Апрель
1/14 апреля
Мученик Авраамий
Болгарский, Владимирский чудотворец
Тропарь,
глас 4
Днесь,
благовернии людие, сошедшеся, / восхвалим добляго сего мученика и страдальца
Авраамия, / сей бо, укрепляемь силою Божиею, / душу свою положи за Христа, /
много пострадав от зловерных болгар. / Сего ради от Господа венец прият / и ныне
предстоит Ему / и молится о граде сем / и о всех нас,
чтущих память его.
Кондак,
глас 8
Яко
многоценное сокровище, / принесено бысть от Болгарския страны во град Владимир / пречестное тело твое, мучениче Авраамие,
/ имже подаеши всем чтущим преславную память твою обилие исцелений, / предстоя
на Небеси Христу Богу / и моля Его о спасении душ наших.
Иной
кондак, глас 3
Укрепився,
славне, любовию Господнею / и Того честный Крест на
рамо взем, иго Господне, / посрамил еси диаволя коварствия / и пострадал еси даже
до смерти, / и сего ради, досточудне, явися страдалец велик, Авраамие, / и
оружником храбротаинник / и участник Божия благодати.
Преподобный Евфимий
Суздальский
Тропарь,
глас 3
Яко
светозарная звезда, / пришел еси от востока на запад, / оставив отечество твое,
Нижний Новград, / и, дошед Богоспасаемаго града Суждаля, / в нем обитель
сотворил еси, / и, собрал еси монахов множества, / и, прием дар чудес от Бога,
отче Евфимие, / был еси о Христе собеседник / и спостник преподобному Сергию. /
С нимже у Христа Бога испроси нам здравие, и спасение, / и душам нашим велию
милость.
Кондак,
глас 2
Волнений
множество невлажно преходя, / безплотныя враги струями слез твоих погрузил еси,
/ Богомудре Евфимие преподобне, / тем и чудес дар приял еси, / моли непрестанно
о всех нас.
Преподобные
Геронтий и Леонтий канонархи, в дальних пещерах почивающии
Тропарь,
глас 3
Двоице
святая, правилоначальная, бывшая в церкви и в правиле иночестем воссиявшая
светло, всечестнии канонарси, молите Христа Бога, да прегрешений оставление
подаст душам нашим.
Кондак,
глас 1
Канонаршествующе,
честнии канонарси, и пение церковное поющим предводительствующе в церкви,
подобистеся воистину Ангелом, поющим Бога на Небеси, ихже житию подражавше и с
ними ныне ликующе, поминайте ны, любовию хвалящих вас.
Преподобный Варсонофий
(Плиханков) схиархимандрит, старец Оптинский
Тропарь,
глас 4 (творение новомученика священноинока Василия Оптинского)
Воине
доблестный и изряднейший, / светом откровения яко Павел озаренный, / вся в
уметы Христа ради вменил еси, / иноческим подвигом подвизался еси, / течение
сконча и веру соблюде, / вне стана со Христом смерть
приял еси. / Темже зовем ти: / спасай нас молитвами твоими, / преподобне
Варсонофие, отче наш.
Ин
тропарь, глас 3
Вертограда
оптинскаго прозябение, / и от земнаго воинства / пришедый в воинство духовное,
/ и преемником мудрых старцев / зде соделавыйся, / мудрых века сего обличителю
и наставниче, / и грядущих тяжких бед предвозвестителю / преподобне отче, мудре
Варсонофие, // испроси нам разума спасительнаго.
Преподобная Мария
Египетская
Тропарь,
глас 8
В
тебе, мати, известно спасеся, еже по образу, / приимши бо крест, последовала
еси Христу / и, деющи, учила еси презирати убо плоть, преходит бо / прилежати
же о души вещи безсмертней. / Темже и со Ангелы срадуется,
преподобная Марие, дух твой.
Кондак,
глас 4
Греха
мглы избежавши, / покаяния светом озаривши твое сердце, славная, / пришла еси ко Христу, / Сего Всенепорочную и святую Матерь /
молитвенницу милостивную принесла еси. / Отонудуже и прегрешений обрела еси
оставление / и со Ангелы присно срадуешися.
Иной
кондак, глас 3
Блудами первее преисполнена всяческими, / Христова
невеста днесь покаянием явися, / ангельское жительство подражающи, / демона
креста оружием погубляет. / Сего ради Царствия невеста явилася еси, Марие преславная.
2/15 апреля
Преподобный Тит чудотворец
Кондак,
глас 4
Жития
молву оставил еси / и тихо, все житие твое пожив, мудре, к Богу прешел еси, /
чудоносне отче наш, Тите преподобне.
3/16 апреля
Преподобный Никита
исповедник, игумен обители Мидикийской
Кондак,
глас 2
Небесный
ум и житие стяжав, / сияеши ясно, якоже солнце, светлостию дел, / просвещаеши
сущия во тьме житейстей, отче Никито, / и, приводя всех к Богу, / моли
непрестанно о всех нас.
4/17 апреля
Преподобный Иосиф Песнописец
Кондак,
глас 4
Покаяния
источник неисчерпаемый, / утешения податель некончаемаго / и умиления пучина
еси, Иосифе, / слезы нам подаждь покаяния
Божественнаго, / имиже утешение, зде плачущеся, / обрящем от Бога, / твоея
помощи просяще, святе.
Преподобномученики
Вениамин и Никифор
Тропарь, глас 5
Преподобнии новомученицы Вениамине и Никифоре, / во светоносныя дни Воскресения Христова пострадавшия, / вы добрым подвигом во обители Соловецтей просияли есте, / и наставницы братии в заветех иноческих явилися есте, / сохраняя чада Божия от расхищения, / и святыни от бесовскаго поругания: / темже и Господь дарует вам в Царствии Небеснем мученическия венцы. / На земли же претерпесте от безбожник насилие и изгнание, Богомудрии, / и в пламени огня души своя Владыце Христу предали есте. / Емуже ныне со Ангелы предстояще, / за обитель сию и люди российския молите // помиловатися и спастися всем нам.
