас твоего ходатайства и заступления.
Кондак, глас 5
Каменем живым явилася еси святая Александро, на нем же Богородице созда велию Обитель Свою: идеже имя Святыя Троицы славится, и Она, Приснодева и Матерь Света с любовию величается: сие бо есть Четвертый жребий Ея во вселенней, егоже не одолеют ада врата.
14/27 июня
Пророк Елисей
Тропарь, глас 4
Иже во плоти Ангел/ и пророков начальнику свидетельствова, славный Елисее,/ дивны чудеса соделал еси, пророче,/ поспешеством Святаго Духа;/ силою Илииною исцелив водное естество,/ звери же погуби пожирающия,/ и Неемана очисти,/ и вдовича сына воскресил еси,/ и всем чтущим тя даруй благодать и исцеление.
Кондак, глас 2
Пророк Божий явился еси,/ сугубую благодать прием,/ воистинну достойную тебе, Елиссее блаженне:/ Илии бо был еси совсельник,// с нимже Христу Богу молися непрестанно о всех нас.
Святитель Мефодий, патриарх Константинопольский
Кондак, глас 2
На земли подвизался еси, яко безплотный,/ и Небеса наследовал еси, Мефодие,/ яко изъяснивый в концех икон поклонение,/ в трудех бо и болезнех вящше пребыв,/ не престал еси дерзновением,// обличая отметающияся иконы Христовы.
Священномученик Владимир (Богоявленский), митрополит Киевский (обретение мощей)
Тропарь, глас 2
Веры православныя непорочный блюстителю и заповедей Христовых усердный исполнителю, священномучениче Владимире, Христа всем сердцем возлюбив, паству твою добре упасл еси, незлобиво мученическую смерть приял еси. Сего ради в вечней славе пребывая, моли спастися душам нашим.
Кондак, глас 3
В годину гонений лютых истинный Христов священнодействователь показался еси, первее евангельское слово утверждая и Жертву безкровную Господеви принося, последи же с кровию твоею во святилище вшедый, священномучениче Владимире, моли Христа Бога, Церкви нашей единение подати, и отечеству от пленения христоборцев сохранитися, и душам нашим спасение улучити.
Преподобный Мефодий, игумен Пешношский
Тропарь, глас 8
Божественною любовию от юности распаляемь,/ вся, яже в мире красная, возненавидев,/ Христа Единаго возлюбил еси,/ и, сего ради в пустыню вселився,/ в ней обитель сотворил еси,/ и, собрав инок множество,/ приял еси от Бога чудес дар, отче Мефодие,/ и был еси о Христе собеседник и спостник преподобному Сергию,/ с нимже у Христа Бога испроси православным христианом здравие, и спасение,/ и душам нашим велию милость.
Кондак, глас 4
Послушания добрый рачитель быв,/ безплотныя враги слезными молитвами твоими крепко посрамил еси/ и явился еси Пресвятыя Троицы жилище,/ Юже зря, блаженне, ясно,/ Богомудре Мефодие преподобне,/ чудес дар от Ней приял еси./ Темже исцелявши с верою приходящих недуги,/ утолявши скорби/ и молишися непрестанно о всех нас.
Преподобный Елисей Сумский
Кондак
Избранный угодниче Христов, преподобне отче Елисее, возсиявый земли Карельстей яко чудный свет; многим воздержанием житие твое украсивый на земли, сего ради и венцем венчанный на Небеси; прехвальный подвижниче жития строгаго; похвальное воспеваем ти пение: ты же, имеяй велие дерзновение ко Господу, от всяких нас бед свободи, с любовию зовущих ти: Радуйся, преподобне отче Елисее, чудотворче и дивный молитвенниче о душах наших.
Собор Дивеевских святых
Тропарь, глас 3
Явилися есте земли Российския украшение / трие начальницы обители Дивеевския / преподобные (матери наши) Александро, Марфо и Елено, / благословение Царицы Небесной исполнивши / и дерзновение ко Господу стяжавши, / молите у престола Пресвятые Троицы // о спасении душ наших.
Кондак, глас 4
Дивеевстии светильницы всесветлыя преподобныя матери наши Александро, Марфо и Елено, в пощении, бдении, молитве и трудах добре подвизалися есте и по смерти нас освещаете чудес источеньми и исцеляете недугующих души. Молите Христа Бога грехов оставления даровати любовию чтущим святую память вашу.
Ин кондак, глас 8
Дивеевстии светильницы всесветлыя / преподобныя матери наши Александро, Марфо и Елено, / в пощении, бдении, молитве и трудах добре подвизалися есте / и по смерти нас освещаете чудес источеньми / и исцеляете недугующих души; / молите Христа Бога грехов оставление даровати / любовию чтущим святую память вашу.
Благоверный великий князь Новгородский Мстислав-Георгий Храбрый
Тропарь, глас 4
Измлада явился еси, богомудре княже Мстиславе, Божественный сосуд, избран Богови, благочестием воспитан, веру непорочну соблюл еси. Темже предстоя Святей Троице, молися стране Российстей сохраненной быти и всем нам спастися.
Кондак, глас 8
Многомудренно пожив в княжении твоем в великом Нове граде сем, благоверный княже Мстиславе, плод благий Богови в жизни сей был еси, присноцветущ добродетельми, того ради получил еси жизнь вечную на небесех, тело же твое нетлением прославлено бысть на земли. Мы же, предстояще иконе твоей, любовию вопием ти: радуйся, утверждение граду нашему.
15/28 июня
Пророк Амос
Кондак, глас 4
Очистив духом, пророче,/ твое светозарное сердце, славный Амосе,/ пророчествия дар свыше прием,/ возопил еси велегласно во странах:// се Бог наш, и не приложится ин к Нему.
Святитель Иона, митрополит Московский и всея Руси
Тропарь, глас 3
Божественною благодатию просветився и по смерти показуя светлость жития твоего, источаеши мирови благоухания, притекающим к раце мощей твоих, и народи московстии наставляеши ко свету богоразумия, Ионо, отче наш, моли Христа Бога даровати нам велию милость.
