МОЛИТВЫ ПЕРЕД НАЧАЛОМ ИКОНОПИСАНИЯ Царю Небесный, гл. 6 или тропарь двунадесятаго праздника (в период попразднства).
Тропарь Нерукотворенному образу, гл. 2
Пречистому Твоему образу покланяемся, Благий, просяще прощения прегрешений наших, Христе Боже: волею бо благоволил еси плотию взыти на Крест, да избавиши яже создал еси от работы вражия. Тем благодарственно вопием Ти: радости исполнил еси вся, Спасе наш, пришедый спасти мир.
Аще начинаем иконостас, или икону писати, чтем и сей тропарь о призывании помощи Духа Святаго пред началом всякого добраго дела, гл. 2
Творче и Создателю всяческих, Боже, дела рук наших, к славе Твоей начинаемая, Твоим благословением спешно исправи, и нас от всякаго зла избави, яко един всесилен, и человеколюбец.
Тропарь преподобному Алипию Иконописцу (ок. 1114), гл. 8
Зраки изобразуя святых на дщицах, сих благодеяния спешно, яко искусен художник, всехвальне Алипие, написовал еси на скрижалех твоего сердца и сего ради, аки образ, Благолепне украшен, священства благодатию, аки златом,обложился еси от Христа Бога и Спаса душ наших.
Тропарь преподобному Андрею Рублеву (до 1426),гл. 3
Божественнаго Света нетварными лучами облистаемый, апостолам на Фаворе уподобился еси, преподобне Андрее, и яко всех превосходя в премудрости зельне, Христа познал еси ипостасную премудрость и силу, и иконою честною всему миру проповедал еси Троицу во единице, Творца Бога нашего, тою зловерие и безверие посрамил еси и демонов полки устрашил еси. Мы же со удивлением и радостию вопием ти: имеяй дерзновение ко Пресвятей Троице, моли спастися душам нашим.
Молитва
Господи Иисусе Христе, Боже наш, Сый неописан по естеству Божества, и ради спасения человека в последние дни от Девы Богородицы Марии неизреченно воплотивыйся, и благоволивый тако во плоти описуем быти, иже святый образ пречистаго лика Твоего на святом убрусе напечатлел еси, и оным недуг князя Авгаря уврачевал еси, душу же его просветил еси во еже познати истиннаго Бога нашего, Иже Святым Духом вразумил еси божественнаго апостола Твоего и евангелиста Луку написати образ Пречистыя Матере Твоея, держащей Тебя, яко младенца, на объятиях Своих, и рекшей: "Благодать от Мене Рождшагося, Мене ради, да будет с сим образом": сам, Владыко, Боже всяческих, просвети и вразуми душу, сердце и ум раба твоего (имя рек), и руки его направи, во еже безгрешно и изрядноизображати жительство Твое, Пречистыя Матере Твоея, и всех святых, во славу Твою, ради украшения и благолепия святыя церкве Твоея, и во отпущение грехов всем, духовно покланяющимся святым иконам, и благоговейно лобызающим оныя, и почитание относящим к Первообразу. Избави же его от всякаго диавольского наваждения, егда преуспевает заповедях Твоих, молитвами Пречистыя Матере Твоея, святаго славнаго апостола и евангелиста Луки и всех святых. Аминь.
ПО ОКОНЧАНИИ ИКОНОПИСАНИЯ
Кондак Нерукотвореннаго образа, гл.2
Неизреченнаго и Божественнаго Твоего к человеком смотрения, неописанное Слово Отчее, и Образ неописанный, и Богописанный победителен ведуще неложнаго Твоего воплощения, почитаем того, лобызающе.
Аще окончили иконостас писати или икону, чтем и сей тропарь о получении прошения, и о всяком благодеянии Божии, гл. 4
Благодарни суще недостойнии раби Твои Господи, о Твоих великих благодеяниих на нас бывших. Славяще Тя хвалим, благословим, благодарим, поем, и величаем Твое благоутробие, и рабски любовию вопием Ти: благодетелю Спасе наш, слава Тебе.
Кондак святаго апостола и евангелиста Луки, гл. 2
Истиннаго благочестия проповедника, и таин неизреченных ритора, звезду Церковную, Луку Божественнаго восхвалим: Слово бо его избра, с Павлом мудрым, языков учителя, Един ведый сердечная.
Кондак преподобному Алипию Иконописцу, гл.2
От юности Божественное в себе имея начертание, вдан был еси в научение иконнаго писания; и внегда небеси подобная Богородицы писашеся церковь, ты таможде пособствовал и видел еси Духа Святаго осияние, от Негоже приял еси чудес действо, яко иконы твоя чудотворяху, тем тя чтим и ублажаем, чудне Алипие.
Кондак преподобному Андрею Рублеву, гл.8
От юности к Божественней красоте устремляяся, чудный иконописец в земли Российстей был еси, и, богоносным твоим учителем поревновав, сиянием добродетелей украсился еси, преподобне Андрее, темже и явися Церкве нашея похвала и радование.
Достойно есть или кондак (задостойник) двунадесятого праздника (в период попразднства).