Кондак, глас 7
Божественными страдании / яже за Христа прияли есте, радующеся, / отцы всеблаженнии, / яко злато в горниле, души своя во огни очистили есте: / преподобным отцем в житии, и мучеником во исповедании веры равнии, / во обители горния ко Владыце своему ныне преселистеся. / Сего ради вас прилежно чтим и ублажаем, // преподобномученицы Вениамине и Никифоре.
Преподобномученица
Мария Гатчинская
Тропарь,
глас 4
Агница Твоя, Иисусе, Мария, / утешение рабом Твоим в годину лютую
явися, / крепость веры и благочестия показавши, / мучения претерпе от
богоборцев. // Тоя молитвами, яко Милостив, спаси души
наша.
Кондак,
глас тойже
Страдалице
и благовестнице пречудная, / молитвеннице за всех скорбящих и страждущих, /
преподобномученице Мати Марие, / молися Господу Богу со всеми новомучениками
Российскими // спасение нам даровати и велию милость.
5/18 апреля
Перенесение мощей святителя
Иова, Патриарха Московского и всея Руси
Тропарь,
глас 3
Да
торжествует Церковь Христова / и да радуется град Москва, / яко возсия
светильник земли Российския, / во исповедании Истины
непоколебимой Иов Патриарх, / егоже молитвами, Господи, / вся соблазны мира
сего и ересь искорени, / люди во благочестии настави / и утверди в Православии.
Иной
тропарь, глас 5
Православия
поборниче, / веры Христовы исповедниче, / первоиерарше Церкве Русския, /
святителю отче Иове, / за ны Христа Бога моли, / веру
отеческую утвердити, / грехов оставление нам даровати / и подати миру велию
милость.
Кондак,
глас 6
Светильник
Церкве Русския / и пастырь добрый явился еси, / святителю отче Иове, / молитвою
твоею ко Господу / храни землю Российскую / н спаси
души наша.
Иной
кондак, глас 7
В
годину лютых искушений / многострадальному Иову подобяся, / в жертву живу и
непорочну / себе Христу принесл еси, / обратив паству к покаянию, / терпеливе
Иове святителю, / моли и нам за вся
благодарити Господа / и всегда воздавати / славу Богови.
Священномученик Николай
пресвитер, Кронштадский
Тропарь,
глас 4
Православия
светильника великаго,/ святаго праведнаго Иоанна Кронштадтскаго сослужителем
был еси./ Во времена безбожныя креста своего не отверглся еси,/ даже до
пролития крове верен Господеви пребыв,/
священномучениче Николае,/ моли Христа Бога,/ спасится душам нашим.
6/19 апреля
Святитель Мефодий,
архиепископ Моравский
Тропарь,
глас 4
Святителя Твоего, Христе, / творяще светло торжество успения /
милость Твою свыше подаждь, / отверзи же Царствия двери, / разреши же узы наша
многих грехов / ходатайством святаго Твоего ученика, / отца нашего.
Кондак,
глас 2
Божественна
и верна Мефодия / вси воспоим людие, и любовию ублажим, / яко пастыря великаго словеном,
/ служителя Троицы честна, / прогонителя ереси, / молит бо ся о всех нас.
Святитель Евтихий,
архиепископ Константинопольский
Тропарь,
глас 4
Правило
веры и образ кротости, / воздержания учителя / яви тя стаду твоему / Яже вещей
Истина. / Сего ради стяжал еси смирением высокая, /
нищетою богатая, / отче Евтихие, / моли Христа Бога / спастися душам нашим.
Кондак,
глас 8
Божественнаго
верно Евтихия вси поюще, людие, / любовию да ублажим, яко пастыря велика и
служителя, / и учителя премудра, и прогонителя ересей, / молит бо Господа о всех нас.
Преподобный Севастиан
Карагандинский, исповедник
Тропарь,
глас 3:
Троицы
Святыя служителю, / земне Aнгеле и небесне человече, /
духовнаго Oптинскаго старчества преемниче, / Христов священнотаинниче и
исповедниче, / Духа Святаго обитель всечестная, / преподобне отче Севастиане,
досточтиме, / испроси мирови мир / и душам нашим велию милость.
Кондак
глас 3:
В
радость Господа Воскресшаго вшедшаго, / преподобным Oптинским
старцем сликовника, / мучеников и исповедников сопричастника, /
священнотаинникам Божиим сослужителя, / земна Aнгела и небесна человека, /
града Караганды боголепное украшение, / Казахстанския страны богомольца
изрядна, / Церкви Русския похвалу / ублажим, вернии, / с веселием ему вопия: /
радуйся, Севастиане, преподобне отче наш.
7/20 апреля
Святитель Гавриил,
архиепископ Рязанский и Зарайский
Тропарь,
глас 5
Верою
и правдою Богу служа, / снискал еси любовь паствы Рязанския / Гаврииле
Святителю, / добрый пастырю словесных овец. / В годину
испытаний алчущих питал еси, / икону Богоматери Знамения, именуемую
«Корчемною», / яко источник неоскудный утешения пастве своей указал еси. / И
ныне молися о нас прилежно, / чтущих святую память твою.
Кондак,
глас 3:
Христа из млада возлюбил еси / и Тому любовию последовал еси, / мудростию
Святителя Филарета душу свою питая, / сана Святительскаго удостоен был еси, /
паству Рязанскую, от Бога ти данную, / усердно
окормлял еси, / Гаврииле Святителю, / не престай моляся о чадех твоих, / да еси
честную память твою / радостно почитаем.