Кондак, глас 8
Желанием духовным постническое житие совершив и святительства паству приим, чистоты ради телесныя и тело твое Владыка Христос соблюде нетленно, и Петру чудотворцу наследника тя содела, и того нраву последовал еси, и учителя тя Христос Своему стаду дарова, идеже лежат целебныя мощи твоя, благоухают, яко от кадила благовонна, и подают исцеления немощным, верою приходящим, святителю Ионо, моли Христа Бога непрестанно о всех нас.
Блж. Августин, еп. Иппонийский
Тропарь, глас 4
Сердцем всем Христу последуя, святителю Августине, словом и делом истину запечатлел еси и ересей злочестивых явился еси неленостный искоренитель, молися выну ко святей Троице, да спасет души наша.
Кондак, глас 4
Непоколебиме столпе Церкви Вселенския на недвижимем камени веры основанный, догмат православия нелестный учителю и покаяния велегласный проповедниче, запечатлителю истины, прехвальне Августине, святителю Христов.
Преподобный Иов (Кундри) архимандрит, Угольский (УПЦ)
Тропарь, глас 8
Весь был еси, отче, в дольнем житии своем правило веры и образ кротости. Троицкия пустыни начальниче и основателю, жития монашеского на горах угольских возродителю. В молитвах, бдении и в трудех монашеских для братии зерцало подражания. В бедах и гонениях терпеливий сносителю, и всем приходящим к тебе помощь и утешение. Не престай моляся о всех, чтущих твою память, Иове,преподобне отче наш, Карпатския страны похвало.
Кондак, глас 3
Преподобне отче Иове преславне, ты весь пламенем аки свеча горел еси пред Богом. В неусыпном бдении предстоя моляся о мире, и ныне ликуеши в чертозе небеснем, поминай нас чад твоих притекающих и вопиющих тебе: радуйся Иове, преподобне отче наш.
Преподобные Григорий и Кассиан Авнежские
Тропарь, глас 8
Православия наставницы, благочестия и чистоты учителие, Церкви Вологодстей богодарованное украшение, преподобнии отцы наши Григорие и Кассиане, молите милостиваго Бога, да вашим предстательством подаст благодать и мир стране нашей и душам нашим спасение.
Кондак, глас 4
Иже плотская мудрования Духови повинувше и вся, яже на земли, презревше, Христу, Единому Богу, прилепившеся, святии, и Того ради в пустыню вселишася, источаете ныне исцеления с верою притекающим к мощем вашим, полезная нам просите от Бога молитвами вашими богоприятными, Григорие и Кассиане преподобнии.
16/29 июня
Святитель Тихон Амафунтский
Тропарь, глас 1
Пустынный житель, и в телеси ангел,/ и чудотворец явился еси, богоносе отче наш Тихоне,/ постом, бдением, молитвою Небесная дарования приим,/ исцеляеши недужныя и души верою притекающих ти./ Слава Давшему тебе крепость,/ слава Венчавшему тя,// слава Действующему тобою всем исцеления.
Кондак, глас 3
В постничестве, святе, боголюбезном пребыв,/ Утешителеву силу с высоты приял еси,/ идол низложити прелести, люди же спасти,/ демоны отгнати, недуги исцеляти./ Сего ради почитаем тя, яко Божия друга,// Тихоне блаженне.
Ин кондак, глас 8
Иже Божественнаго Духа благодатию избран святитель явися/ и чудотворец показася предивен./ Яко солнце, чудесы сияя, Тихоне,/ память твоя пресветлая./ Темже зовем ти:/ радуйся, пресловущее миру светило.
Преподобный Моисей Оптинский
Тропарь, глас 4
Потаенный (сокровенный) сердца человек явился еси / в красоте неистленной кроткаго и молчаливаго духа, / преподобне отче Моисее, / стадо твое добре упасл еси, / на камени веры обитель созидая, / на немже и храм сердца своего устрояя. / Темже моли Христа Бога нашего / и нам жити в дому Господнем / и вся дни живота нашего зрети красоту Господню / и посещати храм святый Его / во спасение душ наших.
Преподобный Тихон Медынский, Калужский
Тропарь, глас 4
Яко светильник пресветлый, явился еси в Российстей земли, преподобне отче наш Тихоне, в пустыни вселився, в нейже преходя жестокое жительство, яко безплотен, пожил еси, сего ради и чудес дарованием обогати тя Бог. Тем и мы, притекающе к мощем твоим, умильно глаголем: отче преподобне, моли Христа Бога спастися душам нашим.
Кондак, глас 8
Отечества удалився, преподобне, в пустыню вселился еси, идеже жестокое житие твое показал еси. Темже поминай чтущих память твою, да зовем ти: радуйся, преподобне Тихоне, отче наш.
Преподобный Тихон Луховский, Костромской
Тропарь, глас 4
Желанием духовным в пустыню вселился еси и, тамо невозвратно шествовав Божественными стезями, достигл еси в Небесныя обители, и ныне со Ангелы предстоиши у Престола всех Царя Христа Бога, Емуже прилежно молися помиловати град сей и люди, верою празднующия пречестную память твою, Тихоне преподобне, отче наш.
Кондак, глас 6
Христовою любовию уязвився, преподобне, во след Его невозвратно шествовал еси, постом и воздержанием плотския страсти умертвил еси, бдением же и молитвами вселукаваго врага до конца низложил еси и слезами, яко елеем, свещу светлу себе уготовал еси; темже в Небесныя обители невозбранно вшел еси, идеже, радуяся, Господеви предстоиши, Емуже прилежно молися, молим тя, яко да милостив нам будет в день страшного Его пришествия, и да не пребудем и мы вне чертога Христова, но да сподобит ны одесную Себе стати молитвами твоими, преподобне, да зовем ти: радуйся, богомудре отче наш Тихоне.
17 июня/2 июля
Мученики Мануил, Савел, Исмаил
Кондак, глас 2
Верою Христовою уязвлени, всеблаженнии,/ и Сего верно испивше чашу,/ персская служения и дерзость на землю низложисте,/ Троицы равночисленнии,// молитвы творяще о всех нас.
18 июня/1 июля
Священномученик Александр Крутицкий
Тропарь, глас 4
И Бога избранник,/ и церкви Христовой служитель верен быв,/ во дни гонения безбожнаго душу свою за Христа положил еси/ и мучителей безумие кроткими глаголами обличил еси,/ священномучениче Александре,/моли Христа Бога// спастися душам нашим.
Ин тропарь, глас 4
Светлая свеча пред Богом присно горящая/ и сугубыя Щелковския земли покровитель/ образом жития своего исполнивый закон Христов/ и веру отеческую не предавый/ но злобу диавола посрамивший кротостию/ и мученика венец приявший/ поминай нас у Господа, сродниче наш// священномучениче Александре.
Ин тропарь, глас 1
Трудами первее ниву Христову возделал еси,/ последи волчцы и терние кровию своею потребил еси,/ боголюбием и кротостию горняго Царствия достигая,/ сам себе в жертву непорочну Богови уготовляя,/ новомучениче, Христов угодниче Александре,/ моли Пречистую спастися нам,/ почитающим Рождество Ея,/ осеняемым Покровом Ея// и милостию Прославльшаго тя.
Ин тропарь, глас 3
Измлада Александре добрый Христов закон возлюбил еси/ на служение Господу твердо встав/ людям образом доброты и смиренного жития быв/ за служение Богу верное от безбожных муку прияв/ сострадательную душу свою Богови за правду предал еси/ того ради тебе с верою возопиим/ священномучениче Александре/ моли Христа Бога и нам Ему верными быти до конца// и спастися душам нашим.
Кондак, глас 8
Днесь звезда светлая озари Отечество наше,/ приидите боголюбцы, духовно возвеселимся,/ обретохом заступника усерднаго и молитвенника крепкаго/ сродника нашего священномученика Александра./ Радуйся и веселися земле Щелковская/ ликуй и утверждайся земле Русская/ имаши бо ходатая на Небеси верна/ воздвизающа люди на покаяние/ образом, и житием, и твердостию веры// Молися, отче, спастися нам.
Кондак, глас 3
Плод добрый Твоего, Господи, спасительного сеяния/ сонм новомучеников российских приносит Ти/ Ту и священномучениче Александре Крутицкий/ землю Щелковскую своим подвигом освятивший/ Православие воплотивый в житии своем/ образом смирения, веры и кротости/ любимец Божия Матери был еси, добрый пастыре/ От власти безбожныя претерпевший скорби, клевету, и гонения, и саму смерть/ Мученичества венец за верность Христу приявший/ Тем же возрадуемся, людие/ Христа Бога и Пречистую Его Матерь благодаряще/ яко дарова нам священномученика славна// и молитвенника о душах наших.
Мученик Леонтий
Кондак, глас 3
Мучителей посрамил еси лукавая коварства/ и еллинов обличил еси безбожное служение,/ возсиял еси богоразумие всем человеком ученьми благочестия,/ богомудре мучениче./ Сего ради твою память почитаем любовию,// премудре Леонтие.
Преподобный Леонтий, канонарх Печерский, в дальних пещерах почивающий
Тропарь, глас 3
Всечестный канонарше Леонтие, правилоначальный бывый в церкви и в правиле иночестем возсиявший светло, моли Христа Бога, да прегрешений оставление подаст душам нашим.
Кондак, глас 1
Канонаршествуя, честный канонарше Леонтие, и пение церковное поющим предводительствуя в церкви, уподобился воистину Ангелам, поющим Бога на небеси, ихже и житию подражая и с ними ликуя, поминай ны, любовию хвалящих тя.
Преподобные Геронтий и Леонтий канонархи, в Дальних пещерах почивающие (общий тропарь и кондак)
Тропарь, глас 3
Двоице святая,/ правилоначальная, бывшая в церкви/ и в правиле иночестем возсиявшая светло,/ всечестнии канонарси,/ молите Христа Бога,/ да прегрешений оставление подаст душам нашим.
Кондак, глас 1
Канонаршествующе, честнии канонарси,/ и пение церковное поющим предводительствующее в церкви,/ подобистеся воистинну Ангелом,/ поющим Бога на Небеси,/ ихже житию подражавше, / и, с ними ныне ликующе, / поминайте ны, любовию хвалящих вас.
19/2 июля
Апостол Иуда
Тропарь, глас 1
Христова тя сродника, о Иудо, ведуще и мученика тверда,/ священно восхваляем, прелесть поправша и веру соблюдша./ Темже днесь всесвятую твою память празднующе,// грехов разрешение молитвами твоими приемлем.
Ин тропарь, глас 1
Чистоту душевную и житие непорочно стяжав,/ Пречистаго Света, нам приближшагося, быв по плоти брат и ученик,/ благочестия проповедник и языком учитель истинный,/ Иудо всехвальне,/ моли Христа Бога,/ да спасет души наша.
Кондак, глас 2
Твердым умом избран ученик ты явился еси/ и столп необорим Церкве Христовы,/ языком проповедал еси слово Христово,/ веровати глаголя во Едино Божество;/ от Негоже прославився, приял еси дар исцелений,/ целити недуги притекающих к тебе,// апостоле Иудо всехвальне.
Святитель Иов, первый Патриарх Московский и всея Руси
Тропарь, глас 5
Православия поборниче, / веры Христовы исповедниче, / первоиерарше Церкве Русския, / святителю отче Иове, / за ны Христа Бога моли, / веру отеческую утвердити, / грехов оставление нам даровати // и подати миру велию милость.