Преподобный Даниил,
Переяславский чудотворец
Тропарь,
глас 3
От
юности, блаженне, / всего себе Господеви возложив, / выну повинуяся Богу, /
противяся же диаволу, / страсти греховныя победил еси, / тем сам храм Божий
быв, / и обитель красну во славу Пресвятыя Троицы воздвигнув, / и собранное
тобою в ней стадо Христово / богоугодно упас, / преставился еси к вечным обителем, / отче Данииле. / Моли Триипостаснаго во Едином Существе Бога / спастися душам нашим.
Кондак,
глас 8
Невечерняго
Света пресветлое светило, / жития чистотою просвещающее всех, / явился еси,
отче Данииле: / образ бо и правило иноком был еси, /
сиротам же отец и питатель вдовицам. / Сего ради и мы, чада твоя,
вопием ти: / радуйся, радосте и венче наш; / радуйся, многое имый к Богу
дерзновение; / радуйся, граду нашему велие утверждение.
8/21 апреля
Апостолы от 70: Иродион,
Агав, Асинкрит, Руф, Флегонт, Ерм и иже с ними
Кондак,
глас 2
Явистеся
Христовы ученицы и апостоли всечестнии, / Ирадионе славне, Агаве и Руфе, / Асинкрите,
Флегонте со Ермом, / присно молитеся Господеви / подати нам согрешений
прощение, поющим вас.
Святитель Нифонт,
архиепископ Новгородский
Тропарь, глас 4
От
мирскаго мятежа из младых ногтей исшед в тихое пристанище, честныя обители
Печерския достигл еси и, тамо ярем Христом восприим на ся, равно Ангелом житие
поживе, отнюду же пришед, святителю Христов Нифонте, в Великий Нов град, и
архиерейский престол воспринял еси и многи люди учением своим ко Христу привел еси, Егоже моли, святителю преподобне,
спастися душам нашим.
Иной
тропарь, глас 3
Яко
сый нравом православных / Восточныя Церкве преданий истинный защитник, /
сподобился еси великаго во отцех Феодосия / видети по смерти, яко жива, /
возвещающа тебе Царствия Небеснаго наследие, / егоже неизреченных доброт / ныне
с ним неразлучно наслаждаяся, / моли и о нас, чадех своих, Нифонте прехвальне.
Кондак,
глас 8
Возложив себе от юности Богу, преподобне, мир тленных
ни во чтоже вменив и паче всех Христа возлюбив, Тому от всея души любовию
последовал еси и, яко светозарное солнце, от Киева просия во вся концы Русския
земли добродетелию и бысть пастырь великому Нову граду, и добре упас стадо
Христово словесных овец на пажитех духовных, к Богу отшел еси, и ныне со Ангелы Владычню Престолу предстоя, нас поминай, раб
своих, да зовем ти: радуйся, отче Нифонте, святителем изрядная
похвало.
Иной
кондак, глас 5
Ревности древних отец / в твердом истинных догмат
хранении подобяся, / крепкоумне Нифонте, / не восхотел еси восхитившему
самовольне престол Митрополии Климу сослужитель быти, / избранному же на се от
всех, покорся, / священнолепне с ним служил еси / и, жизнь свою скончав, /
обрел еси безконечное Царство Христово.
Преподобный
Руф, в дальних пещерах почивающий
Тропарь,
глас 8
Послушание
святое, нарицающееся живот, преподобне отче Руфе, прием, живот вечный оным
постигл еси, идеже живя, не забуди и нас, хвалящих тя.
Кондак,
глас 6
Честна
смерть твоя, преподобне Руфе, пред Господем, честне бо и
преподобне жизнь твою в послушании святом препроводил еси. Тем тя убо почитаем,
яко послушником образ и наставник.
9/22 апреля
Мученики Рафаил, Николай и
Ирина Лесбосская (Греч.)
Тропарь,
глас 4
За
Христа Бога на Лесбосе подвизавшиеся, освятили его обретением мощей своих,
блаженные; темже почитаем вас, Рафаиле Богоносне, вкупе с Николаем и Ириною
девою, небесных заступников наших и молитвенников ко
Господу.
10/23 апреля
Священномученик Григорий V, Патриарх
Константинопольский
Тропарь,
глас 4
Яко
жертва благоприятная / Богу всяческих священствуеши
преподобно / и, яко усердный подвижник / Христу предстательствуеши. / Сего ради, воистину, повешение твое
знаменоваше избавление / эллинских людей от долгаго рабства. / Сице,
священномучениче Григорие, почитаем тя.
Ин
тропарь, глас 7, творение святителя Афанасия Ковровскаго
Святителю и мучениче Григорие, / за люди твоя душу
положивый / и в светоносный день Христова Воскресения пострадавый, / молися
Страдавшему за ны и Воскресшему / Церковь Православную незыблему всегда
хранити, / пастве же твоей и Русстей земле, / святыя мощи твоя с любовию лета
многа хранившей, / даровати мир и велию милость.
Ин
тропарь, глас 8
Благословен
еси, Христе Боже наш, / укрепивый Божественнаго патриарха, / низпославый тому
свыше Свою благодать, / имже и нас свободил еси от
работы вражия,/ Человеколюбче, слава Тебе.
Кондак,
глас 8
Яко
патриархов великое удобрение / и архиереом первопрестольника премудраго, / иночествующим наставника и правило, / мучеников славу и
красоту, / церковная чада, сошедшеся, почтим память, глаголюще: / радуйся, отче
Григорие, бодрый уме и всесовершенный.
Мученики Терентий, Помпий,
Африкан, Мксим, Зинон, Александр, Феодор и иные 33
Тропарь,
глас 4
Воинство
богособранное, всехвальных страдалец, твердостию веры от Африки стекшихся, доблественне подвизавшееся, единомудренни бо разумом
и нравы явльшеся, сострадальцы в подвизех показашася вси. И ныне молятся, всем
спастися.