Ин тропарь, глас 3
Да торжествует Церковь Христова / и да радуется град Москва, / яко возсия светильник земли Российския, / во исповедании Истины непоколебимый Иов Патриарх, / егоже молитвами, Господи, / вся соблазны мира сего и ереси искорени, / люди во благочестии настави // и утверди в Православии.Кондак святителя Иова
Кондак, глас 7
В годину лютых искушений/ многострадальному Иову подобяся,/ в жертву живу и непорочну/ себе Христу принесл еси,/ обратив паству к покаянию,/ терпеливе Иове святителю,/ моли и нам за вся благодарити Господа/ и всегда воздавати// славу Богови.
Ин кондак, глас 6
Светильник Церкве Русския/ и пастырь добрый явился еси,/ святителю отче Иове,/ молитвою твоею ко Господу/ храни землю Российскую/ и спаси души наша.
Святитель Иоанн Шанхайский
Тропарь, глас 5
Попечение твое о пастве в странствии ея,/ се прообраз и молитв твоих, за мир весь присно возносимых:/ тако веруем, познав любовь твою, святителю и чудотворче Иоанне!/ Весь от Бога освящен священнодействием пречистых Таин,/ имиже сам присно укрепляем,/ поспешал еси ко страждущим, целителю отраднейший./ Поспеши и ныне в помощь нам, всем сердцем чтущим тя.
Тропарь, глас 6, творение блаженнаго Серафима Платинскаго
Славный апостолом Христовым наследниче, / явился еси нас маловерных и хладных сердцем спасти. / Древних святых благодатию и подвигами облеклся еси, / сего ради от Бога Небесныя Тайны приемше. / О сиропитателю предобрый, подающий надежду миром отверженным, / о светильниче Христов, Божественным пламенем / на заре Страшнаго Суда возженный. Моли о нас, святителю отче Иоанне, / да возгорятся и наши сердца пламенем спасительной любви ко Христу // и спастися душам нашим во времена последняя.
Тропарь, глас 8, творение архимандрита Киприана
Церкве светильниче, подвижничества правило, / любве и милосердия пучино богоизлиянная, / незыблемое благочестия основание: / вся научил еси и всех приял еси в сердце твоем, / болящия исцеляя и скорбящия утешая: / и ныне, святителю отче Иоанне, // молися спастися душам нашим.
Кондак, глас 4
Христу пастыреначальнику последовав, во святителях изряднейший явился еси, спасл бо еси овцы своя от губительства безбожных, пристанище мирное тем учредив, и попечение непрестанное о пастве имея, врачевал еси их недуги душевныя же и телесныя, и ныне о нас к твоим честным мощем припадающих, моли Христа Бога, отче Иоанне, в мире спастися душам нашим.
Ин кондак, глас 4
Сердце твое объемлет всех любовию / молящих ти ся, Иоанне святителю, / и поминающих подвиг жития твоего. / Безболезненно же легкое преставление твое бысть, / Одигитрии Пречистыя верный служителю.
Преподобный Варлаам Пинежский, Важский (Шенкурский)
Тропарь, глас 3
Иже к добродетелем прилежанием взыграния плоти обуздал еси, благими нравы душу свою украсив, от земных Христу превозведе ум свой, тем от него исцелением струя независтна явися, притекающим верою к тебе и любезно зовущим: Варлааме, отче наш, моли Христа Бога, да спасет души наша.
Кондак, глас 8
Яко звезда светозарная, от Великого Новаграда пришед, в чужих, яко в западных странах, зайде, от восток чудес, яко солнце, возсия, темже, иже во тьме и сени смертной, в недузех лежащии, свет исцеления от тебе премлюще, с нами, чады твоими, непрестанно вопиют ти: радуйся, богомудре Варлааме, отче наш.
Преподобный Паисий Великий
Кондак, глас 8
От млада званию Господа твоего последовал еси усердно, блаженне, / вся, яже в мире красная, Его ради оставив. / Крест твой на рамена взем, / вселился еси в пустыню, / и, тамо ангельски пожив, / тело твое постом и молитвами изнурил еси, / и многим путь был еси ко спасению, / вся возводя к Божественней высоте, / Паисие преподобне, / отцев и постников твердое основание.
20 июня/3 июля
Равноапостольный Наум Охридский
Тропарь, глас 4
Мир оставил еси, прилепився Христу, / плоть распял еси, пожив Духу, / Науме всеблаженне, / потщался еси апостольским подвизатися течением / и уловил еси к вере Болгарская неисчетная множества. / Темже молитвами твоими / избави нас от искушений.
Кондак, глас 3
Светлых твоих подвигов пречестная память, / яко велие солнце, всем возсиявает, / лица воспевающих тя просвещает, / демоны и всяку болезнь отгоняет, / сего ради, сошедшеся, любовию сию верно восхвалим.
Священномученик Мефодий, еп. Патарский
Тропарь глас 1
Кровь твоя, мудре, тайно вопиет от земли,/ якоже Авелева к Богу,/ богомудре святителю Мефодие,/ ясно проповедавый Божие вочеловечение./ Темже и посрамил еси Оригенову лесть,/ и преставился еси в Небесный чертог./ Моли Христа Бога,// да спасет души наша.
Кондак, глас 4
Священнотаинник Святыя Троицы,/ и яже паче ума повелений Божественных проповедник,/ и православным утверждение был еси, Мефодие,/ злославныя обличил еси смыслы,/ правоверия ради кровию твоею священномученик явлься,/ и Христу со Ангелы предстоя,// моли спастися нам.
Благоверный князь Глеб Владимирский
Тропарь, глас 4
Днесь светло красуется славнейший град Владимир, имея в себе пребогатое сокровище – чудоточащия честныя мощи благоверного князя Глеба, имиже украшаяся и хваляся, вселенную всю созывает к веселию и велегласно вопиет: о Владыко Христе, даровавый таковую благодать угоднику Твоему, его молитвами помилуй нас.
Кондак, глас 8
Взбранному и крепкому в праведницех, православною мудростию сияющему великому чудотворцу, благодарственная восписуем ти, благоверный княже Глебе: яко имея дерзновение у Престола Христова, верою чтущие тя, град и люди сохраняй молитвами твоими: ты бо еси земли Российския похвала и утверждение.