Кондак,
глас 2
Мученическая
честная память прииде днесь, / веселящи всяческая, / Терентия премудраго и
дружины его. / Темже убо стецемся, да приимем исцеления, / сии бо благодать от
Бога прияша Духа Святаго / исцеляти недуги душ наших.
11/24 апреля
Священномученик Антипа,
епископ Пергама Асийского
Тропарь,
глас 4
Идольския
лести упразднил еси, Антипо, / и, диавольскую поправ силу, / пред
богоборцы дерзновенно Христа исповедал еси. / Темже со
Ангельскими чины в Вышних водворяяся, / Владыце всех славословие принося, / и о
нас молебное благодарение предлагаеши, / благодать цельбы даруя. / Сего ради тя
чтим, / священномучениче Антипо, / моли Христа Бога, / да спасет души наша.
Кондак,
глас 4
Апостолов
сопрестольник и святителей украшение / был еси, блаженне, / мученически
прославився, / возсиял еси, якоже солнце, всех
просвещая, / Антипо священне, / разрушил еси безбожия нощь глубокую. / Сего
ради тя почитаем, / яко Божественного суща священномученика / и целеб подателя.
Святитель Варсонофий, еп.
Тверской
Тропарь,
глас 4
Тихостию
нрава направляемый, святителю Варсонофие, в тихое
пристанище достигл еси, смиренномудрия ради удобно избежав сопротивных сетей, святою
душею твоею на Небеса возлетел еси, идеже Христу предстоя, моли спастися нам,
почитающим память твою.
Кондак,
глас 5
Якоже
звезда всесветлая, добродетельми сияющи, был еси обогатив себе молитвою, и
постом, и тело свое веригами удручая, в полоне же от
иноплеменник много пострадал еси. Непоколебим верою
многая лета Ангелом купно соединим, бесовская ополчения огорчаваше. Последуя
безмездником Косме и Дамиану, врачебною хитростию многия исцелил еси. Темже ныне честное и боготрудное тело твое, от земных недр
обретенное, чудесы Господь прослави, исцеляеши бо многонедужныя не токмо у
гроба, но и от честных вериг подаеши неоскудно целебныя дары приходящим с
верою.
Преподобный Иаков, игумен
Железноборовский
Тропарь,
глас 4
Небеснаго
желая, / земная возненавидел еси / и, взем крест свой, последовал еси Христу /
и от Него прием дарования чудес, / исцеляти недужныя; / но, яко имея
дерзновение ко Святей Троице, / испроси православным
христианом здравие и спасение, / на враги же победу / и не забуди, посещая чад
своих, / припадающих к цельбоносному гробу твоему, / Иакове, преподобне отче
наш.
Кондак,
глас 8
Сердечная
очи, досточудне, ко Господу вперив / и телесныя
страсти из корене исторгая, / неболезненную жизнь в болезнех восприял еси, преподобне,
/ болезнем же лютым даеши исцеление просящим с верою у тебе, / темже молим тя,
досточудне, / исцели наша болезни душевныя и телесныя,
да зовем ти: / радуйся, Иакове Богомудре, отче наш.
Преподобные
Евфимий и ученик его Харитон Сянжемские
Тропарь,
глас 1
Пустынное
и безмолвное житие ваше постнически препроводивше, Христов бо крест на рамо
вземше и Того стопам усердно последовавше, на
невидимаго врага мужески ополчистеся и того козни сокрушисте, молитвами и
слезами, чистотою Богови приближившеся, преподобнии отцы наши Евфимие и
Харитоне. Яко солнце, осияваете светозарными лучами чудес ваших, всех нас
спасите, с верою призывающих вас и творящих честную вашу память, и, яко имущии
дерзновение ко Спасу, мир мирови испросите и спастися
душам нашим.
12/25 апреля
Преподобный Василий
исповедник, епископ Парийский
Кондак,
глас 2
Вышняго
светом озарився, блаженне, / просвещаеши вся, / иже любовию чествующия твое,
отче, честное страдание. / Василие священнострадальне, / моли Христа Бога /
непрестанно о всех нас.
14/27 апреля
Святитель Мартин
исповедник, папа Римский
Тропарь,
глас 4
Истинных
повелений устне распространил еси, / учении Божественными
вся просветил еси, / зловерие низложил еси, Богомудре Мартине, / святителю
всечестне, / поминай нас, угодниче Христов, / еже к Нему ходатайствы твоими, /
да в мире устроиши живот наш.
Мученики Антоний, Иоанн и
Евстафий, Литовские
Тропарь,
глас 4
Иже
земных чести и славы отвергшеся, / доблии и честнии страдальцы, / веры ради
крепко и мужественно муки претерпесте, / на смерть себе вдавше за Живот всех -
Владыку. / Темже и Христос преславно столпом облачным / с Небесе вас озари / и
почестьми и венцы от Престола славы венча. / Со Ангелы
Тому предстояще, / молите спастися душам нашим.
Иной
тропарь, глас 4
От
корене неплодна, преблаженнии, / возрастивше Православныя веры ветви, /
первомучеником тезоименитии явистеся: / злаго бо и
нечестиваго князя ярости не убоястеся, / повелевающа Христа отрещися. / Сего
ради мученическия венцы приемше / и со Ангелы Престолу
Владычню предстояще, / о нас молитеся, преблаженнии, / православно чтущих
святую память вашу.
Кондак,
глас 3
Отеческую
прелесть оставльше, святии, / приведостеся Христови, / всем души усердием
стасте мужемудренно до смерти. / Темже и взясте победы почесть воистинну, / о всех Владыку нашего непрестанно моляще.
15/28 апреля
Апостолы от 70: Аристарх,
Пуд, Трофим
Кондак,
глас 4
Явися апостольский честный сей праздник, / просвещая
нас и греховную мглу прогоняя, зовущим: / явися Свет, и прииде избавление.