Перенесение мощей святителя Гурия, архиепископа Казанского
Тропарь, глас 4
Яко крин благовонный,/ мироточивыя твоя мощи/ от вертограда Церкве Спасовы/ в вертоград Церкве Богородичны честне принесошася,/ святителю Гурие,/ яко же бо дар честен,/ тя даровав Христос Пречистей Матери Своей,/ и исполнися храм Ея святый благоухания твоего,/ и возрадовася архиерейский престол,/ приемый тя, первоседателя своего./ Возвеселися же собор верных со святителем и священноначальники/ о преславном цельбоносных твоих мощей пренесении,/ еже мы радостно празднующе, молим тя,/ угодниче Божий:/ моли Христа Бога/ подати душам нашим мир и велию милость.
Кондак, глас 4
Чувственный страсти победив,/ чистотою, яко солнце, возсиял еси,/ чисто житие до конца сохранив,/ и от неверия в веру многих ко Христу привел еси,/ того ради от Бога нетлением почтен,/ чудесы твоими вся удивил еси./ Молим убо тя, святителю Гурие,/ молитвами твоими от бед избави нас, да зовем ти:/ радуйся, отче предивный, граду Казани похвале и утверждение.
21 июня/4 июля
Тропарь мученику Иулиану Египетскому и иже с ним
Тропарь, глас 1
Светлыя постничества подвиги,/ радуяся, понесл еси, Иулиане Богоблаженне, с преподобною Василиссою,/ и страдания добльственно претерпел еси/ с честными твоими сострадальцы,/ с нимиже моли Христа Бога/ спастися душам нашим.
Кондак мученика Иулиана Тарсийского, глас 2
Благочестия непобедимаго воина/ и истины согласника и оружника,/ вси достойно восхвалим/ Иулиана днесь/ и к нему возопиим:// моли Христа Бога о всех нас.
Кондак мученику Иулиану Египетскому и иже с ним, глас 8
Иже в преподобных и мученицех/ преславнаго Иулиана и сподвижников его/ любовию память почитаем днесь,/ яко прославивших Господа Божественными делы/ и прославленных Господом Божественными чудесы,/ ихже песньми увенчаим, зовуще:/ радуйтеся, воини Христовы непобедимии.
Мученик Иулиан Тарсийский
Кондак, глас 2
Благочестия непобедимаго воина / и истины согласника и оружника, / вси достойно восхвалим Иулиана днесь / и к нему возопиим: / моли Христа Бога о всех нас.
Святитель Василий, епископ Муромский
Тропарь, глас 8
Благочестно пожив во святительстве, люди муромские крещением просветил еси и храм Пречистыя Благовещения созда, тем же яко апостольского служения приемника и перваго своего святителя чтуще тя, молим чада твоя, блаженне, от всех бед избави нас яже ко Христу молитвами твоими, святителю Христов Василие, отче наш.
Кондак, глас тойже
Яко благовернаго князя Константина сотрудниче, светом Христовы веры Муром просветив и первым епископом граду нашему был еси: святителю Христов Василие, не престай молитвами ограждати град и люди паствы твоея, иже тебе верно почитающих, да велегласно вопием ти: радуйся, святителю богомудре Василие.
Преподобный Максим Грек
Тропарь, глас 8
Зарею Духа облистаем,/ витийствующих богомудренно сподобился еси разумения,/ неведением омраченная сердца человеков светом благочестия просвещая,/ пресветел явился еси Православия светильник, Максиме преподобне,/ отонудуже ревности ради Всевидящаго/ отечества чужд и странен, Российския страны был еси пресельник,/ страдания темниц и заточения от самодержавнаго претерпев,/ десницею Вышняго венчаешися и чудодействуеши преславная./ И о нас ходатай буди непреложен,// чтущих любовию святую памятъ твою.
Кондак, глас 8
Богодухновенным Писанием и богословия проповеданием/ неверствующих суемудрие обличил еси, всебогате,/ паче же, в Православии исправляя, на стезю истиннаго познания наставил еси,/ якоже свирель богогласная, услаждая слышащих разумы,/ непрестанно веселиши, Максиме досточудне,/ сего ради молим Тя:/ моли Христа Бога грехов оставление низпослати// верою поющим всесвятое твое успение, Максиме, отче наш.
Преподобноисповедник Георгий Даниловский
Тропарь, глас 2
Издетска монашескую жизнь возжелал еси, / преподобне отче Георгие, / в нейже любовь Христову стяжав, / пастырь добрый многим людем был еси, / последи же и изгнание претерпев, венцем исповедничества украсился еси. / И ныне, предстоя престолу Святыя Троицы, // непрестанно моли спасти и просветити души наша.
Кондак, глас 4
Евангельским словом вооружився, / всяку скорбь жития сего тленнаго и непостояннаго претерпел еси, / утешая чад твоих любовию, яже во Христе Иисусе, / преподобне Георгие, Даниловская похвало, // моли Христа Бога спасти и нас, чтущих тя.
Благоверный князь Феодор Стародубский
Тропарь, глас 1
Божественным желанием от юнаго возраста весь сам себе Господеви возложив, в молитвах и постех образ быв добродетели, богатство же, и славу, и доброродство телесное яко не сущее презрев, Христа единаго от души возлюбил еси, и Того Истиннаго Бога пред нечестивым царем исповедал еси, и доблестию терпения своего сего ужасил и всех преудивил еси. Телом бо, яко розга, обрезаем, на кийждо состав, удеси резания, благодарны молитвы изрек еси Господеви. Тем во страдании своем венец прием, к Престолу восшел еси славы и со Ангелы предстоиши, всехвальне Феодоре, моли Христа Бога спастися душам нашим.
Кондак, глас 3
Днесь светло сияющая Церковь благочестно празднует праздник пресветлой и светоносной твоей памяти, великий град и страну созывающи, радуется бо, яко имущи в себе сокровище велие – честныя и многоцелебныя мощи твоя, всехвальне Феодоре, мучениче великоименитый и чудес подателю пребогатый, моли Христа Бога спастися душам нашим.
23 июня/6 июля
Мученица Агриппина
Тропарь, глас 4
Светлых подвиг твоих светоносный наста день, / воньже почитающи сих, Божественная Церковь вся созывает весело вопити тебе: / радуйся, дево и мученице, Агрипино всечестная.
Собор Владимирских святых
Тропарь, глас 4
Днесь светло красуется Пресвятыя Богородицы избранный град/ и с ним вси концы земли Владимирския торжествуют,/ память совершающе богопрославленнаго великаго лика святых,/ в подвизех Православный веры издревле во уделе сем Богу угодивших,/ и к ним с любовию вопиют:/ о предивнии Христу Богу молитвенницы,/ венцы пресветлыми от Него увенчанныя,/ мир и благоденствие отечеству вашему испросите/ и душам нашим велию милость.
Кондак, глас 4
Яко звезды пресветлыя Церкве Российския,/ исповеданием Православный веры в той возсиявшии,/ вси святии земли Владимирския:/ Богомудрии святителие и благовернии князи,/ преподобнии отцы и матери,/ страстотерпцы и праведницы,/ Христу Богу усердно молитеся,/ грехов оставление даровати/ любовию чтущим святую память вашу.
Праведный Артемий Веркольский
Тропарь, глас 2
Вышняго повелением, / тученосным облаком, небо помрачившим / и молниям блистающим, / грому же возшумевшу с прещением, / испустил еси душу твою в руце Господеви, / премудре Артемие, / и ныне предстоиши Престолу Владыки всех, / иже верою и любовию приходящим к тебе, / подая исцеление всем неотложно / и моляся Христу Богу, / спастися душам нашим.
Кондак, глас 8
Возсия днесь пресветлая память премудраго Артемия; / Богоданная благодать, яко реки, изливает от целебных мощей его дивная исцеления, / имиже от многоразличных недуг избавляемся, / с верою приемлюще я и взывающе: / радуйся, Артемие Богомудре.
24 июня/7 июля
Рождество честнаго славного Пророка, Предтечи и Крестителя Господня Иоанна
Тропарь, глас 4
Пророче и Предтече пришествия Христова,/ достойно восхвалити тя недоумеем мы, любовию чтущии тя:/ неплодство бо рождшия и отчее безгласие разрешися/ славным и честным твоим рождеством,// и воплощение Сына Божия мирови проповедуется.
Кондак, глас 3
Прежде неплоды днесь Христова Предтечу раждает,/ и той есть исполнение всякаго пророчества:/ Егоже бо пророцы проповедаша,/ на Сего во Иордане руку положив,/ явися Божия Слова пророк, проповедник,// вкупе и Предтеча.
Преподобный Антоний Дымский, Новгородский
Тропарь, глас 4
Добродетелей ревнителю, / пустынный житель, / подвижник веры Христа Бога нашего, / пощением и труды умертвивый плотская вожделения, / тезоимените великому Антонию, / егоже житию поревновал еси / и во егоже имя Божественный храм воздвигл еси, / купно с ним, преподобне Антоние, моли Спасителя всех, / да и нас сотворит победители плотских похотей / и храмы Духа Святаго, / по велицей Его милости.
Кондак, глас 6
Сверстник и подражатель преподобному Варлааму,/ послушание к нему истинное стяжав,/ достоин явился ему преемник,/ упасши до времене стадо его,/ добродетелем же его поревновав,/ в туюжде меру возраста достигл еси,/ безмолвие пустынное возлюбив,/ и угоден Господеви показался еси,/ первоначальный быв пустыни при езере Дымском,/ тем ти вопием:/ с преподобным Варлаамом, отче Антоние, моли о нас Бога,/ да даст нам такожде угодити Ему, якоже и ты,/ образе послушания и безмолвия тихий рачителю.
Св. праведные отроки Иаков и Иоанн Менюжские, Новгородские
Тропарь, глас 1
Болезньми святых праведных отроков/ Иакова и Иоанна,/ имиже о Тебе пострадаша,/ умолен буди, Господи,/ и вся наша болезни исцели,/ Человеколюбие, молимся.
Ин тропарь, глас 4
Имущим непорочную душу, от купели святого крещения и в младенчестве Христа ради страдания претерпевшии, Богом избраннии блаженнии отроцы Иоанне и Иакове, молите милостивого Бога телесные немощи недужных младенцев целити, мир стране Российстей даровати, и душам нашим велию милость.
Кондак, глас 8
Ваших красоты желая, и нижния сласти телесныя тощно оставили есте,/нестежанием суетного мира,/ ангельское житие проходя, скончавшиеся, Иоанне и Иакове блажение:/ с нимиже Христа Бога молите непрестанно о всех нас.
Ин кондак, глас 8
Преудобренную и похвальную двоицу почтим по достоянию, Иакова блаженного и Иоанна всехвального; тии бо младенческую немощь отвергша, страдания претерпеша, тем вси вопием, слава Давшего вам крепость, слава Венчавшему вас, слава Дающему вас ради исцеления.
25 июня/8 июля
Преподобномученица Феврония
Кондак, глас 6
Женише мой, сладчайший Христе, -/ взываше Феврония, -/ не трудно ми тещи во след Тебе,/ ибо сладость любве Твоея душу мою надеждею впери/ и красота милости Твоея сердце мое услади/ испити чашу страданий по Тебе,/ да достойну мя в чертозе с мудрыми девами/ ликовствовати о Тебе сопричтеши./ Темже, преподобная страстотерпице,/ почитающе подвиги трудов твоих, молим тя:// моли не затворитися и нам чертога дверем.
Благоверный князь Петр, в иночестве Давид, и княгиня Феврония, в иночестве Евфросиния, Муромские чудотворцы
Тропарь, глас 8
Яко благочестиваго корене пречестная отрасль был еси, добре во благочестии пожив, блаженне Петре, тако и с супружницею твоею, премудрою Феврониею, в мире Богу угодивше и преподобных житию сподобистеся. С нимиже молитеся Господеви сохранити без вреда отечество ваше, да вас непрестанно почитаем.