16/29 апреля
Мученица Ирина
Кондак,
глас 4
Крепко
душу, Ирино, ополчило еси верою, / яве лукаваго посрамивши, / и ко Христу привела еси тьмы людей множества, блаженная, / и,
порфиру от кровей носящи, / со Ангелы ныне веселишися.
17/30 апреля
Преподобный Зосима, игумен
Соловецкий
Тропарь,
глас 4
Изволением
Божественнаго разума / вселился еси в пустыню / и тамо, вперив ум твой в
Небесныя обители, / равно Ангелом житие на земли пожив, / в молитвах, и трудех,
и пощениих / образ был еси твоим учеником. / Отонудуже Бог, видя твое благое
изволение, / умножи тебе чада в пустыни, слез твоих теченьми напаяемей. / Но,
яко имея дерзновение к Богу, / поминай стадо, еже собрал еси, мудре, / и не
забуди, якоже обещался еси, / посещая чад твоих, / Зосимо преподобне, отче наш.
Кондак,
глас 8
Христовою
любовию уязвися, преподобне, / и Того Крест славный,
на рамо взем, / понесл еси, божественне вооружився, / и непрестанныя молитвы,
яко копие в руце, имый, / крепко ссекл еси бесовская ополчения. / Тем зовем ти:
/ радуйся, преподобне отче Зосимо, монахов удобрение.
Преподобный Александр
Свирский
Тропарь,
глас 4
От юности, Богомудре, желанием духовным в пустыню
вселився, / единаго Христа возжелал еси усердно стопам в след ходити, / темже и
ангельстии чини зряще тя, удивишася, / како с плотию к невидимым кознем
подвизався, премудре, / победил еси полки страстей воздержанием / и явился еси
равноангелен на земли, / Александре преподобне, / моли Христа Бога, / да спасет
души наша.
Кондак,
глас 8
Яко многосветлая звезда днесь в странах Российских возсиял
еси, отче, / вселився в пустыню, Христовым стопам последовати усердно возжелел
еси / и, Того святое иго на рамо твое взем - честный крест, / умертвил еси
труды подвиг твоих телесная взыграния, / темже вопием ти: / спаси стадо твое,
еже собрал еси мудре, да зовем ти: / радуйся, преподобне Александре, отче наш.
18 апреля/1 мая
Преподобный Иоанн, ученик
преподобного Григория Декаполита
Кондак,
глас 4
Воздержанием,
отче, житие украсив, и плоть умертвил еси, / темже и
победил еси вражия прилоги, преблаженне, / и прешел еси к Богу в безскорбный и
вечный живот, / яко достоин наследник, Иоанне, / Емуже молися спастися нам.
Преподобный Евфимий, праведные Антоний и Феликс Карельские
Тропарь,
глас 7
Богу посвятив себе, /
дарований велиих от того исполнився, / многосветлую зарю воссиял еси в пределех
беломория, / откровением божественного ведения. / Преподобных лик украсил еси,
отче наш Евфимие, / молися с праведными Антонием и Феликсом // даровати нам мир
и велию милость.
Кондак,
глас 5
На
земли ныне жительствуя, / чистоты и благочестия образ показал еси, Евфимие, / обитель
быв Святому Духу, / во стране полунощней иноком
обитель основал еси, / яже мощи прият праведных Антония и Феликса. / С ними же
тя прославляюще, преподобне, воспеваем: / радуйтеся, отцы всечестнии, // страны
поморския славо и утверждение.
19 апреля/2 мая
Блаженная Матрона
Московская
Тропарь,
глас 2
Богом
умудренную блаженную старицу Матрону, / земли Тульския процветение / и града
Москвы преславное украшение, / восхвалим днесь, вернии. Сия
бо, света дневнаго не познавши, / светом Христовым просветися / и даром
прозрения и исцеления обогатися. / Пресельница же и странница
на земли бывши, / ныне в чертозех Небесных Престолу Божию предстоит / и молится
о душах наших.
Кондак,
глас 7
К
служению Христову / от чрева матерня предызбранная, / праведная Матроно, /
стезею скорбей и печалей шествующи, / твердую веру и благочестие
явивши, / Богу угодила еси. / Темже, почитающе память твою, молим тя: / помози
и нам в любви Божии пребывати, / старице блаженная.
20 апреля/3 мая
Преподобный Феодор Трихина
Кондак,
глас 4
Явился
еси предивен житием, / Феодоре мудре отче, / власяными
рубы изменив / паче царских сокровищ, / яже на земли, / сего ради небесную
одежду восприял еси, / присно моли о нас, преподобне.
Преподобный Александр,
игумен Ошевенский, Каргопольский чудотворец
Тропарь,
глас 4
Христа,
истиннаго Бога, всею душею возлюбил еси / и Тому невозвратным желанием
последовал еси, / вся же красная и сладкая мира сего возненавидев, / яко
небопарный орел, на Небеса возлете / и тамо со Ангелы
ликуеши и со всеми святыми Святей Троице предстоиши, / моли и нам спастися,
чадом твоим, / якоже обещася, Александре преподобне, отче наш.
Кондак,
глас 8
Родителей
своих любовь отринул еси / и дом свой, яко чужд, оставил еси, / водвори бо ся в
пустыню, / и тамо виде Бог труды твоя и подвиги, / пастыря и наставника
избранному Своему стаду сподобляет тя / и по
преставлении великими чудесы прославляет тя, / исцеляти различныя недуги. /
Моли о нас Христа Бога, / празднующих любовию святую память твою, / да вси
единогласно вопием ти: / радуйся, Александре преподобне, отче наш.
Мученик младенец Гавриил
Белостокский
Тропарь,
глас 5
Святый
младенче Гаврииле, / ты за Прободеннаго нас ради от иудей / люте от онехже в
ребра прободен был еси / и за Истощившаго кровь Свою
за нас / все тело твое на истощение крове / в лютыя язвы предал еси, / ныне же
во славе вечней с Ним вселился еси. / Тем помяни и нас, молим, зде чтущих
память твою, / прося нам здравие телеси / и спасение душам нашим.
Кондак,
глас 6
Отечество
твое Зверки бысть, / мучениче Христов Гаврииле, /
идеже от истых зверей - иудеев восхищен: / абие родителей лишен еси, / таже вся
поряду люте претерпев, / в отечество Небесное преселился еси. / Восхищай и нас
зде от всяких напастей и скорбей / и умоли, молим тя, / улучити вечное наследие
твое.
Святитель Николай
(Велимирович), епископ Охридский и Жичский
Тропарь,
глас 8
Златоустый
проповедниче Воскресшаго Христа, путеводителю рода Сербскаго крестоноснаго в
веках, благогласная лиро Духа Святаго, славо и любы монахов, радованье и
похвало священников, учителю покаяния, предводителю богомольна воинства Христова
святый Николае Сербский и всеправославный: со всеми святыми Небесныя Сербии
моли Единаго Человеколюбца да дарует мир и единение роду нашему.
Кондак,
глас 3
Сербскаго
Лелича рождение, архипастырем во Охриде святаго Наума был еси, от престола
святителя Саввы в Жичу предстал еси, научая и просвещая люди Божия Святым
Евангелием. Многия к покаянию и любве ко Христу привел
еси, Христа ради страсти в Дахау претерпел еси, и сего ради, святе, от Онего же
прославлен еси, Николае, Божий новоявленный угодниче.
21 апреля/4 мая
Священномученик Ианнуарий
епископ и мученик Феодор, иже в Пергии
Кондак,
глас 3
Священия
помазанием и мучения кровию украсистеся, / славне Ианнуарие и Феодоре, / и сияете всюду, в Вышних ликующе, / и нас
назирайте, в храм ваш пришедшия / и в нем непрестанно зовущия: / всех нас
соблюдите, моляще Человеколюбца Бога.
Праведный Алексий
Бортсурманский
Тропарь, глас 4:
Петрово имый покаяние, безсребреником друг вчинился
еси. Христово смирение приим в сердце, и нам Тому работати усердно заповедал
еси. Темже и мы радостно вопием: спасай нас молитвами твоими, святый праведный
отче наш Алексие.
Ин тропарь, глас тойже:
Вознесе Господь бездну смирения твоего превыше небес и
дарова нам имя твое во источник предивных чудес. Темже
во Христе во веки живый, чудотворче, молитвою спасая
сущия в бедах, слыши чада твоя, верою призывающия тя, Алексие праведне,
возлюбленный пастырю наш.
Кондак, глас 4:
К пресвитерству усердному
видением Ангела призванный, пастырь дивный Церкве Христовы явился еси, праведне
отче наш Алексие. Моли Христа Бога нашего, грехов оставление нам даровати и с
тобою в Царствии Божием быти.
22 апреля/5 мая
Преподобный Феодор Сикеот,
епископ Анастасиупольский
Тропарь,
глас 2
Познан
быв от пелен освящен / и явлься благодатей исполнен, / чудесы мир озарил еси /
и демонов множество отгнал еси, / священнодетелю Феодоре,
/ темже о нас молися Господеви.
Кондак,
глас 3
Яко
на огненную колесницу добродетельми, Богоносе, возшед, / востекл еси на
Небесная жилища, / яко Ангел, с человеки пожил еси / и, яко человек, со Ангелы окрест ликовствуеши. / Сего
ради показался еси / чудес Божественное приятелище, Феодоре преподобне.
Благоверный князь
Всеволод-Гавриил Псковский
Тропарь,
глас 4
Наста
днесь всечестный новый праздник, / пренесение честных мощей / блаженнаго князя
Гавриила, / веселящи изрядно всех благочестивых множества, / темже, вси вернии,
/ сошедшеся во святый храм Живоначальныя Троицы,
возопием: / блаженне княже Гаврииле, / имея дерзновение ко Христу Богу, / моли
спастися празднующим любовию память твою.
Кондак,
глас 8
Возвеселися,
Христова церковь, / имущи в себе источника чудесем обильна. / Днесь, любовию
сошедшеся в тя, людие твои, / в пренесение честных мощей блаженнаго князя
Гавриила, / воспоем песнь единому Богу в Троице, радующеся, / сподобльшаго нас
видети пречестное сокровище, мощи его, / от мног лет сокровенны, напоследок же
нам явлены. / Яко да молитвами его к Богу от всех находящих зол избавимся / и
радостною душею и веселием сердца / благодарная
воспоем, глаголюще: / радуйся, утверждение граду нашему.
23 апреля/6 мая
Великомученик Георгий
Победоносец
Тропарь,
глас 4
Яко
пленных свободитель / и нищих защититель, / немощствующих врач, / Победоносче
великомучениче Георгие, / моли Христа Бога спастися душам нашим.
Иной
тропарь, глас 4
Подвигом
добрым подвизался еси, / страстотерпче Христов, / верою и мучителей обличил еси
нечестие, / жертва же благоприятна Богу принеслся еси. / Темже и венец приял
еси победы / и молитвами, святе, твоими всем подаеши / прегрешений прощение.
Кондак,
глас 4
Возделан
от Бога показался еси благочестия делатель честнейший, / добродетелей рукояти
собрав себе, / сеяв бо в слезах, веселием жнеши, /
страдальчествовав же кровию, Христа приял еси, / и молитвами, святе, твоими
всем подаеши прегрешений прощение.