Кондак, глас 8
Мира сего княжение и славу временну помышляя, сего ради благочестно в мире пожил еси, Петре, купно и с супружницею твоею премудрою Феврониею, милостынею и молитвами Богу угодивше. Темже, и по смерти неразлучно во гробе лежаще, исцеление невидимо подаваете, и ныне Христу молитеся сохранити град же и люди, иже вас славящих.
26 июня/9 июля
Преподобный Давид Солунский
Кондак, глас 1
Сад присноцветущ, добродетелей плоды приносяй,/ явился еси на садовне древе, яко благопеснивая птица,/ рай же паче, жизни древо, Господа, в сердцы твоем прием,/ яко возделав, богомудре,/ имже питаеши нас благодатию;// присно моли о нас, Давиде всеблаженне.
Преподобный Тихон Луховской (обретение мощей)
Тропарь, глас 8
Желанием духовным в пустыню вселился еси / и, тамо невозвратно шествовав Божественными стезями, / достигл еси в Небесныя обители, / и ныне со Ангелы предстоиши / у Престола всех Царя Христа Бога, / Емуже прилежно молися / помиловати град сей и люди, / верою празднующия пречестную память твою, / Тихоне преподобне, отче наш.
Кондак, глас 1
Христовою любовию уязвився, преподобне, / во след Его невозвратно шествовал еси, / постом и воздержанием плотския страсти умертвил еси, / бдением же и молитвами вселукаваго врага до конца низложил еси / и слезами, яко елеем, свещу светлу себе уготовал еси; / темже в Небесныя обители невозбранно вшел еси, / идеже, радуяся, Господеви предстоиши, / Емуже прилежно молися, молим тя, / яко да милостив нам будет в День страшнаго Его пришествия, / и да не пребудем и мы вне чертога Христова, / но да сподобит ны одесную Себе стати / молитвами твоими, преподобне, да зовем ти: / радуйся, Богомудре отче наш Тихоне.
27 июня/10 июля
Преподобный Сампсон странноприимец
Тропарь, глас 8
В терпении твоем стяжал еси мзду твою, отче преподобне,/ в молитвах непрестанно терпевый,/ нищия возлюбивый и сия удовливый,/ но молися Христу Богу, Сампсоне милостиве блаженне,// спастися душам нашим.
Кондак, глас 8
Яко врача всеизрядна и молитвенника благоприятна,/ к раце твоей Божественней притекающе, Сампсоне богомудре преподобне,/ сошедшеся любовию, псалмы и песньми, радующеся, Христа прославляем,// таковую тебе благодать подавающа исцелений.
Преподобный Мартин Туровский
Тропарь, глас 1
Тяжким недугом страждущий и людьми забытый,/ молил еси жажду утолити, преподобне Мартине,/ темже Христос посла с Небесе благоверных Бориса и Глеба/ тебе послужити и недуг исцелити.
Преподобный Амвросий Оптинский (обретение мощей)
Тропарь глас 5
Яко к целебному источнику,/ притекаем к тебе, Амвросие, отче наш,/ ты бо на путь спасения нас верно наставляеши,/ молитвами от бед и напастей охраняеши,/ в телесных и душевных скорбех утешаеши,/ паче же смирению, терпению и любви научаеши;/ моли человеколюбца Христа/ и Заступницу усердную// спастися душам нашим.
Кондак, глас 2
Завет Пастыреначальника исполнив,/ старчества благодать наследовал еси,/ болезнуя сердцем о всех, с верою притекающих к тебе./ Темже и мы, чада твоя, с любовию вопием ти:/ отче святый Амвросие,// моли Христа Бога спастися душам нашим.
28 июня/11 июля
Преподобные Сергий и Герман Валаамские
Тропарь, глас 4
Евангелия Христова истиннии послушницы/ явистеся, преподобнии,/ мир и вся, яже в нем, яко не сущая,/ преобидевше любве ради Христовы,/ и в морский остров вселистеся,/ и трудолюбно в нем противу козней невидимых врагов подвизастеся,/ постом, бдением же и всенощным стоянием/ плоти своя духу мудре повинули есте./ Сего ради от Вседержительныя десницы достойныя венцы прияли есте,/ и ныне Пресвятей Троице предстояще, молитеся,/ всеблаженнии отцы Сергие и Германе,/ сохранитися в мире отечеству нашему// и спастися душам нашим.
Кондак, глас 4
От мирскаго жития изшедше,/ отвержением мира Христу последовасте,/ и достигосте великаго Нева езера,/ и, в нем на острове Валааме всельшеся,/ равноангельное житие пожили есте,/ отонудуже веселящеся прешли есте к Небесным чертогом./ И ныне со Ангелы Владычню Престолу предстояще,/ поминайте нас, чад своих,/ яже собрали есте, богомудрии,/ да радостно от души вопием:// радуйтеся, Сергие и Германе, отцы преблаженнии.
Преподобный Ксенофонт Робейский
Тропарь, глас 4
Пустыни явился еси доброе прозябение, / отче преподобне, / от юности бо чистое житие изволил еси, / духовному учителю последуя, / и, того учением ум твой к Небесным вперив, / в пустыню вселился еси, / и в ней обитель создал еси, / и стаду твоему премудр наставник показался еси, / великому же Новуграду похвала и утверждение, / темже и Христос, яко пресветла светильника, / чудесы обогати и прослави тя. / Ксенофонте, отче наш, / моли Христа Бога спастися душам нашим.
Бессребреники мученики Кир и Иоанн (перенесение мощей)
Тропарь, глас 5
Троичная благодать всельшися в честная сердца ваша,/ преблаженнии Кире и Иоанне,/ на духи нечистью страшни прогонителие явистеся./ И не точию явленным, но и тайным/ недугом врачеве бысте,/ темже, дерзновение имуще к Человеколюбцу Богу,/ непрестанною молитвою душевныя наша страсти исцелите.