Мученица царица Александра
Тропарь,
глас 4
Царства
земнаго славу презревши, Единаго Христа, нас ради распятаго, возлюбила еси и,
Того мужественнее исповедающи, венцем мученическим увенчалася еси, всеблаженная
царице Александро. Темже и ныне Престолу Царя Славы на небесех предстоящи, молися
о спасении душ наших.
24 апреля/7 мая
Мученик Савва Стратилат
Тропарь,
глас 5
Земнаго
сана пояс оставив и почести, страдальче, / пред мучителем, льстивым царем /
Христа, Бога суща, исповедал еси / и Того ради многа страдания
подъял еси, славне. / Тем прекрасным победы венцем увязлся еси / от Царя всех
царствующаго, / с Небесными вои светло преукрашен. /
Предстоя Тому, Савво, / моли, да спасет души наша.
Кондак,
глас 4
Непобедимый
явлься стратилат, / варварския козни победил еси / и, страдальчествовав,
славне, твердейши, / множество врагов невидимых поборил еси, / темже венец
исплел еси победы. / О нас моли Христа, Савво всеблаженне, / верою почитающих
тя.
Преподобные Савва и Алексий
затворники, в ближних пещерах почивающие
Тропарь, глас 3
Преподобнии
и богоноснии отцы наши Савво и Алексие, яко стяжавшии дерзновение ко Господу равноангельным своим житием, егоже ради обогати
Христос нетлением и чудесы мощи ваша,
молим вас прилежно: испросите душам нашим очищение и велию и богатую милость.
Кондак,
глас 4
Богатство
благодати и сыноположения стяжасте многими подвиги и добродетельми, ихже ради
Христос всели души ваша в Небесныя селения Своя,
даровав благодать нетления и чудес мощем вашим, сего ради вопием вам:
радуйтеся, Савво и Алексие, ликов иноческих похвало и украшение.
Преподобная Елисавета
чудотворица, игумения Константинопольская
Тропарь,
глас 8
Добродетельми
украсившеся, всехвальная, и богобоязнством предивная всех явися, нищим
сокровище, богатство на Небесех восприимше, чтущих поминай нас, праведным слава.
Кондак,
глас 6
Истинне
изрядне слово жизни стяжете, церковь свою, праведныя не усомнився высоты,
богонаказатели, Богу угодивши, тем паче естества поитеся; сего ради зовем ти: радуйся, Елисавето премудрая.
25 апреля/8 мая
Апостол и евангелист Марк
Тропарь,
глас 3
Апостоле
святый и Евангелисте Марко, / моли Милостиваго Бога, / да прегрешений
оставление / подаст душам нашим.
Иной
тропарь, глас 3
У
верховнаго Петра научився, / апостол Христов был еси / и, яко солнце, странам
возсиял еси, / Александриом удобрение быв, блаженне: /
тобою Египет от прелести свободися, / евангельским твоим учением просвещ вся, /
яко свет, столп церковный. / Сего ради твою память чтуще, светло празднуем, / Марко, Богогласе, /
моли тобою благовестимаго Бога / да согрешений оставление подаст душам нашим.
Кондак,
глас 2
С
высоты приим благодать Духа, / риторская плетения разрушил еси, апостоле, / и,
языки вся уловив, Марко всеславне, / твоему Владыце
привел еси, / Божественное проповедав Евангелие.
Преподобный Сильвестр
Обнорский
Тропарь,
глас 6
Иже
измлада Христа возлюбив / и верою к Нему приближся, / изнурил еси, в пустыни
живый, многострадальное тело твое. / Тем, блаженне Сильвестре, со Ангелы ликовствуя, / моли Христа Бога мир мирови даровати
/ и буди помощник верою призывающим тя на помощь / и чтущим святую память твою.
Иной
тропарь, глас 4
Яко
добр блаженнаго Сергия ученик, / вере и благочестию его
подражая, / стяжал еси даров Духа Святаго сокровище / и силы многи соделал еси
о Господе / во спасение и утешение верных. / Не остави убо и
нас, с верою притекающих к тебе, / Сильвестре преподобне.
Кондак,
глас 6
Иной
кондак, глас 6
Подвигом
добрым подвизался еси, преподобне, / и душу твою, яко жертву чисту и непорочну,
Богу принесл еси, / по успении твоем являешися теплый наш пред Богом
молитвенник, / сего ради, верою притекающе к тебе,
взываем: / радуйся, преподобне отче Сильвестре.
26 апреля/9 мая
Священномученик Василий, епископ
Амасийский
Кондак,
глас 4
Царево
повеление преобидев, / Царство Небесное получил еси, Василие, / в немже ликуя,
/ поминай нас, чтущих память твою, / священномучениче.
Святитель Стефан
Великопермский
Тропарь,
глас 8
Православия
наставниче, благочестия учителю и чистоты, Волынския паствы светильниче,
архиереев богодухновенное удобрение, Стефане премудре, ученьми своими вся просветил еси, цевнице духовная, моли Христа Бога
спастися душам нашим.
Иной
тропарь, глас 4
Божественным
желанием / от юнаго возраста, Стефане премудре, разжегся, / ярем Христов взял
еси, / и людей оляденевшая древле неверием сердца, / Божественное семя в них сеяв, / евангельски духовне породил еси. / Темже преславную твою память почитающе, молим тя: / моли, Егоже
проповедал еси, / да спасет души наша.
Кондак,
глас 4
Стефан,
исполнь веры и благочестия, совершитель Богом основанныя церкве Печерския,
днесь, яко великое светило, всем возсия, Христово стадо богоугодно упас, в неусыпных стражех нощных. Егоже чтуще, приносим песнь
единому Тебе, Христу, всех Владыце, моляще помиловати нас того благоприятными
молитвами.
Иной
кондак, глас 8
Самозванен
не ищущим тебе, святителю, обрелся еси, / люди от идольския лести свободив, / ко Христове вере привел еси, / и волхва пансотника посрамил
еси, / темже и первый епископ и учитель Перми был еси. / Сего ради духовная
твоя чада, / яко тобою избавльшеся от идол,
благодарная тебе возопием: / радуйся, Стефане, учителю премудрый.