Ин тропарь, глас 5
Святии славнии Кире и Иоанне,/ безсребренницы, мученицы и чудотворцы,/ милосердием своим, яко стеною необоримою, нас оградите от всех бед/ и от врагов видимых и невидимых сохраните/ непрестанною вашею молитвою ко Господу.
Ин тропарь, глас 5
Премудрии вселенней врачеве,/ Кире и Иоанне,/ от Бога приясте власть целити недуги душевныя,/ вкупе же и телесныя,/ и ныне молитеся/ сохранити град и люди от одержащих зол/ и спасти молитвами вашими души наша.
Кондак, глас 3
От Божественныя благодати дар чудес приемши, святии,/ чудодействуете непрестанно,/ вся наша страсти рукодейством секуще невидимым,/ Кире богомудре со Иоанном славным:// вы бо Божественнии врачеве есте.
Ин кондак, глас 6
Великое врачевство вселенней,/ супряжение Христово возлюбленное,/ светильники сияющия, зарю исцелений,/ воспоем, вернии, велегласно,/ внутрь церкве им вопиюще:/ Кире и Иоанне,/ податели чудесем, врачеве недужным,/ освящаете вся страны.
29 июня/12 июля
Первоверховные апостолы Петр и Павел
Тропарь, глас 4
Апостолов первопрестольницы/ и вселенныя учителие,/ Владыку всех молите/ мир вселенней даровати// и душам нашим велию милость.
Кондак, глас 2
Твердыя и боговещанныя проповедатели,/ верх апостолов Твоих, Господи,/ приял еси в наслаждение благих Твоих и покой:/ болезни бо онех и смерть приял еси паче всякаго всеплодия,// Едине, сведый сердечная.
30 июня/13 июля
Собор славных и всехвальных 12-ти апостолов
Кондак апостолов
глас 2
Камень Христос каменя веры прославляет светло,/ учеников преизрядна,/ и с Павлом весь дванадесяточисленный собор днесь,/ ихже память совершающе верно,// сих Прославльшаго прославляем.
Ин кондак славных и всехвальных 12-ти апостолов
глас 2
Петра, вернии, каменя веры, похвалим/ и Павла Богомудраго,/ созывают бо всех праздновати верою,/ соборне вкупе вся дванадесяте, яко проповедники вере,/ просяща грехов оставления.
Святитель Софроний, епископ Иркутский (прославление)
Тропарь, глас 4
От юности Христа возлюбил еси, блаженне Софроние,/ добре управил еси иноческия обители/ и, архиерейства саном почтен быв,/ упасл еси Иркутскую паству,/ темже и по преставлении дарования чудес от Бога приял еси/ и молиши Христа Бога/ избавити нас от бед и спасти души наша.
Ин тропарь, глас 1
Скорый в бедах и скорбех заступниче,/ отче иерарше страны Сибирский,/ святителю Софроние,/ на Небеси предстояй с первоиерархом Иркутския Церкве и всеми святыми,/ выну имаши благоволение Господа славы,/ призри на люди, притекающия к честным останкам святых мощей твоих,/ с верою и любовию слезно просящия твоея помощи и заступления,/ моли, Егоже проповедал еси людем Сибири,/ избавити я от находящих зол и наветов вражиих,/ просветити людей оляденевшая древле неверием сердца,/ даровати утверждение веры Христовы/ и спасти души наша.
Кондак, глас 4
Соименнаго мудрости иерарха,/ изрядное Церкве Иркутския украшение,/ отца нашего святителя Софрония любовию восхвалим, вси вернии,/ той бо есть хранитель града и страны сея/ и молитвенник о душах наших.
Ин кондак, глас 3
Пастырей Начальнику, Христу,/ трудился еси, святителю Софроние,/ на пажити духовней северныя страны нашел,/ языцы монгольстии от прелести и скверны идольския избавляя,/ привел еси я к свету веры Христовой,/ и ныне, со Ангелы Владычню Престолу предстоя,/ моли непрестанно о всех нас,/ избавити ны от бед и спасти души наша.
Преподобный Петр, царевич Ордынский, Ростовский чудотворец
Тропарь, глас 8
Отечества своего, блаженне Петре, удалився,/ и богомерзкую веру отнюд возненавидев,/ от тьмы во свет пришел еси/ и вселился еси во славный и многонародный град Ростов,/ в немже житие честно пожив,/ церковь во имя святых апостол Петра и Павла воздвигл еси Христовою благодатию,/ и сию чудными иконами, яко невесту, украсив,/ святителя же, и князя, и вся люди житием своим удивил еси,/ темже и по смерти твоей Христос даром чудес обогати тя./ Поминай нас, чтущих пресветлую память твою, преподобне отче Петре,/ и моли Христа Бога спастися душам нашим.
Кондак, глас 4
Явися велие солнце Христовой Церкви,/ просвещая учения светлостьми, всечестне,/ яко черпалом златым,/ от кладязя неископаннаго чудес почерпл еси,/ от источника неистощимаго,/ на память успения твоего пришедшим, всеблаженне Петре,/ ныне всем подававши грехов прощение, славо преподобным.
Собор всех святых, в земле Тверской просиявших
(память в неделю 1-ю после 29 июня/12 июля – праздника святых апостолов Петра и Павла)
Тропарь, глас 4
Иже в земли Тверской прославльшиися, святителие, мученицы, преподобнии, праведнии и вси святии, верою, подвиги благочестия, любовию, кротостию, словом и житием Богу благоугодившии и венцы нетления и славы украсившиися, молите Христа Бога нашего даровати мир стране нашей и душам нашим в мире спастися.
Кондак, глас 8
Многими скорбьми путь земныя жизнь преидосте и, достигше края умного желания, в чертог Божественныя славы вселистеся, и ныне, радующеся со всех Царем и Богом, молитеся, яко да и мы вашего блаженства причастницы будем, ваш собор почитающии, святии покровителие Тверския страны.