27 апреля/10 мая
Апостол и священномученик
Симеон, епископ Иерусалимский, сродник Господень
Тропарь,
глас 1
Христова
тя сродника, Симеоне священноначальниче, / и мученика
тверда священно восхваляем, / прелесть потребившаго / и веру соблюдшаго. /
Темже, днесь всесвятую твою память празднующе, / грехов разрешение молитвами
твоими приемлем.
Иной
тропарь, глас 4
В мире радуешися, Симеоне Иерусалимский, / любезно
Христу Богу, / тело душевное чисто сохранив, / претерпевый страсть телесную,
долготерпеливе, крепко, / и в конец на кресте распят бысть. / Ты бо, Истинному Рачителю подобяся, / и от мира
скоро отлучися, / лютыя язвы на себе понесе / и молишися о душах наших.
Кондак,
глас 4
Яко
звезду превелию, Церковь, имущи днесь Богоглаголиваго Симеона, / световодится,
зовущи: / радуйся, мучеников честный венче.
28 апреля/11 мая
Апостолы от 70: Иасон и
Сосипатр
Тропарь,
глас 3
Апостоли
святии, / молите Милостиваго Бога, / да прегрешений оставление / подаст душам
нашим.
Кондак,
глас 4
Явистеся,
яко звезды пресветлыя, / просвещающе всю вселенную светом проповедания, / апостоли
Божественнии / Иасоне и Сосипатре, / спасайте верою чтущих вас.
29 апреля/12 мая
Девять мучеников
Кизических: Феогнид, Руф, Антипатр, Феостих, Артема, Магн, Феодот, Фавмасий,
Филимон
Тропарь,
глас 8
Святии
девяточисленнии мученицы, / от различных градов во
един лик совокупившеся манием Божественным, / мужественно за Христа
пострадасте, / невидимаго врага победисте, / зловерныя князи и мучители
посрамисте вашим терпением, / огнем же любве Божия разжизаеми, / вещественно
вас огнь мучащий в хлад преложисте, / темже дадеся вам от Христа Бога благодать
/ трясавичную исцеляти болезнь, / от неяже и многовидных страстей, / милостивно
спасайте и нас предстательством вашим, молимся.
Кондак,
глас 2
Твердый
и всесветлый лик мученик девяти, / Трисолнечнаго Божества исповедницы, / на
судищи Тому начально взываху: / кровь и души наша с телесы, / яко непорочную
жертву, приносим Тебе, Владыко, / в лицех Небесных Твоих
сопричти, яко Бог Милостивый.
30 апреля/ 13 мая
Апостол Иаков Зеведеев
Тропарь,
глас 3
Апостол
Христов был еси избранный / и Богослову возлюбленному
брат единородный, / всехвальне Иакове, / поющим тя грехов оставление испроси /
и душам нашим велию милость.
Кондак,
глас 2
Глас
Божественный слышав призывающ тя, / любовь отца презрел еси / и притекл еси ко Христу, Иакове, / с сродником твоим, славне, / снимже
сподобился еси видети / Господне Божественное Преображение.
Святитель Игнатий
Брянчанинов
Тропарь,
глас 8
Православия
поборниче, / покаяния и молитвы делателю и учителю изрядный,
/ архиереев Богодухновенное украшение, / монашествующих славо и похвало, /
писании твоими вся ны уцеломудрил еси. / Цевнице духовная, Игнатие Богомудре, /
моли Слова Христа Бога, Егоже носил еси в сердце твоем, / даровати нам прежде
конца покаяние.
Иной
тропарь, глас 8
Избранник
возлюблен Христови явился еси, / Тому скорбьми многими
и молитвою непрестанною прилепився, / благодать Духа Святаго стяжав, / учитель
изряден людем был еси. / Поминай нас, святителю Игнатие, богоносе Российский, / да учении и молитвами твоими покаяние
спасительное обрящем / и любовию сердечною Христу усвоимся.
Кондак,
глас 8
Аще
и совершал еси стезю жития земнаго, святителю Игнатие, / обаче непрестанно зрел
еси законы бытия вечнаго, / сему поучая ученики
словесы многими, / имже последовати и нам, святче, помолися.
Святитель Никита, епископ
Новгородский
Тропарь,
глас 4
Насладився,
богомудре, воздержания и желание плоти твоея обуздав, на престоле святительства
сел еси и, яко звезда многосветлая, просвещая верных сердца зарями чудес твоих,
отче наш святителю Никито, и ныне моли Христа Бога, да спасет души наша.
Кондак,
глас 6
Архиерейства
саном почтився и чисте Чистейшему предстоя, прилежно моление за люди твоя приносил еси, яко и дождь молитвою свел еси, овогда же
и града запаления угасил еси. И ныне, святителю Никито, моли Христа Бога спасти
люди твоя молящияся, да вси вопием ти: радуйся,
святителю, отче предивный.
Литература:
Жития русских святых
«Минея» М.: Издательский Совет РПЦ,
2002.
«Октоих» М.: Издательский Совет РПЦ,
2000.
«Православный календарь на 2003-2004
гг.» Дмитрия на сайте www.days.ru.
«Православный календарь с богослужебными
указаниями, с тропарями и кондаками за
«Православный церковный календарь за
2005 г» Международный православно-просветительский центр при МП.
«Триодь постная» М.: Издательский Совет
РПЦ, 2002.
«Триодь цветная» М.: Издательский Совет
РПЦ, 2002.
Иконы и переводы богослужебных текстов
на русский язык о. Амвросия (Тимрота) на сайте wertograd.narod.ru.
Христианство. Энциклопедический словарь.
М. 1995.
http://ustavschik.livejournal.com/